Munda Bible
ଯିଶାୟ 3
ଯିହୁଦା ଓଡ଼ୋଃ ଯୀରୁଶାଲେମ୍ରାଃ ସାଜାଇ
ନେଲେପେ, ପ୍ରାଭୁ ପେଡ଼େୟାନ୍ ପ୍ରାଭୁ ପାର୍ମେଶ୍ୱାର୍ ଯିହୁଦା ଓଡ଼ୋଃ ଯୀରୁଶାଲେମ୍ ତାଃଏତେ ଆସ୍ରା ରିକାତାନ୍ ସବେନ୍ ଜଜମାଃ, ଦାଆଃ ଓଡ଼ୋଃ ଦେଙ୍ଗାତେୟାଃ ସାଙ୍ଗିନ୍ ରିକାୟା। ସୁର୍ବିର୍, ପାଲ୍ଟାନ୍କ, ବିଚାର୍କ, ନାବୀକ, ଆୟାର୍କାଜି ଉଦୁବ୍କ, ଓଡ଼ୋଃ ପ୍ରାଚିନ୍କ, ବାର୍ ହିସି ଗେଲ୍ ମୁଖିଆକଆଃ ଆଗୁଆଇକ ଓଡ଼ୋଃ ମାପ୍ରାଙ୍ଗ୍ ହଡ଼କ, ସେଣାଁ ଉଦୁବ୍କ, ବୁଗିନ୍ ବାବାଇକ ଓଡ଼ୋଃ ଯାଦୁଟଣାକ ସାଙ୍ଗିନଃଆ। ଆଇଙ୍ଗ୍ ସେପେଡ଼େଦ୍କକେ ଇନ୍କୁଆଃ ଆଗୁଆଇ ବାଇକୱାଇଙ୍ଗ୍ ଓଡ଼ୋଃ ହନ୍କ ଇନ୍କୁଆଃ ଚେତାନ୍ରେ ହୁକୁମ୍ ରିକାଏୟାକ। ହଡ଼କ ଆପାନ୍ ଆପାନ୍ ଚେତାନ୍ରେ ହାନି ରିକାଏୟାକ, ମିହୁଡ଼୍ ଆଡଃମିହୁଡ଼୍ରାଃ ବିରୁଧ୍ରେ, ହପୋର୍ଜାପାଃ ବିରୁଧ୍ରେ ହପୋର୍ଜାପାଃରେନ୍କ, ପୁର୍ଖା ହାଡ଼ାମ୍ ହଡ଼କଆଃ ବିରୁଧ୍ରେ ସେପେଡ଼େଦ୍କ ଓଡ଼ୋଃ ମାଇନାନ୍ ହଡ଼କଆଃ ବିରୁଧ୍ରେ ଏତ୍କାନ୍ ହଡ଼କ ବିରିଦା।
ଏନ୍ ଦିପିଲିରେ ଚିମିନ୍ ହଡ଼କ ଆପାନ୍ ଅଡ଼ାଃରେନ୍ ହାଗାକଏତେ ମିହୁଡ଼୍କେ ସାବ୍କେଦ୍ଲଃ କାଜିୟାକ, “ଆମାଃତାଃରେ ଲିଜାଃ ମେନାଃ, ଆମ୍ ଆଲେୟାଃ ଆଗୁଆଇ ବାଇୟଃମେଁ ଓଡ଼ୋଃ ନେ ଛିତିବିତି ହାଦୁଡ଼୍ କାନ୍ ରାଇଜ୍ରାଃ ଆକ୍ତେୟାର୍ ଆମାଃ ତିଃଇରେ ଇଦିମେ।”
ମେନ୍ଦ ଇନିଃ ଏନ୍ ହୁଲାଙ୍ଗ୍ କାଜିୟାଏ, “କାହାଗି, ଆଇଙ୍ଗ୍ ଆମ୍କେ ଦେଙ୍ଗା କାଇଙ୍ଗ୍ ଦାଡ଼ିୟା। ଆଇଁୟାଃ ଅଡ଼ାଃରେ ଜଜମାଃ ଚାଏ ଲିଜାଃ ବାନଃଆ। ଆଇଙ୍ଗ୍କେ ନେ ହଡ଼କଆଃ ଆଗୁଆଇ ଆଲପେ ରିକାଇଙ୍ଗ୍ୟାଁ।”
