Hezaidung

Deuteronomy

Hezaidung Laisiukwak

Mraisam

Hezaidung pelane “hezai kenabe.” Mmi riakdai cai Israelme Sampetkebeu Canaan Deu ga nlüt lai bamdi. Dede ciciu kecudwa Moses penuide penui rasam rangnsung kegai teineu di, Tinggwang penui ziemne teikegai leune nah Tinggwang ne kedetkelu minadung tei eh penui mzai jüja la kera zaidungde.

Pe sam keraibe cai mbeu kah kegwang gade Tinggwang penui dede pe zai keyi nah penuide Canaan deu kepeude rangnsung kegai tei. Moses sam kenabe cai Tinggwang zaidung rangndui kegai sam kerei de si eh Moses au penuide Rampaube n Tinggwang de “mlung pelane nah n keringria pelane nah n kengkieng pelane teu eh ku lulo” rangbeu Tinggwang samlam teu eh kehega jüja lalu kerane. Moses au Tinggwang de ngngwa eh lungh lalu kerane, minadungde Rampaube de kulu nah pe samdung mzailu kera ledeu beu kera ranglia gai.

Hezaidung laisiukwak de Israelme de Tinggwang penuide samkak kelude (pedum 29), Joshua depeu muiteu kehecibe tei kera kedetkelu de (pedum 31), nah Moses tsit (pedum 34) ha de nsung keheci dai beu. Mina kekie le Moses ne Hezaidung laisiukwak de raugai lie eh luu kelu teila pe tsit ha rau de gwale.

Pelung ga keladung

Moses samrang keraibe: Israel reha (1:1-4:43)

Moses samrang kenabe: hezai piecaili kegai (1:44-11:32)

Tingba ramsang ziemne hezaidung (12:1-26:19)

Samzaiketei nah samzai teikemak caineu (27:1-28:68)

Samkak kelude teihecikelu (29:1-30:20)

Moses Israelme de samlam kebeu nah pe tsit (31:1-34:12)