Leidung 139:14

Acu kecunglo, O Tinggwang, delwe a mlung cilulo

Lei kempwakme muiteube ziemne. David gu lei ge.

1RAMPAUBO, nang acu pie teune luda, nah nang acu cila.1

2Nang Ih ntum kecudau nah cu kecudau cibam;

nang kemdei gade a lungning pelane cila.

3Ih zeu kebam nah a lampui nang ngaubam;

Ih teikela leune nang ci bamla.

4Ih samge de rang kemak dwade,

RAMPAUBO, nang cide ci mcigi bam.

5Acai nah adwa de nang acu twagwa bam

nah n ba areu gage kailu.

6Cikenzwa maci au a ziemne kieezu;

cide au huzu, nah Ih tungcang gailak.

7N rabe dade Ih tetpwa daiga mielai?

Nang kebam gade Ih daigage pak gailai?

8Ih tinggimdung ga hang ge, nang cika bam;

Ih Sheol bam ga a zeu teilu de, nang cika bam.

9Ih tingcang hesiu gade lim tet dide,

nah duikedi mdeitu le ga lung kera gwang dide,

10Cikade n ba le a lampui saubeu zie,

n ba zetle le acu gumlu zie.

11Ih ainzwa rang liede, “kemui ne acu kebai bi dizie,

nah kebaa acu twagwa kebam de mui dizie,”

12kemui de n dade au mui ma.

Tingkemui de tingkeba dau nzwa baa zie,

kedanemene n dade au kemui nah kebaa nzwakap kecune.

13Nangne a lungnet pelane damgai;

nang ne a pui za gade acu tamtok ncütlu.

14Ih ncu twa zie,

kedanemene Ih au n bata miswakegah ge kecune.

A rabe ma aide ci hemisüt bam.2

15A radung n dade hebai dima

a pui ja gade tamtok teune lu,

Ih cika kembai gade lungh di cu kecu dau, Ih cika kebam nang ci.

16A pui za gade nang acu ngau;

tingbazie acu kepeudung pelane n laisiukwak gage rauteula,

tingbazie raitu de gwang kemak dwa de.

17O Tinggwang, n lungcetdung de daikenzwa gede a ziemne pemi hung no!

Penui dai kieede kieeno!

18Ih cidungde peei cai, penui au heciang dung swa kiee zie.

Ih mrak luge, Ih ncu ngngwa bam.

19O Tinggwang, nang mi kesiame de teitset lubui liecai;

a dade tet mdei dilu, nnui mide teiketset medung.

20Penui n dade penui zaisia la nah mide cwala;

n ngauraumedung kenret rangla.

21O RAMPAUBO, Ih ncu ngkau kelame de nkau meni?

Ih ncu renia kelame de ngaurau la meni?3

22Ih penui de ngkau cangsiak lie;

penui a ngauraumedung dida.

23Acu mcet teune lu, Oh Tinggwang, nah a nlung cilu;

acu kedakpie lu nah a lungcet cilu.

24A da makesia gede bamcai pielu,

nah kelungta bam kela lampui gage acu sau beulo.