ଯୀରୁଶାଲେମ୍ ଛିତିବିତିକାନା ଓଡ଼ୋଃ ଯିହୁଦା ହାଦୁଡ଼୍କାନା। ଚିୟାଃଚି ଏନ୍ ହଡ଼କ ପ୍ରାଭୁଆଃ ମାନାରାଙ୍ଗ୍ତେ ପେରେଜାକାନ୍ ମେଦ୍ ବିରୁଧ୍ରେ କାଜିକ କାଜିୟାକାଦା ଓଡ଼ୋଃ କାମିକ ରିକାକାଦା। ଇନ୍କୁ ଇନିୟାଃ ମାନାରାଙ୍ଗ୍ ରେୟାଃ ଠାୟାଦ୍କେ କାକ ଆଟ୍କାର୍ଉରୁମ୍କେଦା। ଇନ୍କୁଆଃ ମଚାତେ ଜାଗାର୍ତାନ୍ କାଜିକ ଇନ୍କୁଆଃ ବିରୁଧ୍ରେ ଗାୱାଇ ଏମେତାନା। ସଦୋମ୍ ନାଗାର୍ରେନ୍ ହଡ଼କ ଲେକା ଇନ୍କୁ ପାପ୍କାମିକ ରିକାତାନା, ଏନାକେ ଇନ୍କୁ କାକ ଦାନାଙ୍ଗ୍ ତାନା। ଇନ୍କୁ ସାର୍ପାଅ କାନାକ। ଚିଆଃଚି ଇନ୍କୁ ଆପ୍ନାଃ ଚେତାନ୍ତେ ଆକଗି ନକ୍ସାନ୍ ଆଉୱାକାଦାକ।
ଧାର୍ମାନ୍ ହଡ଼କକେ କାଜିକମେ, ଇନ୍କୁଆଃ ବୁଗିନାଃ ହବାଅଃଆ, ଚିୟାଃଚି ଇନ୍କୁ ଆକଆଃ ଆପ୍ନାଃ କାମିରାଃ ନାଲାରେ ରାସ୍କାଅଃଆକ। କା ଧାର୍ମାନ୍ ହଡ଼କଆଃ ନାଙ୍ଗ୍ ଚିମିନ୍ ବରୱାନ୍ଗି ହବାଅଃଆ, ଇନ୍କୁଆଃ ଚେତାନ୍ରେ ଏତ୍କାନାଃ ହବାଅଃଆ। ଇନ୍କୁ ଆକଆଃ ଏତ୍କାନ୍ କାମିରାଃ ନାଲା ନାମେୟାଁକ।
ସେପେଡ଼େଦ୍କ ଆଇଁୟାଃ ହଡ଼କଆଃ ଚେତାନ୍ରେ କା ଲାଗାତିଙ୍ଗ୍ କାମି ରିକାଃକ, କୁଡ଼ିକ ଇନ୍କୁଆଃ ଚେତାନ୍ରେ ରାଇଜ୍ ରିକାଃକ।
ହେ ଆଇଁୟାଃ ହଡ଼କ, ଆପେୟାଃ ହରା ଉନୁଦୁବ୍ ହଡ଼କ ଆପେକେ କା ଠାଉକା ହରାତେ ଇଦିୟାଃକ ଓଡ଼ୋଃ ଆପେୟାଃ ସେସେନ୍ ହରା ଏତ୍କାନ୍ ରିକାଃକ।
ପ୍ରାଭୁ ଆୟାଃ ହଡ଼କଆଃ ବିଚାର୍ନିଃ
ପ୍ରାଭୁ ହଡ଼କଆଃ ବିଚାର୍ ରିକା ନାଗେନ୍ତେ ସେକାଡ଼େନ୍ତାନା ଓଡ଼ୋଃ ନ୍ୟାୟ ରିକା ନାଗେନ୍ତେ ରାଜ୍ଗାଦିରେ ଦୁବ୍ୟାନା। ପ୍ରାଭୁ ଆୟାଃ ହଡ଼କଆଃ ପ୍ରାଚିନ୍ ଆଗୁଆଇ ଓଡ଼ୋଃ ମୁଖିଆକଆଃ ବିଚାର୍ ରିକାଃଏ ଓଡ଼ୋଃ କାଜିୟାଃଏ, “ଆପେଗି ଆଇଁୟାଃ ଦାଖ୍ବାକ୍ଡ଼ି ଛିତିବିତି ରିକାକାଦାପେ ଓଡ଼ୋଃ ନାରାଦୁରା ହଡ଼କତାଃଏତେ ରେଃକ୍କାଦ୍ ଜିନିଷ୍କ ଆପେୟାଃ ଅଡ଼ାଃକରେ ଦହକାଦାପେ।” ସବେନାଃତେ ପେଡ଼େୟାନ୍ ପ୍ରାଭୁ କାଜିତାନାଏ, “ଆପେ ଆଇଁୟାଃ ହଡ଼କକେ କାଟା ଲାତାର୍ରେ ତିକାକ ତାନାପେ ଓଡ଼ୋଃ ନାରାଦୁରା ହଡ଼କଆଃ ମଚା ରେତାକ ତାନାପେ, ନେଆଁରାଃ ମୁଣ୍ଡି ଚିନାଃ ତାନାଃ ?”
