Leidung 77

Keherei tingdau Ih RAMPAUBE de peeila

Lei kempwakme muiteube ziemne; Jeduthun ria rehi cai. Asaph gu lei ge.

1Ih a kwa pet eh Tinggwang dage mragai zie;

Ih a kwa le Tinggwang de qugai zie, nah a Tinggwang a kekie siu luzie.

2Ih keherei kelu tingba benai Ih Rampaube dade kei;

tingmuiziu pelane Ih a ba hwacuh kekei tei, nah penui leu dima.

Alung kerelui gede ngau luma.

3Ih Tinggwang de nsung keludau mragai;

Ih mnei miedi kecudau pecu nsung dila. Selah

4Nang a miak tei mrak peu;

Ih marang kera keherei sütdi.

5Ih gwang kedi tingbadung de cetdi,

gwang kedi ting tie süt kedi de.

6Ih ma cetncok eh tingmui zie nggwangdi.

Ih macet eh

aide akatei acu keteu.

7Rampaube a cu kelungta lutadi zieni?

Pa a cu madau de ngaugia lia si lak deni?

8Pe lungsang samkak de kelungta gadi zie deni?

Pe sampet de kelungta gadi deni?

9Tinggwang nggia kerade nsung tadi deni?

Pe rata ne pe ngaugia de nkuidi deni? Selah

10Ih ranggai, “Aide a lung tei tube:

Hutube Tinggwang kengkieng anui da bam sime de lie kecu de”

11Dede n tadung de Ih nsung luzie, RAMPAUBO;

N tei kegai miswakegah kehegwadung de Ih cet luzie.

12Ih n tadung pelane cet sünne zie

nah cidung de cetncok daizie.

13N lampui au, Tinggwang, mci lie;

daipau tinggwang anui Tinggwang kedi de de keda lano?

14Nang au miswakega tadung ketei Tinggwang;

nang n kengkieng minadung kakga ge liagai da.

15Nang n minadung de ngking kelu n kengkieng kedide le peu da,

Jacob tsaname de nah Joseph de. Selah

16Duidung de ncu ngau da, Tinggwang;

duidung de n cu ngau da, nah penui hing di;

kecokdung mbeu di.

17Hemwadung dui rui mie;

hemwa kemui tinggim pekwa peugai;

n lakpitsidung1 lim rwa bam.

18N tingceu kwa tingkai ga siu;

ting kehepik de kideube tei mba di;

hangdeube mbeu nah mlai di.

19N lampui dui gade mie

nah n lampui duidung keswak ga mie,

dede n pipadung ngau ma.

20Nang n minadung de kauhau nzwa

teuswa Moses nah Aaron ba teu eh.