1 Jon

Neletes Namun Jon Mey Am̄ag

Nakaka non 1 Jon Qelegēn

Nahal a mayap neletes gōh ikē Jon, nitin̄qoy non Tigsas. Am̄ag, Jon mayap Noyoy Ēwē veg Tigsas Kraēs. Kē mayap neletes gōh tō mēvētleg walēg lēm̄ yon̄ del.

Lamahē nen navatvatne ne ēm̄ yon̄ mavan me den Tigsas heylō ige hal. Veg nēm̄ yon̄ nam̄adeg en, ige hal mayap neletes wa mēvētleg walēg velvel ēm̄ yon̄. Wa tō kēy mavatne ige vatvatgo yatkelgi so vētleg walēg kēy van hiy ige lēm̄ yon̄ tegtegha.

Mahē navatgo vitwag nivan din̄ me lēm̄ yon̄ vitwag en, tō kē nitog tiwag mi net tēlēm̄ yon̄ anen. Tō kē nitog tiwag mi kēy wa nivatvatne kēy. Me atgiy en, kē niukēg mahē nen, tō nivan vatvatne lēm̄ yon̄ tegtegha se.

Jon mēvētleg neletes gōh veg nēdēmdēm vitwag bēm̄ yon̄. Yatkel vatvatgo muwulyis den Ḡod. Tō kēy mak negengenyeg van lēh nonoy. Tō kēy mavatne ige sil lavatvatne mey nehet. Navatne het nonoy en so Kraēs et net te, si Tigsas et Kraēs te. Wa kēy magalgal se so negengenyeg tit vēlwoy vēhte gēn den Ḡod.

Jon mēvētleg neletes gōh hiy vel ēm̄ yon̄ so tigoy navatvatne het nan, wa nivasemlō tenenen navatvatne den Ḡod bemtehal ne gengenyeg. Jon mayap so gēn tēy maymay navatvatne non Tigsas. Igēn so dam namtevōn Ḡod ēwē. Ḡod et ak te namtevōn ne gengenyeg, wa tateh su mēlēmlēg hōnqal mi kē. Gēn se so haytēyēh qele ikē. Tō vel mahē a gēn et vēglal so gēn misisgoy lokse lubug en, gēn so van yak den negengenyeg. Wa gēn so tam ige yathēthēngēn a kēy nadam Kraēs.

Naln̄an Jon veg ige vatvatgo nongēn qelegēn. Gēn so etet galgalsi hiy kēy del, so kēy itōk si nehet. Sowo navatgo niakak namtevu gengenyeg vel qōn̄, gēn tet vēglal so kē et net hēywē non Ḡod te. Wa sowo navatgo et vatne tenenen te so Tigsas Kraēs qeleave, tō gēn tet vēglal so kē et net non Ḡod te. Jon mavap so navatgo qelenen en, kē natvale non Ḡod ēwē. Navatgo qelenen en, nitog nowmat so ukēg kē nivatne lēm̄ yon̄, wa nitog nowmat so kokm̄egoy kē hay lēm̄ nongēn.