Hibruw

Neletes Hiy Ige Hibruw

?Neletes gōh nikaka gatay nahap?

Neletes gōh van hiy ige Juw mey a kēy nēdēmtig Tigsas. Neletes gōh nim̄ōleg qeleave Tigsas nileh namtehal bomogmogo goy Ḡod Layapyap Tēnēte mi namtehal gayaq. Kē nigaleg so ige Juw tey maymay nēdēmtig nonoy.

Gēn et ēglal te so ihē mayap neletes gōh. Kē et hohole te qele Pol, ba kē mavasem so kē mēglal yaplōplōn Pol yatkelgi. Kē mayap neletes tege qeleso lēte 68 AD.

Neletes gōh mayap vasem woqse hap susu lēvēnan ige Juw. Nahaphap nan mey ige Juw nēglal galsi aē en, kē nim̄ōleg nahaphap gayaq aē veg Tigsas.

Kē nim̄ōleg so Tigsas en, kē neketket yeh den ige in̄sel, wa neketket yeh den Nele non Mosis. Tō Tigsas neketket yeh den Mosis, tō neketket yeh den napnō mey a Ḡod melep van hiy ige Juw. Tō Tigsas ikē nitiy pris liwo, mey a itōk veteg den nipris liwo non ige Juw. Veg nolol mey Tigsas magaleg en, kē itōk veteg nolol non ige Juw tam̄ag. Veg nahap mey a Tigsas nigaleg en titig lap vaga, et qele te namgumgu non ige Juw tam̄ag. Bah tō, kē nivahiy maymay ige Juw so tig maymay lēdēmtig nonoy lahan Tigsas.

Neletes gōh nihole gatay nakavanan tam̄ag wa nakavanan gayaq. ?Ba nakavanan vitwag nahap? Nakavanan qeleso napnopnog mey net vōyō ak maymay mi navatvat. Net vōyō niqetqet nahap qiyig vitwag. Tō kōyō vatvat vivitwag so dam tatag napnopnog nan, tō kōyō vēhge Ḡod so nivēvēg net mey a nihigap den. Nelegleg en, kē nakavanan vitwag. Nakavanan nivasemlō galsi so net vivitwag so nigaleg nahap, wa nēvēvēg nan nahap. Lōqōn̄ non Mosis, ige a nēqēt mayanag en, kēy mak nakavanan so nimyin̄ kēy qele gēn togtōkē mayap constitution. Lakavanan tam̄ag en, ige Juw mavatvat so dam Nele non Mosis, tō Ḡod mavatvat so etgoy kēy mahē kēy dam galsi. Tō kēy mōliwo Ḡod mi nolol tegtegha. Lakavanan gayaq en, Tigsas mavatvat so nivaēh ige mey nēdēmtig kē.

Nakaka geh van alon en

1:1-4 Ḡod mohole me hiy ige Juw heylō Ēntēn

1:5-14 Tigsas itōk veteg ige in̄sel

2:1-4 Ḡod tēvēvēg ige mey a et yon̄teg te Welan

2:5-9 Ḡod metyak Tigsas so nimyanag goy namyam

2:10-18 Tigsas mēvēhgi et tō so nimyin̄ gēn

3:1-19 Tigsas neketket den Mosis

4:1-13 Nitog higap den navawē non Ḡod

4:14 - 5:10 Tigsas nipris liwo mey a nitiy wē yeh

5:11 - 6:12 Nitog sisgoy den nēdēmtig veg nēk tit van lokse vēhte me

6:13-20 Gēn tēdēmtig vēh navatvat non Ḡod

7:1-18 Tigsas nipris liwo qeleave

8:3-10:18 Nolol non Tigsas so tamgoy nubug en, kē itōk veteg nolol non ige Juw

10:19 Tigsas mal wak namtehal so gēn van sisqet hiy Ḡod

10:26 Nēvēvēg non ige mey a kēy nepsipteg Ēntēn Ḡod

10:31 Tig netnet qele am̄ag so lep nayseyse

11:1-40 ?Nahap Nēdēmtig?

12:1 Ak qele ige tam̄ag mey a mēdēmtig maymay

12:7 Ḡod nivatne nēk qele imam vitwag nivatne ēntēn

12:12 Tēy maymay vēlēs navatvatne mey nēwē

12:18 Am̄ag ige Tisrael tit van sisqet vēhte hiy Ḡod veg kē noyon̄

12:21 Gēn tavan sisqet vēh hiy Ḡod lemyeyen talge

13:1 Nēmētwōn ige non Kraēs

13:6 Matēg ēwē van hiy Tigsas, ba nitog matēg van Lele non ige Juw

13:14 Vēwē wa ōliwo Ḡod heylō namgumgu mey nēwē

14:20 Babah ne tatay

14:22-25 Babah ne hohole