Hosea 6

Israel Helung nreu kemak

1Israelme hangge ge dage ranggai, “Gwanglu, anui RAMPAUBE da caili gwang cugo.

Pa anuide teurak kecai dida, dede pa anuide teingkei beu zielu;

pa anuide rezam dida, dede pa anui zamdung de kang beuzie.

2Langna cai pa anuide tei ngkieng beuzie,

pa anuide langcumne benai teucuh beuzie,

nah anui pe dwaga lungh zie.1

3Anui RAMPAUBE de ci lugo;

RAMPAUBE de cilu kera anui laikai tei lugo.

Anui RAMPAUBE de cilu kera laikai tei lugo;

pa tetpet kera au tingcang nuge nzwa dizie;

pa anui da tingrui nzwa gwang zie,

heriak tingrui hangdeu ga rui kemie nzwa.”

4Ephraim, Ih ncu teu daitei laino?

Judah, Ih ncu teu daitei laino?

N kesamsang au tingcang mwa ge nzwa,

hezin gah zette di kelabe nzwa.

5Cine Ih caihakecime de teu penuide dang kecaidi kerane langgai,

Ih penuide a mui gade kepet samdungde le teitset dida.

N tutiak au kebaa baa kepet nzwa lie.2

6Ih ratak mene kesamsangbe asui kelane,

nah keru recadung swade Tinggwang maci be.3

7Penui Adam nzwa samkakkelu de gileu dida;

penui a dade masang tadi.

8Gilead au kesiaketeime namdi ge

hejai pipadung le puidi.

9Sütketyeime maa migede kwa kebam nzwa,

cinzwa cingkumedung gwang ngkwalu Shechem namdi ga heni kemci kemie lampui gade mide daptset gai kera;

penui hengam maudung ge tei dida.

10Israel kelak ga Ih ma kehing ge ngau da;

Ephraim helili kecu cika bam, nah Israel hera dida.

11Oh Judah, n ziemne, saja luhlüt ge mtei luda,

Ih a minadung de peu lungh yi dai kecu dau.