Keledeube 11

Dui Reuga Tangku

1Ngu tangku duidung gage lang mpet gai culo,

kedanemene, tingbazie kekieege cai nang cide ngau dai luzie.

2Cide nang mina hanghena, mede hangheset gade liede mzi beulu,

kedanemene kideu ga daidau keherei gwang zie bi nang cimelu.

3Magade hemwadung ga tingrui kepuih teidi cai,

cide pekatei pecu kideu gage tei mrwa gai la,

nah magade tsingbang tingbangle mede tingtünle ge kaugai di cai,

tsingbang cide daiga ge kaugai bi cika peluila eh bam dila.

4Keheibe de tingkai maa pie bam kedibe heleuh linglu tadi lubui,

nah keheibe de hemwa maa pie bam kedibe luhlüt lu tadi lubui.

5Nang tingkai lampui cila kemak nzwa,

nah tetlak pui za ga ngiena rah dainzwa bwa zeubi kecu cila kemak nzwa, 1

Tinggwang maleune dam kegaibe

batadung nang cicang gailak.2

6Tingcang ting heleuh keu linglu;

tinghegi kemaktane, bata tei mai kesiabedung n ba le teilu,

kedanemene dai de lungcuh zie bi nang ci kemakne,

tingcang ting zie mi mede tinghegi ting zie bi, mede aide zie mi mede cide zie bi,

mede kenana de nzwa kap eh yi beu zie bi nang ci kemakne.

Hanglei Dauge Ncu Damkegaibe de Nsunglu

7Kesangsiakpe, kebaa au hezuyi süt,

nah mimiak le tingcang naimiak ngau kegai au suiyi ge kesang.

8Mige magade tingkum kekieege ringlu liecai,

peu pecu cidung pelane gade pe suiyi lu,

dede kesia kemui tingbadung gwang lai kezeu dede pecu peu cetlu,

kedanemene cide kieesüt zie lu.

Gwang lai kezeu ma pelane de mwangzui ge nzwa gah di kera swa sima.

9Heluibuame gou, nang hena kebam dau nsuiyi lu,

nah nang hena kebam tingdau n nlung suiyi tei eh kehega lu.

N nlung suiyi hengimdung peei lu,

nah n miak dwaga nang ngaulu kebam pelane gade de.

Iciu de, ma aidung pekiene ziemne Tinggwang ntu tiak kera ci lulo.

10N nlung gade rata gwa gidi lu,

nah n pumteih ga keteeikeneei pelane nsungta dilu,

kedanemene, heluibuame nah penui kengkieng rentsi au mwangzui ge cai sima.