Leidung 74

Cuhlu, O Tinggwang n kiebe gumlu

Asaph gu maschil ge.

1Tinggwang, daitei eh nang anuide kelungta gi dino?

Daitei eh n rata le n meurünhau taktyei luh ru dino?

2N mina de nsunggai lo, nang ndaa ting dau lui keludung,

nang peu n mapwa tei zie lie eh kelikelu leuh de,

nah kideutu Zion, nang kelung de ga.

3Gwang pie lo ngkap cangsiak kedidung de,

ngauraume ne kemci ni de ga teimsia kedi pelane.

4N ngauraume ngkinglwe n kerecaki ga sah bam dida bam ni sum ga de nrung di da;

penui hereu ngam kelu rehi gade pailimdung pwa cuh luda.

5Penui nreudung le bi gwang dida

Penui au minadung renaamkang ga tsingbangdung bi gwangkecu nzwada.

6Bung kenzeudung pelane penuine teipang nah tei kecai dida;

penui cidung de nreu nah hegeuteisang le dappop dida.

7Penui n kerecaki gage mi kai dida;

nang kelung bam de tei hera dida, hangdeu gage teumie dida.

8Penui mlung gade rang, “Anui penui pelane de tei ngkap dizie.”

Penui hangdeu ga n keredau ni leune ru dida.

9Anui tinggwang dade ma rehidung gede ngau si meda;

caihakecime ge de bam me da,

nah anui kakga mige de aide dai tingtie ge bam zie bi cima.

10Dai tiege, Tinggwang, ngauraume n dage henui tei bam laino?

Ngauraume n zi rang msia lamui zieni?

11Nang daitei n ba teu caili di zeu no, n zetle ba?

N paini ga de n zetle ba keu lu nah penuide ngkap dilo,

12Dede Tinggwang au a gwang pei n daa tingdung gade tei la dida,

hangdeu ga kelikelu teu gwang eh.

13Nang n kengkieng le duidi mzi dida;

nang dui dung ga neidi dung peu tei kecai dida.

14Nang leviathan1 peudung teipit dida;

nang pecu le hetaideu ga kelung kaune pok tei dida.

15Nang duilet nah duipwak dung ngkei pop dida;

nang hereuki lwa kebamdung de teicangh dida.

16Tingba au ngu, nah tingmui de ngu;

nang tingnaimiak nah hekei de pebam gage kailu.

17Nang kideu raidung pelane teigai;

nang hepwak nah tingka tei gai.

18Nsung gai lo ngauraume ncu dainzwa eh henui teigai bi, RAMPAUBO,

nah kemangme n zi rangmsia kebamde.

19N tamhau teilung de renaam kaune de peu di helo.

N mina keherei kebamme dung teilung de nsung ta di helo.

20N samkak de nsung gai lo,

hangdeu kemui le gimdung ga nggwa kesia kebam de ziemne.

21Keherei kelame de peu nggam eh caili di helo;

peu kegahme de nah keherei kelame de n zi twa lulo.2

22Cuhlu, Tinggwang; n katei n nzeu rang lulo;

nsung gailo dainzwa eh kemangme petingnai ncu henui tei bam.

23N ngauraume ncu renia eh sah kelame kwa nsungta diso

mede ngauraume sah eh kebam kwa de.