Job 28

1Cika rangkanggeu kekuiki bam kesang lie,

penui kecak tei mcilu kela ni ge.

2Kideu gade hegeu keu mpetlu;

tangtsu gade hetageu tei sui mpetlu la.

3Mina kemui kezing penli ga mie delwe peeila,

nah deitu ga kecang de

tangtsudung peei miela mi mielakemak muiting gade.

4Mina lungla kemak,

mina pihi gaila kemak deu tei pop gwangla.

Pa mina bam kemak kendei ga rwa mpet nlüt teila.

5Kideu gade, ketyei pok pet kela nzwa,

cide mi ge nzwa pekang gade mpetla.

6Tangtsu cidungde ga sapphire1 ngau lula,

nah cipau suinadung ga kecak bamla.

7Tuityei kela ruine lampui cide cima,

mede cide heraruine ngau ma.

8Makaunedung de lampui ci kenzwa ga tetkah ma,

mede hingho kekuu be de.

9Mina tangtsu ketakbe de tei pop;

pa lamlwadung mah ri mpet.

10Pa tangtsudung ga pe koikidung rila;

pa cika pemi kehung leu ngau.

11Pa reuceunadung de kang di ciciu eh penui lwa gai kelak tei di;

cika kebai pwa kebamdung de kebaa gage pwa mpetlu.

12Dai gade maci peei lulai?

Daiga maci bam no?

13Mina au cipau mi de cima;

mede keringme kebam niga cide ngau luma.

14Kideu kangga kebam dui kecok be rang, ‘Cide a da bam ma’;

jaaidi be rang kecu, ‘Cide a da bam ma.’

15Cide au kecak ge le rehiak gai lak;

mede cide rangkanggeu ge le pemi mdet gailak.

16Cide Ophir2 gu kecak ge le de keda gai lak,

onyx3 mede sapphire4 le de.

17Kecak nah crystal swade pe mi kiee;

cide kecak le ketei heteidung le de rehiak gai lak.5

18Coral6 mede jasper swade pemi hung;

kesang lie, maci au hegakang swade pemi hung lie.

19Cide au Cush gu topaz7 le de keda gai lak;

mede kecak mcitube le teu pe mi mdet canggai lak.8

20Dai gade, ciciu cai, maci gwang no?

Makeci kecet bam daiga bam no?

21Maci au ring kelame dade kebai dila

nah tinggim ruinedung dade hebai dila.

22Kengkap nah Ketsai rangla,

‘Anui kwen le ledkiee sam cide reki kebam siu da.’9

23Tinggwang au lampui cide cibam;

pa pe bam cide cibam.

24Kedanemene pa kideu penli ga kecang de pie bam kelane

nah tinggim kang kebam pelane ngau kebamne.10

25Pa tingkai kecii teigai

nah duidung de perüt mdetlu.

26Pa tingrui kera ting rietlu

nah tingceu kera lampui ge tei gai.

27Ciciu eh pa maci ngau lwe cide reci lia;

pa cide teilu, kesang, nah pa cide piegai.

28Tinggwang minadung dage ranggai,

‘Pielo, Rampaube de kerüt au, cide maci delie;

kenlien be dade cam mpet kelu au maci delie.’” 11