Munda Bible
ନିହିମିୟା 4
ଆଡଃମିସା ବାଇରୁହାଡ଼୍ କାମିରେ କାଜିକଟଙ୍ଗ୍
ଆଲେ ଯିହୁଦୀ ହଡ଼କଆଃ ପାଚ୍ରି ବାଇରୁହାଡ଼େ ତାନାଲେ ମେନ୍ତେ ସନ୍ବଲ୍ଲଟ୍ ଆୟୁମ୍କେଦ୍ଚି ଖିସ୍ୟାନାଏ ଓଡ଼ୋଃ ଆଲେକେ ଲାନ୍ଦାକେଦ୍ଲେୟା।
ଓଡ଼ୋଃ ଇନିଃ ଆୟାଃ ହାଗାକଆଃ ଓଡ଼ୋଃ ଶାମରିୟା ସିପାଇକଆଃ ଆୟାର୍ରେ କାଜିକେଦା, “ନେ ନାରାଦୁରା ଯିହୁଦୀ ହଡ଼କ ଚିନାଃ ଚିକାତାନାକ ? ଇନ୍କୁ ଚିନାଃ ପାଚ୍ରି ଆଡଃମିସା ବାଇରୁହାଡ଼୍ ଦାଡ଼ିୟାକ ? ଇନ୍କୁ ଚିନାଃ ଦାଣେଁରାକାବ୍ ଦାଡ଼ିୟାକ ? ଇନ୍କୁ ଚିନାଃ ମୁସିଙ୍ଗ୍ରେ କାମି ଚାବା ଦାଡ଼ିୟାକ ? ଇନ୍କୁ ଚିନାଃ ହାଦୁଡ଼ାକାନ୍ ଢିପୁଏତେ ଦିରି ଅଡଙ୍ଗ୍କେଦ୍ତେ ବାଇ ଦାଡ଼ିୟାକ ?”
ଇମ୍ତା ଅମ୍ମୋନିୟରେନ୍ ଟୋବିୟ ଇନିଃତାଃରେ ତାଇକେନା, ଓଡ଼ୋଃ ଇନିଃ କାଜିକେଦାଏ, “ଇନ୍କୁ ଅକ ଦିରିରାଃ ପାଚ୍ରି ବାଇତାନାକ, ଏନ୍ ଚେତାନ୍ରେ ମିଆଁଦ୍ ତୁୟୁ ରାକାବ୍କେନଃରେ ହାଦୁଡ଼୍କେନଃଆ।”
ଆଇଙ୍ଗ୍ ବିନ୍ତିକେଦାଇଙ୍ଗ୍, “ହେ ଆଲେୟାଃ ପାର୍ମେଶ୍ୱାର୍, ଆଲେୟାଃ ବିନ୍ତି ଆୟୁମେମେ, ଚିଆଃଚି ଆଲେକେ ଲାନ୍ଦାଲେତାନାକ। ଇନ୍କୁଆଃ ହିଁଣି ଆକଆଃ ବହଃରେଗି ଉୟୁଗଃକା। ଇନ୍କୁକେ ରେଃକ୍ ଓଡ଼ୋଃ ତଲ୍ ଇଦିକେଦ୍ତେ ଏଟାଃ ଦିଶୁମ୍ରେ ଜିମାକମ୍। ଇନ୍କୁଆଃ ଗୁହ୍ନାଁ ଆଲମ୍ ଦାନାଙ୍ଗ୍ୟେଁଆ ଓଡ଼ୋଃ ପାପ୍ ତାକଆଃ ଆଲମ୍ ଛାମାକଆ, ଚିଆଃଚି ଇନ୍କୁ ପାଚ୍ରି ବାଇତାନ୍ ହଡ଼କକେ ଲାନ୍ଦାକତାନ୍ ହରାତେ ଆମ୍କେ ଖିସ୍ ଇଚିକାଦ୍ମାକ।”
