Hosea 8

Israel kaigwa Rum kera

1“RAMPAUBE rang eh, n muileu gage telui ge kailu!

Helie ge au RAMPAUBE kelak reu ga gwangla da

minadung a samkak de gileu kedine

nah a aja de mlai kedine

2Penui a dage sah gai, ‘A Tinggwang, anui Israelme ncu cibam.’

3Dede Israel au ma keyibe gi dida,

nah ngauraume pecu zuimie zie.

4Penui hegwangpeidung kedet lula,

dede a dade ma.

Penui hegwangnadung kedet lula,

dede a dade ma.

Penui rangkang nah kecak le

penui ziemne mamiedung tei luda,

dede cide penuide ngkapdi kerane.”

5“N tumna de mlai dida, Samaria.

Mina aidungde reu ga rata ru bam dida.

Daitiege penui mau eh lazie no?

6Mamie aide Israel gade kegwang;

cide heta keteime ge ne teilu;

Cide au Tinggwang ma!

Samaria ga reca kela kecak tumna mie de teikecai dizie.

7Minadung tingkai gigai

nah rahang rumlu.

Sap kebam ciude pe bui gah;

cide tokkui tei gailak.

Cide ci lude,

sangme ne cide tyei luzie.

8Israel de au mneu luda;

cu au penui kemta ge tei eh heleuhdung kakga la dida.

9Penui kengha kie kerane Assyria hang

pekatei renaam gada ge nzwa.

Ephraim pe ziemne pe mraimedung de lilu.

10Penui mraimedung de heleuhdung kakde li lu liede,

Ih cu penuide keu hekwa luzie.

Penui riem eh gah dizie

Kedanemene hegwang nadung penuide kemneu ziemne.

11Ephraim au kemau recadung ziemne recabamdung teingkie luda,

dede cidungde kemautadung tei kerane recabamdung dida.

12Ih penui ziemne a zai pia cang kerei raubeu lubui,

dede penui cide ma ketsam ge nzwa pie dila.

13Acu ratak tei kebeu a recadung au,

penui heteih pwa ratak teila nah cide tyei lula,

dede, Ih RAMPAUBE cidungde luulak.

Ih penui maudung cu mning luzie

nah penui mau ziemne saja peu zie.

Ih penuide Egypt gage lang caili gai dizie.

14Israel acu nsungta dida, pecu Teikegaibe de,

nah hegwangkidung tei luda.

Judah au kengkieng namdidung kekiee ge kwa luda,

dede Ih au pe namdidung gage mi langgai zie;

cide pe reneidung ngkap dizie.