Ḡalasia

Neletes Namun Pol Hiy Ige Taḡalasia

Nēdēmdēm ne hohole m̄ey am̄ag

Nōbōk gōh neletes vitwag a Pol mayap van hiy ige tēlēm̄ yon̄ Ḡalasia. Ḡalasia, kē mahē liwo, tō lepnō nam̄adeg alon en. Net bavanvantēy hal mavan tey neletes vel ēm̄ yon̄ del Ḡalasia.

Pol nēglal galsi ige tēlēm̄ yon̄ anen. Nōbōk a Namgumgu Namun Ige Hal en, kē nihole gatay qeleave Pol mavatēp mahē nan. Nakaka nan kē hagtō van letvēlgi 16 wa 18. Pol kē motog tō van Ḡalasia am̄ag ba veg kē mogom. Gēn et ēglal galsi te so kē mogom bahap, ba wun namtan mehet. Mahē a Pol mogom en, tō kē nihole gatay noyoy ēwē. Ige et mey a mēdēmtig en, Pol mavan me qeleso imam nonoy, kēy ōl so ‘imam yon̄.’ Pol mavatne bah noyoy ēwē en, tō kē nivan yak botoytoy lepnō tegtegha.

Lōbōk gōh en, Pol nihole gatay noyoy ēwē. Ba noyoy ēwē nan nahap? Noyoy ēwē en namtehal mey a Ḡod tavaēh gēn aē. Namtehal nan heylō nohoghog mamah nonon. Pol vap so gēn del et sey te so Ḡod nivaēh gēn, ba Ḡod tavaēh gēn bemgaysēn nonon ēwē. Mahē Ḡod nivaēh net vitwag en, et beyseyse te bemgumgu ēwē a kē mak tō, tateh. Ba Ḡod tavaēh kē veg Ḡod natam kē. Tigsas mahgen mak namtehal a so nivaēh gēn heylō namgumgu nonon ēwē. Meygōh nohoghog mamah nonon. Nēdēmdēm nan Pol ōl so “nasgōp non Ḡod.” Ḡod tavaēh net mey a nēdēmtig kē besgōp.

Ige dēmtig a Ḡalasia, kēy et Juw te. Mahē Pol nivatvatgo kēy veg Kraēs en, kē et vatvatgo te kēy Bele non ige Juw. Tō Pol niōl kēy so ‘ige lolqōn̄.’ Qiyig gēn hole gatay ige lolqōn̄ en, nēdēmdēm nan so ige m̄ey et Krēstēn te. Ba mahē a Pol nihole gatay nohohole nen, kē nihole gatay ige a et Juw te. Tō kē mōl van hiy ige tēlēm̄ yon̄ Ḡalasia so ige lolqōn̄, ba ikēy Nēkrēstēn.

Ige vatgo tegtegha, kēy mavatēp Ḡalasia. Yatkel vatgo itōk, ba yatkel vatgo nehet. Yatkel vatvatgo het mavap van hiy kēy so kēy so dam nēvēnan ige Juw. Kēy mavap so ige lolqōn̄ tit dam vēhte Tigsas so kēy wo et van te me qele ige Juw. Kēy vap so kēy so tep vēglal kēy, wa itōk so kēy dēmlok nōqōn̄ yon̄ non ige Juw.

Ige vatvatgo het en, kēy mohole hethet hiy Pol. Kēy mavap so et hēywē te a so Pol nahal vitwag en. Tō kēy mavap so nohohole nonoy nēdēw veteg nohohole non Pol veg ikēy nage Tejerusalem. Tō kēy mavap so Pol et hole gatay te nēvēnan ige Juw veg kē nemyōs so ige Taḡalasia et buste noyoy ēwē.

Pol kē mayap neletes nan so nivatne ige Taḡalasia boyoy ēwē wa niak m̄ōleg van so nēdēmdēm nan qeleave.