Leidung 5

N masang gage acu saubeulo

Lei kempwakme muiteube ziemne; tingkai leibungdung le teikelu. David gu lei ge.

1Ih ncu qu kegai kwade siulo, RAMPAUBO;

a mra kwadung de cet gailo.

2Ih qu kegai kwade siulo, a Hegwangpei nah a Tinggwang,

Ih n dage kekie tei kegaine.

3RAMPAUBO, tingcang nang a kehap kwa siu;

tingcang nuge Ih a nggia n dage pwagwang zie nah regui eh kwabam zie.

4Nang makesia ketei ga suizwa kela Tinggwang ma;

mina kesiame au n giame tei gailak.

5Ngang kelame au n dwaga saplak;

nang kemaubata teikela pelane de ngkau la.

6Nang kenretmedung de ngkap dizie;

RAMPAUBE regeu kelame nah mide cwa kecume de ngkau la.

7Dede Ih a ziemne au, n samkakkelu samsang kedi ziemne, Ih n ki ga gwang zie;

herüt peu eh Ih n kemci kerecaki ga keumie.

8Oh Rampaubo, n kesamsang gade a lampui sau beulo kedanemene a ngauraume ziemne;

n lampui a dwaga tei mzui beulo.

9Penui mui ga kesangbe bam kemak ziemne;

penui helungbe au kesia le pui;

penui rwak au herau ngkei pwa kebambe;

penui penui mleu le kecwa sam rangla.1

10Ngauraume dage maudi delie de eh rang beulo, Tinggwang;

peu penui riem kegaidungde le penuide ngkap dilu!

Penui mau kekiee de ziemne penuide gwagi dilu,

kedanemene penui ncu renia kedi ziemne.

11Dede n dage nsiu gai kelume leune depeu penui sui yilu;

peu penuide penui suiyi kwa sahlu kedanemene nang penui de gumbeu delu;

peu penuide n dage penui suiyi gailu, n zi de pesui kelame.

12Nang kesamsangme de samlam beuzie kecune, RAMPAUBO;

nang penuide kengha le penuide hegeu nzwa gum beula.