1 Tesalonika

Neletes Namun Pol Mey Am̄ag Hiy Ige Tetesalonika

Nakaka non Ige Tetesalonika Qelegēn

Nayapyap gōh en, neletes vitwag namun Pol. Pol mēvētleg neletes gōh hiy ige Krēstēn n̄a Tesalonika.

Pol ikē nahal. Ḡod mēvētleg kē so nivan tēy Noyoy Ēwē hiy ige lolqōn̄. Pol mavan vētmahē del tiwag mi ige yaplōplōn. Tō kēy motoytoy Noyoy Ēwē. Mahē ige sil moyon̄teg Noyoy Ēwē en, Pol motog tiwag mi kēy natkelgi. Ikēy meqtēg nēm̄ yon̄. Tō Pol mavatne galsi kēy mi nahaphap del. Tō kē metyak ige lililwo so tig helem̄ag nēm̄ yon̄ nen. Mahē kē vētgiy maymay kēy lemgumgu, a kē met so nēm̄ yon̄ nan namaymay en, tō kē nivan vētmahē tegha ēgēn.

Ige Juw a et dēmtig te Noyoy Ēwē en, kēy mololgagay Pol. Tō kēy nemyōs so wuh mat kē. Yatkel mahē kēy dēmdēm so wuh kēy, si so ige Torom so tuwuh kē. Bastō vag m̄adeg Pol nivan yak den ige mey a kēy Nēkrēstēn gayaq tō. Nage gōhkē a mavan yak me den Tesalonika.

Tesalonika en, kē napnō a loprovēns Masedonia. (Qiyig gōh, noprovēns Masedonia tiwag mi noprovēns Akaia en, kēy ōlōl napnō vōyō gōh so Greece.) Tesalonika en, napnō liwo vitwag. Napnō gōh woqse haphap mey nēwē aē, wa ige sil nam̄adeg a nam̄adeg.

Nakaka veg Pol van hiy Tesalonika en, nēk vatah Lemgumgu Namun Ige Hal 17:1-15. Pol midin̄ me napnō nen tiwag mi yoge yaplōplōn, Silas tiwag mi Timoti. Pol mavan tasga lēm̄ tatay non ige Juw, wa kē motoytoy Noyoy Ēwē hiy kēy. Pol kōyō Silas motoytoy en, tō yatkel et mēdēmtig, ba yatkelgi et dēmtig te. Tō Pol motoytoy hiy ige Krik se. Ige Krik m̄adeg mēdēmtig, tiwag yatkel lōqōvēn nonon ige lililwo. Ba ige Juw mey et dēmtig te en, kēy meqneg Pol, tō kēy met hethet kē. Kēy mak nēvēwti liwo vitwag tō kesyak nēvēygēl liwo. Kēy nemyōs so wuh mat Pol, ba ige Krēstēn mēvētleg yak Pol anqōn̄.

Pol mavan lepnō vitwag, sisqet ēwē, a nahan Berea. Pol meqtēg lokse nēm̄ yon̄ vitwag. Ba ige Juw Tetesalonika moyon̄teg en, tō kēy mēvētleg net vivitwag lepnō Berea so niak tōqtōqyeg lokse Pol. Bastō ige tēlēm̄ yon̄ mēvētleg yak kē a lepnō yeh.

Mahē Pol mukēg den Tesalonika en, kē mololwon veg ige tēlēm̄ yon̄ Tesalonika. Ba kē tit van lokse vēhte Tesalonika mahgen. Tō kē dēmdēm so nivētleg Timoti. Tō Timoti mavan lokse Tesalonika so niet so ige Krēstēn qeleave. !Ba nēm̄ yon̄ nitig maymay! Kēy mitig maymay lēdēmtig, tō kēy mak namgumgu mey netgolgol, tō kēy matam lap Pol.

Tō Timoti mavan lok me hiy Pol mi noyoy nan. Pol moyon̄teg noyoy nan en, kē memlaklak a nilwo. Tō Pol mayap neletes gōh hiy nēm̄ yon̄ n̄a Tesalonika.

Lelo leletes gōh, Pol nihole gatay nēsēm. Kē vap so kē et matēg te hiy ige Tesalonika bēsēm (1Th 2:9). Pol mohole gatay nēvēnan ige Tikrik. Lepnō Krik, ige vatvatne nam̄adeg. Kēy vatne kēy lamaket. Kēy mavan letno n̄eyen̄yeg haphap, tō kēy hatig, tō vatne ihēte a nemyōs so yon̄teg. So net wo nemyōs navatvatne nonon en, tō kē mēwēl navatgo nan so van lēm̄ nonon so vatne se kē. Pol en, kē motoytoy letno n̄eyen̄yeg haphap, wa mavatne ige Krēstēn lēm̄ nonoy. Ba Pol et qele te ige vatvatgo nonoy, veg kē et vēvēhge te nēsēm. Pol motoytoy veg Ḡod mēvētleg kē aē batamtam. Pol nitēy nēsēm heylō namtehal tegha. Kē nisusuy natapolēn betvēlgapye beleplep sēm (Acts 18:2-3).

Sōwlē, nēk nētēymat so vatah neletes gōh, tō nēk tēglal vēh nakaka alon en.