John Keraibe 1

Kering sambe

1Kering Sam, kendeu gade la kedide, anui siukelude, anui miakle ngaukelude, anui piekegaide, nah anui ba deu kegaide— 2kering cide mi miakngau tei gwang kesang, nah anui cide ngau da, nah anui cide zierang teila, nah anui kelungta kering, Peibe da kebamde, nah anuide peu ci kegaide nnui dage ranggai la— 3anui ngau nah siu kelube nnui dage de ndulia gaila, ciu eh nnuide anuide ngngwa kekangbau lu kerane. Anui ngngwa kekangbau kecude au Peibe nah pe Na, Jisu Khrista de. 4Nah anui ma aidungde nnui dage rau gaila iciu eh anui 1 suiyi canglu kerane.2

Kebaabe ga tetla

5Samlia aide anui pe dade siu kelu nnui dage paulia gaila, cide Tinggwang au kebaabe, nah peda au kemui gede gah.3 6Anui pecu ngngwa kekangbau lalie bam eh kemui ga tetla cai, anui au kenret la nah kesangbe tei mzai la meda. 7Dede pa kebaa ga kela nzwa, anui kebaa ga tetla cai, anui hangge ge de ngngwa kekangbau bam, nah pe Na Jisu jai ne kemau leune gade anuide teimci beula.4 8Anui anui da kemau gah de rangla cai, anuikatei anuide cwa la, nah kesangbe anui da bam meda. 9Dede anui Tinggwang dage anui maudung pet lucai, pa au masang nah mzeu, pa anui maudung gibeu zie nah kemaudung pelane gade anuide teimci beuzie.5 10Anui kemau tei melie rang lacai, anui pecu pwa kenretpe teila dida, nah pe sam anui da la meda.