ପାର୍ମେଶ୍ୱାର୍ଆଃ ଜୀନିଦ୍ ବାଚାନ୍
୨ ଥେସ୍ଲନିକା 3
ଆଲେ ନାଗେନ୍ତେ ବିନ୍ତିପେ
ହେ ହାଗା ମିଶିକ ଟୁଣ୍ଡୁରେ ଆଲେ ନାଙ୍ଗ୍ ବିନ୍ତିପେ, ପ୍ରାଭୁଆଃ କାଜି ଆପେତାଃରେ ନିତିର୍ୟାନ୍1 ଲେକାଗି ଏନା ଚାରିୟସାଃରେ ନିତିର୍କେଦ୍ତେ ମାନାରାଙ୍ଗ୍ ହବାଅଃକା । ଆଡଃଗି ବିନ୍ତିପେ, ପାର୍ମେଶ୍ୱାର୍ ଆଲେକେ ଏତ୍କାନାଃଏତେ ଆଡଃ ଏତ୍କାନ୍ ହଡ଼କତାଃଏତେ ବାଞ୍ଚାଅଲେକାଏ, ଚିୟାଃଚି ସବେନ୍କ ସୁକୁକାଜିରେ ବିଶ୍ୱାସୀ ନାହାଁଲାକ ।
ମେନ୍ଦ ପ୍ରାଭୁ ପାତିୟାର୍ରଃନିଃ ତାନିଃ, ଆଡଃ ଇନିଃ ପେଡ଼େଃ ଏମାପେୟାଏ, ଏନ୍ତେ ଏତ୍କାନ୍ ହଡ଼ଏତେ ବାଞ୍ଚାଅପେୟା । ଆଡଃ ଆଲେ ଆପେକେ ଆଚୁକାଦ୍ପେତେୟାଃ ସବେନାଃପେ କାମିତାନା ଆଡଃ କାମିୟାପେ, ମେନ୍ତେ ଆଲେ ପାର୍ମେଶ୍ୱାର୍ତାଃରେ ଆପେୟାଃ ବିଷାଏରେ ପୁରାଃ ବିଶ୍ୱାସ୍ ମେନାଃ ।
ପ୍ରାଭୁ ଆପେୟାଃ ମନ୍ସୁରୁଦ୍ରେ ପାର୍ମେଶ୍ୱାର୍ଆଃ ଦୁଲାଡ଼୍ ଆଡଃ ଖ୍ରୀଷ୍ଟ୍ ଏମାକାଦ୍ ସାହାତିଙ୍ଗ୍ୟେଁ ଲେକାନ୍ ହରାରେ ସୁତୁଃ ଇଦିପେକା ।
ସବେନ୍ କାମି ରିକା ଲାଗାତିଙ୍ଗ୍ୟାଁଃ
ହେ ହାଗା ମିଶିକ, ଆଲେ ପ୍ରାଭୁ ୟୀଶୁ ଖ୍ରୀଷ୍ଟ୍ଆଃ ନୁତୁମ୍ତେ ଆଚୁପେ ତାନାଲେ, ଜେତାଏ ହାଗା, ଆଲେତାଃଏତେ ନାମାକାଦ୍ ଇନିତୁଲେକା କା ସେସେନ୍କେଦ୍ତେ ଆଲ୍ସି ଜୀଦାନ୍ ବିତାଅତାନ୍ରେଦ, ଇନିଃତାଃଏତେ ସାଙ୍ଗିନ୍ରେ ତାଇନ୍ପେ । ଆପେଦ ଚିଲ୍କାତେ ଆଲେକେ ଅତଙ୍ଗ୍ ଲାଗାତିଙ୍ଗ୍ୟାଁଃ ଏନା ବୁଗିଲେକାପେ ଇତୁକାନା, ଆଲେଦ ଆପେଲଃ ତାଇକେନ୍ ଇମ୍ତା ଆଲ୍ସି କାଲେ ତାଇକେନା । ଆଡଃ ବେଗାର୍ ଗନଙ୍ଗ୍ତେ ଜେତାଏତାଃରେ କାଲେ ଜମ୍ ତାଇକେନା, ମେନ୍ଦ ଆପେତାଃଏତେ ଜେତାଏୟାଃ ବାହାରମ୍ ଲେକା ଆଲକାଲେ ଲାଦିୟଃ ମେନ୍ତେ ଦୁକୁ ସାହାତିଙ୍ଗ୍ତାନ୍ଲଃ ନିଦା ସିଙ୍ଗି ପୁରାଃ କେଟେଦ୍ କାମିଲେ କାମି ତାଇକେନା । ଆପେତାଃଏତେ ଜେତ୍ନାଃ ନାମେ ନାଗେନ୍ତେ ଆଲେୟାଃ ଆକ୍ତେୟାର୍ ବାନଃଆ ମେନ୍ତେଦ କା, ମେନ୍ଦ ଆପେ ଆଲେକେ ଅତଙ୍ଗ୍ଲେପେ ମେନ୍ତେ, ଆଲେ ଆପେତାଃରେ ନାମୁନା ଲେକା ବାଇୟେନ୍ ନାଗେନ୍ତେଲେ ରିକାକେଦା । ଚିୟାଃଚି ଆଲେ ଆପେଲଃ ତାଇକେନ୍ ଇମ୍ତାଗି ଆପେକେ ନେଆଁଁ ଆଚୁକାଦ୍ପେ ତାଇକେନାଲେ, ଜେତାଏ କା କାମି ସାନାଙ୍ଗ୍ତାନ୍ନିଃ ଆଲକାଏ ଜମେକା ।
ଆଲେ ଆପେକେ ନେଆଁଁ କାଜିପେତାନାଲେ, ଚିୟାଃଚି ଆପେ ଥାଲାରେ ଚିମିନ୍ ହଡ଼କ ଆଲ୍ସି ଜୀଦାନ୍ ବିତାଅତାନ୍ଲଃ ଏଟାଃକଆଃ କାମିରେ ଥାଲା ଥାଲାଅଃତାନାକ ଆଡଃ ଜେତ୍ନାଃ କାକ କାମିତାନା, ମେନ୍ତେଲେ ଆୟୁମେତାନା । ଏନ୍ ଲେକାନ୍ ହଡ଼କକେ ପ୍ରାଭୁ ୟୀଶୁ ଖ୍ରୀଷ୍ଟ୍ଆଃ ନୁତୁମ୍ତେ ଚେତାଅକେଦ୍ତେଲେ ଆଚୁକତାନା, ଇନ୍କୁ ଆକଆଃ ଜୀଦାନ୍ରେ ସୁକୁରେ ତାଇନ୍କେଦ୍ତେ ଆକଆଃ ଜମେନାଙ୍ଗ୍କ କାମିକା ।
ମେନ୍ଦ ହେ ହାଗା ମିଶିକ, ବୁଗିନ୍ କାମିରେ ଆଲ୍ପେ ଲାଗାଅଃଆ । ଆଡଃ ଆଲେ କୁଲାକାଦ୍ ନେ ଚିଠିରେୟାଃ କାଜି କା ମାନାତିଙ୍ଗ୍ତାନ୍କକେ ନେଲ୍ ଉରୁମାକାକପେ, ଆଡଃ ଇନ୍କୁ ଗିହୁଗଃକାକ ମେନ୍ତେ ଆପେ ଇନ୍କୁଲଃ ଆଲ୍ପେ ମେସାନା । ମେନ୍ଦ ଇନ୍କୁକେ ବାଇରି ଲେକା କା ନେଲ୍କେଦ୍ତେ ଖ୍ରୀଷ୍ଟ୍ ବିଶ୍ୱାସୀ ହାଗାଲେକା ମନେତାନ୍ଲଃ ଚେତାଅକପେ ।
ଟୁଣ୍ଡୁ କାଜି
ଅକନ୍ ପ୍ରାଭୁ ଆବୁଆଃ ଜୀଉସୁକୁ ଏମଃନିଃ ତାନିଃ, ଇନିଃ ଆପେକେ ସବେନ୍ ଇମ୍ତା ଆଡଃ ସବେନ୍ ଲେକାତେ ଜୀଉସୁକୁ ଏମାପେକାଏ । ପ୍ରାଭୁ ଆପେ ସବେନ୍କଲଃ ହବାଅଃକା ।
ଆଇଙ୍ଗ୍ ପାଉଲୁସ୍, ତିଃଇ ତାଇୟାଁଃତେ ଅଲ୍କେଦ୍ତେଇଙ୍ଗ୍ ଜହାର୍ପେତାନା, ନେ ଲେକାଗି ସବେନ୍ ଚିଠିକରେ ଚିହ୍ନାଁ ଲେକାଇଙ୍ଗ୍ ଅଲେତାନା ।
ଆବୁଆଃ ପ୍ରାଭୁ ୟୀଶୁ ଖ୍ରୀଷ୍ଟ୍ଆଃ ସାୟାଦ୍ ଆପେ ସବେନ୍କଲଃ ହବାଅଃକା ।
Source notes (1)
- Footnote ପାସ୍ରାଅ
ପାର୍ମେଶ୍ୱାର୍ଆଃ ଜୀନିଦ୍ ବାଚାନ୍. Copyright © 2020 The Word for the World International. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.