Leidung 85

Anuide teingkieng dai beulo

Lei kempwakme muiteube ziemne. Korah napeidung gu lei ge.

1RAMPAUBO, nang n deudi Israel de ngaugia keulia da;

nang Jacob teilung tei ngkei beuda.

2Nang n minadung mau gibeu dida;

nang penui mau de hacim dida. Selah

3Nang n lunghop pelane keu caili dida;

nang n rata kesia gade nreu caili dida.

4Anuide tei mcangbeu, anuide kelikebeube Tinggwang,

nah n suikemakpe anui dade keumzia di beu.

5Nang kelungta anuide n rata la dizie ni?

Gwangdai kera ceheudung bai nang n rata bam zie ni?

6Nang anuide keli dai beu lak ni?

Ciu eh n minadung nda pesuiyi lu zie.

7N samkak kesamsang anuide keulia lo, RAMPAUBO,

n kelikelu anuide peulo.

8RAMPAUBE Tinggwang kerang de Ih kingnei zie,

kedanemene pa pe minadung de ngngwa kezuyi teizie, pecu kenlum medung.

Ciuliede penui kemang lampui ga nreutet daidi kerabe ma.

9Tinggwang de hing kelame da pe kelikelu au nna gwang kesang la dida;

ciu eh kemdu de anui deu ga bamlu zie.

10Samkak kelu kesamsangbe nah nlumlukebui gwang redau luda;

Makesangbe nah lungciep hangge ge de kemam zie.

11Kenlum kesangbe hangdeu kang gade cuh lula,

nah makesangbe tinggim gade pie nghung la.

12Yeo, RAMPAUBE pe samlam keyidung peu zie,

nah anui deu ga petsi bui luzie.

13Makesangbe pe dwaga lazie

nah pe pidaudung telei beuzie.