Leidung 116

Ih RAMPAUBE de hunglie

1Ih RAMPAUBE de hung la kedanemene pa

a kwa siu nah a kekiedung kingnei kelane.

2Pa a kwa kingnei la,

Ih kelungta pecu qu zie.

3Ketsai kengngi a cu twagwa la,

nah herau kerim acu nna bamdi;

Ih kengngi na lungpang le puidi.1

4Pecai Ih RAMPAUBE zi qugai:

“RAMPAUBO acu ngaunggia eh, a teilung kelibeu lo.”

5RAMPAUBE au mide ngaunggia nah mateunsam la;

anui Tinggwang au mide ngaunggia la.

6RAMPAUBE au kengha kegahme de gum beula;

Ih kengngi ga ladi, nah pa ne acu kelibeu.

7A rabe pe kemtak ni ga cailigwang daidi lubui da

kedanemene RAMPAUBE a dade pezai yi kelane.

8Kedanemene nang ketsai gade a teilung kelibeu da,

a miakduidung peu lwa tadi,

nah peu acu ngam dima.

9Ih keringme deu ga de

RAMPAUBE gwa tei zie.

10Ih RAMPAUBE de nlum bam, Ih ainzwa kerang daude,

“Ih kehereisüt dida.”2

11Ngngi kebamdau Ih rang eh,

“Mina aidung pelane au kenretme.”3

12Ih dainzwa RAMPAUBE pau rui lai

a dage pe keyi pelane ziemne?

13Ih kelikelu piak pwa eh,

RAMPAUBE zi quzie.

14Ih RAMPAUBE dage a sam pet keludung de teicang zie

pe minadung pelane kebam gade.

15Pe minadung tsai kegai au

RAMPAUBE dwa gade pemi hungtu lie.

16RAMPAUBO, kesangda, Ih n kilabe lie;

Ih n kilabe, n kilapui napei lie;

nang ketsai gade acu keli luda.

17Ih ncu ketwa ratak peu zie

nah RAMPAUBE zi quzie.

18Ih RAMPAUBE dage a sam pet keludung de teicang zie

pe minadung pelane kebam gade,

19RAMPAUBE kigu gade,

nnui kakga de, Jerusalem ga.

RAMPAUBE de twalu.