Keuliakegai 15

Tinggimgwame hena nah kengkap hena

1Cipaucai Ih tinggim ga marehi kedi nah miswakegah ge ngau: tinggimgwame hena da kengkap hena bam—kengkap kamtubedung, kedanemene cidungde le Tinggwang lunghop teicang gwang zie delu.

2Pecai zudageu jaaidi mi ncüt kecu kenzwa ge ngau. Teikuu nah pemie, nah pezi kaupei de reu ngam kelumedung, Tinggwang ne penuide leibungdung kepeu de pwalwe zudageu jaaidi ga sap kebam Ih ngau. 3Penui Tinggwang kilabe Moses lei1 nah Meurünna lei tei bam,

“Ngkiengtube Rampaube Tinggwang,

n batadung au di nah miswagah lie.

Heleuhdung Gwangpei,

n lampuidung au mzui nah masang lie.

4Cau ncu hingme laino, Rampaubo,

nah n zi tei ndu me laino?

Kedanemene nang rünne mci lu.

Heleuhdung pelane gwang eh

ndwa ga ncu reca zie

kedanemene n bata kesamsangdung de keuliagai delu.”

5Ge aidungde cai Ih piegai, ge tinggim ga zierang ketei paiki2 kebam kerecaki de ngkeidi. 6Tinggimgwame hang hena, kengkap hena pwa eh kerecaki gade mpet. Penui langcimpai mci nah rebaaha kecuge bahla nah penui hekarak au kecak kiakangdung le kang teula. 7Pecai ringkela kaune mdai kakgade hangge tinggimgwame hang hena de kecak kwak hena, kelungta ring kela Tinggwang lunghop puiting eh pwabeu. 8Pecai kerecaki de Tinggwang kendu nah pe kengkieng gade kepet mika le puidi.3 Tinggimgwame hang hena, kengkap hena de teicanglu kemaktane migede kerecaki cide ga lütlu tadi.4