Corinthiame Keraibe 8

Ketyeipuk mamie de ratak teibeu kedibe

1Cu ketyeipok pwa mamiedung de ratak tei kedibe ha nnui laisiu ga raukegai de: Anui pelane da maci kebam anui cibam. Maci mide teingang dila, dede keku au mide teimmi beula. 2Keheibe de pa maci lie cet lacai, pa cimai kesiabe cilu mereu. 3Dede mige Tinggwang de kula cai, cipaude de pa cila. 4Cine, ketyeipok pwa mamiedung de ratak tei kedi ketyei ha de: Kideu aika mamie de au mage de kemak nah Tinggwang ket rünne kecu anui cibam.1 5Kedanemene tinggim ga mede kideu ga tinggwangdung lie qukela bam de, “rabedung” nah “tinggwangdung” kekiee bam kecu nzwa, 6dede anui ziemne au Tinggwang ket cai gah, pa Peibe, peda de ma pelane gwang nah pe ziemne anui lunghla, nah RAMPAUBE Jisu Khrista de ket, pe dade ma pelane gwang, nah pe dade anui lunghla.2

7Iciuliede, maci aide peciakne da bam ma. Meliene, midungge au ndaa pe luige kedi nzwa cu kecangde ketyeipok aide mamiedung de ratak teibeu kedi nzwa tyei lala; nah penui kecet kemnei ne penuide teihera dila. 8Dede ketyeipok ne anuide Tinggwang da ngngwa nna gwang gailak; anui tyei mede siaswa dilak, tyei liede yiswa gailak. 9Dede nnui sünne lu, ciu eh nnui suira ketei aide ziemne kemneime puikaam ge teidi melu kerane. 10Kedanemene nang ma kecibe mamie kerecaki ga matyei bam eh mige ncu ngau cai, pe lungcet kemnei de ziemne, mamie de ratak teibeu kedide tyei kera pecu teingkuu di lakni? 11Cine kenlum kemneibe, n sinabe, Khrista pe ziemne tsaigai kebeube de n maci ziemne teingkap dizie. 12Cine, nang n sinamedung dage kemau teigai nah penui lungcet kemneidung de tei rezamdi eh nang Khrista dage kemau teigai dizie. 13Ciziemne, ketyeipok ne a sinabe puikaam teidi liecai, Ih madaude heteih tyei lakta, iciu eh Ih a sinabe puikaam teidi melu kerane.