ନେ'ଲେକାତେ ଆଲେ ପାଚ୍ରି ବାଇକେଦାଲେ ଓଡ଼ୋଃ ଏନାରେୟାଃ ସାଲାଙ୍ଗିରାଃ ଆଧା ଜାକେଦ୍ ଉଠାଅକେଦ୍ତେ ସବେନ୍ସାଃ ଜଡ଼େଇ ପୁରାୟାନା। ଚିଆଃଚି ହଡ଼କ ପୁରାଃ ଚିହୁଲ୍ତେ କାମି ତାଇକେନାକ।
ମେନ୍ଦ ଯୀରୁଶାଲେମ୍ରାଃ ପାଚ୍ରି କାମି, ଆୟାର୍ତେ କାମି ଇଦିୟଃତାନା ଓଡ଼ୋଃ ହାଦୁଡ଼୍କାନ୍ତାଃ ତେପେଦ୍ ଇଦିୟଃତାନା ମେନ୍ତେ ସନ୍ବଲ୍ଲଟ୍ ଓଡ଼ୋଃ ଟୋବିୟ ଏନ୍ତେ ଆରବ୍ରେନ୍, ଅମ୍ମୋନିୟ ଓଡ଼ୋଃ ଅସ୍ଦିଦିୟ ହଡ଼କ ଆୟୁମ୍କେଦ୍ତେ ପୁରାଃଗି ଖିସ୍ୟାନାକ। ଇନ୍କୁ ଯୀରୁଶାଲେମ୍ ବିରୁଧ୍ରେ ଲାଡ଼ାଇ ନାଙ୍ଗ୍ ଓଡ଼ୋଃ ଏନ୍ତାଃରେ ହାଲାଗୁଲା ରିକାଏ ନାଙ୍ଗ୍ ଆକଆଃ ଆକଆଃ ଥାଲାରେ ରଜୋଟକେଦାକ।
ମେନ୍ଦ ଆଲେ ଆଲେୟାଃ ପାର୍ମେଶ୍ୱାର୍ତାଃରେ ବିନ୍ତିକେଦାଲେ ଓଡ଼ୋଃ ଇନ୍କୁଆଃ ବିରୁଧ୍ରାଃ ସାମ୍ନାଙ୍ଗ୍ ରିକା ନାଙ୍ଗ୍ ନିଦାସିଙ୍ଗି ହର ନାଗେନ୍ତେ ଦହକେଦ୍କଆଲେ।
ଇମ୍ତା ଯିହୁଦାରେନ୍ ହଡ଼କ କାଜିକେଦାକ, “କାମିହଡ଼କଆଃ ପେଡ଼େଃ ବାନଃଆ ଲାଗା ଚାବାୟାନ୍ଗିୟାକ, ଓଡ଼ୋଃ ହାଦୁଡ଼ାକାନ୍ ପାଚ୍ରି ମେନାଃ, ଆଲେ ପାଚ୍ରି କାଲେ ବାଇ ଦାଡ଼ିତାନା।”
ଆଲେୟା ବାଇରିକ କାଜିକେଦାକ, “ଇନ୍କୁ ଆବୁକେ ନେଲ୍ ସିଦାରେ ଚାଏ ସାରି ସିଦାରେ ଆବୁ ଇନ୍କୁତାଃ ସେନ୍କେଦ୍ତେ ଗଏଃକଆବୁ ଓଡ଼ୋଃ କାମି ରୋକାଏୟାବୁ।” ଇନ୍କୁଆଃ ହେପାଦ୍କରେ ତାଇନ୍ତାନ୍ ଯିହୁଦୀ ହଡ଼କ ହିଜୁଃକେଦ୍ତେ ଆଲେକେ ଗେଲେୟା ଧାଅଁ କାଜିକେଦ୍ଲେୟାକ, “ଆପେକେ ଆଲେତାଃ ରୁହାଡ଼୍ ହିଜୁଃଗି ଲାଗାତିୟାଃଁ।” ଏନାମେନ୍ତେ ଆଇଙ୍ଗ୍ ପାଚ୍ରି ତାୟମ୍ସାଃରାଃ ଲାତାର୍ରେ ଓଡ଼ୋଃ ସାମାନ୍ ପିଡ଼ିରେ ହଡ଼କଆଃ କିଲି ଲେକାତେ ହର ହଡ଼ ସାଲାକେଦ୍କଆଇଙ୍ଗ୍। ଇନ୍କୁ ତାରାଉଡ଼ି, ବାର୍ଛା ଓଡ଼ୋଃ ଧାନୁ ସାବ୍କେଦ୍ତେ ହରକେଦାକ।
ଏନ୍ତେ ଆଇଙ୍ଗ୍ ନେଲ୍କେଦାଇଙ୍ଗ୍ ଓଡ଼ୋଃ ବିରିଦ୍କେଦ୍ତେ ଇନ୍କୁଆଃ ଆଗୁଆଇକକେ, ହାକିମ୍କକେ ଓଡ଼ୋଃ ଏଟାଃ ହଡ଼କକେ କାଜିକେଦ୍କଆଇଙ୍ଗ୍, “ଇନ୍କୁକେ ଆଲପେ ବରକଆ। ପ୍ରାଭୁ ମାରାଙ୍ଗ୍ ଓଡ଼ୋଃ ବରୱାନ୍ନିଃ ତାନିଃ, ଏନା ପାହାମେପେ। ଆପେୟାଃ ହାଗାକ, ହନ୍ଗାଁଣା, କୁଡ଼ିକ ଓଡ଼ୋଃ ଅଡ଼ାଃ ନାଗେନ୍ତେ ଲାଡ଼ାଇପେ।”
ପାଚ୍ରି କାମି ଆଡଃମିସା ଏନେଟେଦ୍
ଆଲେ ଇନ୍କୁଆଃ ରଜୋଟ ସାରିକେଦାଲେ ଓଡ଼ୋଃ ପାର୍ମେଶ୍ୱାର୍ ଇନ୍କୁଆଃ ରଜୋଟ କାଏ ପୁରା ଇଚିତାନା ମେନ୍ତେ ଇନ୍କୁ ଆୟୁମ୍କେଦ୍ଚି, ଆଲେ ସବେନ୍କ ପାଚ୍ରିରାଃ କାମି ରିକା ନାଗେନ୍ତେ ରୁହାଡ଼୍ୟାନାଲେ।
ଏନ୍ ହୁଲାଙ୍ଗ୍ତାଃଏତେ ଆଇଁୟାଃ ଆଧା ହଡ଼କ କାମିକେଦାକ ଓଡ଼ୋଃ ଏଟାଃ ଆଧା ହଡ଼କ ବାର୍ଛା, ଢାଲ୍, ଧାନୁ ଓଡ଼ୋଃ ଲାଡ଼ାଇତେୟାଃ ତୁସିଙ୍ଗ୍କେଦ୍ତେ ହରକେଦାକ। ପାଚ୍ରିରାଃ କାମିତାନ୍ ଯିହୁଦାରେନ୍ ହଡ଼କଆଃ ଦୟାସାଃରେ ଆଗୁଆଇକ ତାଇକେଦ୍ତେ ଦେଙ୍ଗାକେଦ୍କଆକ। ପାଚ୍ରି ବାଇତାନ୍ ଓଡ଼ୋଃ ହାମ୍ବାଲ୍ତେୟାଃ ଗଅଃକାଦ୍ ମିପିହୁଡ଼୍ ସବେନ୍କ ମିଆଁଦ୍ ତିଃଇଲଃ କାମିକେଦାକ ଓଡ଼ୋଃ ମିଆଁଦ୍ ତିଃଇରେ ହାଁତେୟାର୍ ସାବ୍କେଦାକ। କାମିତାନ୍ ମିପିହୁଡ଼୍ ସବେନ୍କ ଆକଆଃ ମାୟାଙ୍ଗ୍ରେ ତାରାଉଡ଼ି