Leidung 45

N hegwangbam au, O Tinggwang, kelungta

Lei kempwakme muiteube ziemne; Shoshannim gage tei gai. Korah namedung gu lei ge. Maschil ge. Kehung lei ge.

1Ma ha keyibe le a nlung pui dida;

Ih hegwangpei ziemne mpwak kelu samdung de Ih pei mtei lia zie;

a mleu de ma rau kecime gu kerautie ge.

2Nang mina namedung swade hezu yi;

n muileudung gage ngaugia sam ruigai pwabam;

ciziemne Tinggwang ncu kelungta samlam beu kecu anui cibam.1

3N kingtie n mbie gage kailu, kengkingbo,

n kemdu nah kengkieng gade.

4N kengkieng de hecili eh tet petlu,

kedanemene kesamsang, mnwa, nah nlumlu kebui ziemne;

n ba zetle ne ncu ngau kehingdung ledeu lia zie.

5N lakpitsidung au pemui yi;

minadung n kangga kaumie dila;

n lakpitsidung au hegwangpei ngauraume mlungdung ga la dida.

6O Tinggwang, n hegwangbam au, kelungta nah kelungta;

n hegwangram au masang nah masang eh bamzie.

7Nang kesamsangbe de nsui nah kesiabe de au ngkau la;

cine Tinggwang, n Tinggwang, ne suiyi ca le

ncu keniaklu n kangngwame swade kieeki eh.2

8Nnui painidung pelane myrrh, aloe, nah cassia rim nnamla;

hepwangeu hegwangkidung gade heria le tei kelu leibungdung ne n suiyi teilu.

9Hegwangpeime napuimedung nnui herüt kepeu mipuidung kakga la;

n zetle ba lebie hegwangpui Ophir kecakle3 cumlu eh bam.

10Kingneilu, hegwang napui, kingnei teune lu;

nkatei n minadung nah n pei ki nsungta dilu.

11Ainzwa eh hegwangpei n zuyi de hengim zie;

pa n mpaube; pecu rütlu.

12Tyre namdi hegwang napui mapeu ge pwalwe cika gwang zie;

minadung kakga de keheimedung n ngaugia kie zie.

13Hegwangpei napui hegwangki ga ndusüt bam;

pe niadung kecak le tei pwabam.

14Pepai pegiak kepui nia teulu delwe pecu hegwangpei dage ngngwa gai dizie;

kemci puidung, pe kangngwamedung pecai sui kelame,

n dage ngngwa gwang beuzie.

15Penui sui yi nah rengasüt zie;

penui hegwangpei ki ga lüt zie.

16N peimedung bam n namedung ne pwa leu zie,

nang penuide peu kideu pelane ga hegwangme teizie.

17Ih ceheu leune de n zi nsung lalu kera teibeu zie;

cine minadung kelungta nah kelungta ncu hetwa peu zie.