Leidung 147:3

Pa helung keherei kelame de de tei relui beula

1RAMPAUBE de twalu,

anui Tinggwang dage ketwa lei teigai kecu yilie,

cide au keyi ge, nah ketwa au petau.

2RAMPAUBE Jerusalem tei dailu,

pa Israelme zangra keladung de ngngwa ncüt dailu.

3RAMPAUBE pe lung keherei kelame de teihemi beula

nah penui rezam zamdung kangbeu la.

4Pa hegidung pei,

pa penui pelane zi nsiak lie.

5Anui RAMPAUBE au di nah pe kengkieng au disüt,

pe maci au mdet gailak.

6RAMPAUBE mine kemneume de teucuh beula,

pa kenlienme de kideu gage tei kau dila.

7RAMPAUBE dage ketwa lei tei gailu,

anui Tinggwang dage ketwa leidung tei gailu leibung keu eh.

8Pa hemwadung le tinggimdung gum cim dila nah kideu ziemne tingrui teigai la,

lamlwatudung ga cehei lung kera teibeu la.1

9Pa makaunedung de matyei kera peula

nah nruine nra kegai dau pa matyei kera peula.2

10Pa hekwen ge kengkieng de pe suiyi swa lama,

pa mige pe pi kengkieng gade pe suiyi swa lama.

11RAMPAUBE pecu kerütme de pe suiyi la,

pe samkakkelu kesamsang nlum kelame de.

12RAMPAUBE de twalu, Jerusalem,

n Tinggwang de twalu, Zion.

13Pa n herieki piakdung tei ngking beu kela ziemne,

pa nnui kakga n namedung de samlam beula.

14Pa n railung ga mahei teugwang beula,

pa wheat yitube le n nnung teibeu la.

15Pa pe sam kideu gage langgai la,

pe sam pak nzet sütla.

16Pa buising langkwa nzwa teilu la,

pa hesiu teizang la mimüt nzwa.

17Pa tangheu taktyeipok ketangrabe nzwa tei zangra beu la,

caune kengkung pa lang kegaide lia lulai?

18Pa pe sam langgai nah cide tei suidi,

pa tingkai gui kera nah dui lwa kera teigai.

19Pa pe sam Jacob dage ranggai, pe zaidung

nah pe samsang zaidung Israel dage.

20Pa cide heleuh keda keheibe dage teigai ma,

nah pe zaidung de au, penui cima.

RAMPAUBE de twalu.3