ତଲ୍କେଦ୍ତେ କାମିକେଦାକ। ମେନ୍ଦ ଚିର୍ଗାଲ୍ ରିକାଃଅ ବିଙ୍ଗୁଲ୍ ସାଡ଼ି ହଡ଼ ଆଇଁୟାଃଲଃ ତାଇୟାନାଏ। ଏନ୍ତେ ଆଇଙ୍ଗ୍ ଆଗୁଆଇ, ହାକିମ୍ ଓଡ଼ୋଃ ଏଟାଃ ହଡ଼କକେ କାଜିକେଦ୍କଆଇଙ୍ଗ୍, “ନେ କାମି ଜିଲିଙ୍ଗ୍ ଚାକାର୍ ମେନାଃ ଓଡ଼ୋଃ ଆବୁ ପାଚ୍ରି ଚେତାନ୍ରେ ମିହୁଡ଼୍ ଆଡଃମିହୁଡ଼୍ତାଃଏତେ ସାଙ୍ଗିନ୍ରେ ତାଇନଃ ତାନାବୁ, ଏନାତେ ଜେତା ଠାୟାଦ୍ରେ ବିଙ୍ଗୁଲ୍ରାଃ ସାଡ଼ି ଆୟୁମ୍ୟାନ୍ଚି ଆପେ ଆଲେତାଃ ହିଜୁଃପେ, ଆବୁଆଃ ପାର୍ମେଶ୍ୱାର୍ ଆବୁଆଃସାଃଏତେ ଲାଡ଼ାଇୟା।” ନେ'ଲେକାତେ ଆଲେ ସେତାଃଏତେ ନୁବାଃ ଇପିଲ୍କ ନେଲଃ ଜାକେଦ୍ ଏନ୍ କାମି ରିକାକେଦାଲେ, ଆଲେୟାଃ ଆଧା ହଡ଼କ କାମିକେଦାକ ଓଡ଼ୋଃ ଆଧା ହଡ଼କ ବାର୍ଛା ସାବ୍କେଦ୍ତେ ହରକେଦାକ।
ଇମ୍ତା ଆଇଙ୍ଗ୍ ହଡ଼କକେ ନେଆଁ ହଗି କାଜିକେଦ୍କଆଇଙ୍ଗ୍, “ମିପିହୁଡ଼୍ ସବେନ୍ ହଡ଼କ ନୁବାଃ ଇମ୍ତା ଆପ୍ନାଃ ଆପ୍ନାଃ ଦେଙ୍ଗାତାନ୍ ହଡ଼କଲଃ ଯୀରୁଶାଲେମ୍ ଭିତାର୍ରେ ତାଇନ୍କାକ, ଏନା ହରାତେ ଇନ୍କୁ ନୁବାଃ ଇମ୍ତା ଆବୁକେ ହରବୁଆକ ଓଡ଼ୋଃ ସିଙ୍ଗି ଇମ୍ତା କାମି ରିକା ଦାଡ଼ିୟାକ।” ଆବୁକଏତେ ଜେତାଏ ହଗି, ଆଇଙ୍ଗ୍ ଚାଏ ଆଇଁୟାଃ ହାଗାକ ଚାଏ ଆଇଁୟାଃ ହଡ଼କ ଓଡ଼ୋଃ ହର ହଡ଼କ ନୁବାଃ ଇମ୍ତା ଲିଜାଃ କାଲେ ବାଦ୍ଲାଅ ଦାଡ଼ିୟାନା, ଦାଆଃ ନାଗେନ୍ତେ ସେନ୍ ତାଇକେନାଲେ ଇମ୍ତା ହଗି ହାଁତେୟାର୍ ସାବ୍କେଦ୍ତେ ସେନ୍ ତାଇକେନାଲେ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.