Corinthiame Keraibe 16:14

Tinggwang minadung ziemne hemakehekwa

1Cu kemcimedung ziemne hemaa hekwa kecude ziemne: Ih Galatia ga ngqwadung dage rang kegai nzwa, nnuide cinzwa tei lulo. 2Mtakkak gade tingbazie raitu benai msangne, nnui hangge ge kecu ngaukelu gade kesa keuntsam lwe hekwa lulo, iciude Ih kegwang dau, ma hekwa melu kerane. 3Pecai Ih gwang lude, nnui ne kedet pwa kebamme dage Ih laisiu raugai eh penuide langgai zie, peu nnui mapeu Jerusalem ga pungmie kerane. 4Nah Ih de mie kera tau dicai, penui acu nzang mie zie.

Pe ziemne kiekegai

5Dede Ih Macedonia kahgwang kelu caine nnuida gwang zie, kedanemene Ih Macedonia kahgwang zielu. 6Nah Ih nnuide ngngwa bamde cilak, mede tingtiak ting pelane bamdi de lubui, iciu eh Ih kehei ga kemie ga nnui acu a beuh ga nghalu kerane. 7Kedanemene Ih cu nnuide kahgwang eh ngau kegai rünne neu ma, kedanemene Rampaube lungning liecai, Ih tingkak nage ziemne nnuide ngngwa bamkera reguibam. 8Dede Ih Pentecost Ngyi cang kemaktane Ephesus ga bam zie, 9kedanemene kikam kedi nah keyi ge a ziemne ngkei pwabam dida, nah mina kekiee ge acu renia bam.

10Cu Timothy gwangcai, peu pecu ngngidi mene nnuide ngngwa bamlu, kedanemene pa de Ih nzwa Rampaube ta teibam delu. 11Ciziemne, peu migede de pecu cet helei diso. Dede peu pe lampui ga nciep eh gwanglu kerane pecu ngha lo, iciu eh pa ada gwanglu kerane, kedanemene pa kenlummedung de nzang gwanglu kera Ih regui bamlu. 12Cu anui sinabe Apollos de anui sinamedung de ngngwa eh nnuida gwang lulo Ih rang sünne gaila, dede cu au pa gwang kera pe lungning ma. Ciude, pa peting keyi ngau lude pa gwang zie.

13Mriak bamlu; kenlum ga sap ntiplu; kuu lu; ngking lu.1 14Nah nnui tei kecu pelane de peu keku gade teilu.

15Cu, sinamedung, nnui Stephanas nah pe kilungme ne, Achaia deuceu ga petsi raitube kecu cibam, nah penui kemcimedung ziemne bata keyi ketei ga penui lung kaisüt gai. Ih nnuide kecung sünne gaila, 16iciu eh nnui de mina aikenzwamedung, nah helungnei eh ngngwa heta teikebamme keheibe kangga bamlu kerane. 17Ih Stephanas, nah Fortunatus, nah Achaicus penui kegwang ziemne a suiyi bam, kedanemene nnui lamde cang kemakbe penui kepeune; 18kedanemene penui a sui nah nnui sui teimring gaibeu. Cine, mina aikenzwame dungde ci lulo.

Kelumkegai kekambe

19Asia ga ngqwadung nnuide kelum gaila. Aquila nah Priscilla nah penai kiga ngqwame de Rampaube zi gade nnuide kelum sünne gaila. 20Sinamedung pelane nnuide kelum gaila. Hangge ge de kemci kehemam teu eh kelum lulo.

21Kelum kegai aide au Ih ne raugai—Paul. 22Keheibe de Rampaube de keku gah cai, peu pecu reset punglu. Anui Rampaubo, gwang lulo!2 23Rampaube Jisu ngaugia de peu nnuida bam lulo. 24Khrista Jisu gade a keku nnui pelane da peu bam kelube tei lulo. Amen.