Titus

Neletes Namun Pol Hiy Titus

Nakaka non Titus Qelegēn

Nakaka non Titus qelegēn. Igōhkē neletes a Pol mayap tō van hiy Titus.

Pol, ikē nahal vitwag. Tigsas metyak kē, wa mēvētleg kē hiy ige tog lolqōn̄, so vasemlō noyoy ēwē. Pol mavan vel mahē so nitoytoy gatay Tigsas Kraēs. Mahē nisil mēdēmtig en, kē motog tiwag mi kēy wa mavatgo kēy mi vel haphap a kēy nemyōs. Tō kē meqtēg nēm̄ yon̄ wa metyak ige lililwo nan. Bastō kē mavan lokse mahē tegha tō meqtēg lok nēm̄ yon̄. Ba mahē a kē mavan yak den lēm̄ yon̄ vitwag en, kē et lolqōn̄ te kēy, tō kē mēvētleg lokse me ige yowyowveg nonon so vasōsōp kēy.

Pol et vanvan mahgen te ba kē melep yaplōplōn so nimyin̄ kē lemgumgu namun. Titus, ikē vitwag den kēy. Pol mohole gatay Titus vag m̄adeg a layapyap namun.

Pol mavatēp napnō vitwag nahan Krit. Napnō Krit en, ikē qeleso nēk qultiwag Santo vagyō. Kē meqtēg yatkel ēm̄ yon̄ van lepnō anen. Ba namgumgu et bah qete wah, kē nivayak den kēy. Ba kē mōm̄ōk veteg how Titus so niak babah namgumgu nan.

Pol mayap nayapyap gōh van hiy Titus so nimyin̄ kē bemgumgu namun. Pol mēvētleg neletes gōh van hiy Titus ba kē nemyōs so ige lēm̄ yon̄ so vatah temuy se. Veg Pol nemyōs so ige tēlēm̄ yon̄ so ēglal so Titus, ikē nilwo goy kēy, wa namgumgu namun a so kē so nigaleg.

Pol nemyōs so Titus nietyak ige lililwo ne ēm̄ yon̄ geh anen. Tō Titus so nivatgo kēy so qeleave kēy so togtog, wa so etgoy nēm̄ yon̄ den ige et galgal. Veg ige vatgo galgal tiple m̄eygal nisil, wa tō kēy tiple vēlwoy nēm̄ yon̄.

Pol nihohole gatay ige vatvatgo galgal. Kē mavap so kēy nam̄adeg. Tō kē mavap vētday nēm̄ yon̄ so nitog yon̄yon̄teg ige vatvatgo mey a kēy nemyōs so tatag nēvēnan ige Juw.

Ige vatvatgo nan vap so ige sil so van me qele ige Juw sowo kēy nemyōs so dam Tigsas. Ba nele nonoy aē mey a so ak vēglal kēy, wa negengen nagay mey nēwē a so kēy tegen vēh. Ba Pol nēglal so Ḡod tavaēh gēn bemgaysēn ēwē, ba et bahaphap te a gēn gagaleg, si so et begengen te a gēn so gen en. Nahaphap del geh gōh Pol nemyōs so Titus nivatne ige sil aē.