1 Pita

Neletes Namun Pita Mey Am̄ag

Nakaka non 1 Pita Qelegēn

Net tin̄qoy non Tigsas Kraēs a mayap neletes gōh nahan Pita. Pita en, ikē nahal mey a Tigsas movon yak kē so nitig helem̄ag nēm̄ yon̄ del.

Pita mayap neletes geh gōh tō mēvētleg walēg nēm̄ yon̄ del. Kē nemyōs so vasusup kēy so tig maymay lēdēmtig nonoy.

Pita mayap neletes geh gōh yakhagyeh hiy ige Krēstēn mey a kēy et age Tujuw te, ba am̄ag kēy ige tog lolqōn̄. Kēy mavan me ige Krēstēn, tō muwulyis den namtevuy mey nehet tam̄ag. Veg kēy mak qelenen, tō ige sil telepnō nonoy mitig het kēy aē. Pita mavahiy kēy so dēmsas nēwē del a Ḡod mavawē kēy aē, tō togtog wa yon̄teg naln̄an Tigsas.

Pita mavap van hiy ige Krēstēn so Ḡod mal ōlōl kēy so kēy nitiy et nonon. Kē mohole gatay ige Krēstēn haytēyēh qele nohohole Nayapyap Tēnēte Labaybol, a Ḡod mohole gatay ige Tujuw. Am̄ag, kē metyak ige Juw so kēy nitiy sil nonon. Togtōkē, Ḡod melep van nēh lap hiy ige Krēstēn. Tō kē mētēymat nayseyse mey nēwē hag lōtōk alge en. Tō lōqōn̄ a Tigsas tavan lokse me en, kēy telep tiwag mi kē nēlēn̄as wa nēdēmap. Ba togtōkē Ḡod mukēg me nememeh so nihlet etgal nēdēmtig nonoy, tō so vasemlō so nēdēmtig nonoy en hēyhēywē.

Pita mavahiy maymay ige Krēstēn so tig netnet ba nitog m̄ōlm̄ōl lok lemtehal het tam̄ag. Pita mavap van hiy kēy so kēy ak tenenen nēmētwuy van lengon ige lolqōn̄ tō so kēy telep kal nahan Ḡod aē. Ḡod nemyōs so ige nonon dēmap ige del, tam ige et non Kraēs, mētēgteg Ḡod, wa dēmap mayanag nonoy. Ba so Ḡod wo mukēg kēy so yon̄ memeh, tiy wē yeh so kēy yon̄ memeh tōtēn namgumgu togolgol den namgumgu mey nehet. Veg Kraēs en, kē net tenenen ba kē moyon̄ memeh veg ige gengenyeg. Wa tō ige Krēstēn so dam namakaliw nonon.