Job 17

1A rabe au penli dida, nah a teilung tingdung cang dida;

herau be a ziemne mtei pwabam dida.

2Kesanglie mide rangkemsiame acu ngngwa bam;

penui mide rangkemsia a miak le ngaubam muila.

3Sampet ge peulo, nkatei le a lam sap beulo;

cauge bam si reuno acu ngha kera?

4N ziemne, Tinggwang, penui mlung ma cilu kera gade kainzeu dida;

ciziemne, nang penuide peu a reu gade ngkieng diso.

5Keheibe de pe zangme de ziehi mlai kedime,

pe name miak au ma ngau ta dizie.

6Dede pa au acu teipwa mina samkie teibeu;

penui a zu gage mcai nsui gai.

7A miak liede a sui kesia dene ma ngau mcilu meda;

a pumteih pelane tingkaumie ge nzwa cip dida.

8Masang kelame de aide ziemne penui swagahdi lauda;

kemcimedung penui cuh delwe nlum kemakmedung de renia lauda.

9Petau tei kelame pe lampui be ga la luzie;

caugamme pe ba mci labi cipaume ngkieng si reureu luzie.

10Dede nnui pelane ziemne au, cu gwanglu;

Ih nnui kakgade makecime ge de ngau gailak.

11A teilung tingdung au cang gwang dida; a mariemdung au hedeu kecai dida,

nah cirünne mene a nlung hengindung de.

12Mina aidungde, mide rangkemsiame aidungde, kemui de tei kedi pwa kebaa tei dida;

kebaa au kemuibe taiga bam dida.

13Ih magade ki hengin kebam ge bam liecai cide au Sheol;

nah Ih magade a bam kemuibe gage teukam gai liecai;

14nah Ih magade hangdeu koiki de rang eh, ‘Nang au a pei,’

nah tangseu be de pwa, ‘Nang au a pui mede a tipui,’

15iciucai daiga a keregui de bamno?

A keregui ziemne au, cauge daige ngaulu lai?

16A hengim be acu ngngwa eh ketsaime mbau kela heriekidung ga hung zieni

anui rebui ga kenghung dau?”