ଯୀରୁଶାଲେମ୍ରେନ୍ କୁଡ଼ିକକେ ଚିର୍ଗାଲ୍
ପ୍ରାଭୁ କାଜିତାନାଏ, “ସିୟୋନ୍ରେନ୍ କୁଡ଼ିକ ଚିମିନ୍ ଘାମାଣ୍ଡ୍ ରିକାତାନାକ ! ଇନ୍କୁ ଆକଆଃ ବହଃ ଓଡ଼ୋଃ ହଟଃ ଜିଲିଙ୍ଗ୍କେଦ୍ଲଃ ମେଦ୍ ନେତେହାନ୍ତେ ନେଲ୍କେଦ୍ତେ ସେସେନ୍ ତାନାକ। ସେସେନ୍ ଇମ୍ତା ଆକଆଃ କାଟାରାଃ ଗୁଗୁରା1 ଛୁନୁର୍ ଛୁନୁର୍ ସାଡ଼ିତାନ୍ଲଃ, ବାଇବାଇତେ ହୁପ୍ଡିଙ୍ଗ୍ ଚାଣ୍ଡାଙ୍ଗ୍ତାନ୍ଲଃ ସେସେନ୍ ତାନାକ। ଏନାମେନ୍ତେ ପ୍ରାଭୁ ସିୟୋନ୍ରେନ୍ କୁଡ଼ିକଆଃ ବହଃ ଘାଅତେ ପେରେଜେୟା, ଓଡ଼ୋଃ ଇନ୍କୁଆଃ ବହଃରେ ଉବ୍ କାଏ ଦହୟା।”
ଏନ୍ ହୁଲାଙ୍ଗ୍ ପ୍ରାଭୁ ଇନ୍କୁଆଃ ସବେନ୍ ତୁସିଙ୍ଗ୍ତେୟାଃ ଓଡ଼ୋଃ ସୋନା ରୁପା ହଲେକ୍ ଇଦିୟା। ଇନ୍କୁଆଃ ତିଃଇରେ ତୁସିଙ୍ଗ୍ତେୟାଃ, ବହଃରେ ତୁସିଙ୍ଗ୍ତେୟାଃ, ହଟଃରେ ତୁସିଙ୍ଗ୍ତେୟାଃ, ଲୁତୁର୍ରାଃ ଲଲା, ତିଃଇରାଃ ଚୁଡ଼ି ଓଡ଼ୋଃ ଉଢ଼୍ନି, ପାଗ୍ଡ଼ି, କାଟାରାଃ ବଲା, ମାୟାଙ୍ଗ୍ରାଃ କାସ୍ନା, ବୁଗିନ୍ସହାନ୍ ଚୁକାଃ, ସୁପୁରେ ଓଡ଼ୋଃ କାଟାରେ ତଲେନ୍ ଡମ୍ରୁ, ମୁଦାମ୍ ଓଡ଼ୋଃ ମୁହୁଁରାଃ ଲଲା, ନିରାଲ୍ ଲିଜାଃ, ଜିଲିଙ୍ଗ୍ ଢିଲା ଲିଜାଃ, ଚାଦାର୍ ଓଡ଼ୋଃ ପାଏସା ଥାଇଲାଃ, ଆଏନା, ନିରାଲ୍ ରୁମାଲ୍ ଲିଜାଃ, ବହଃରେ ତୁସିଙ୍ଗ୍ ଲିଜାଃ ଓଡ଼ୋଃ ହୁଡିଙ୍ଗ୍ ଚାଦାର୍,
ବୁଗିନ୍ସହାନ୍ ସୁନୁମ୍ ବାଦ୍ଲାରେ ସିତ୍ରୁଗି ସହାନ୍ତେୟାଃ, ମାୟାଙ୍ଗ୍ରାଃ କାସ୍ନା ବାଦ୍ଲାରେ ବାହେର୍, ଉବ୍ ଗାଲାଙ୍ଗ୍ ବାଦ୍ଲାରେ ଉବ୍ ବାନଃ ବହଃ, ନିରାଲ୍ ଲିଜାଃ ବାଦ୍ଲାରେ ବାସ୍ତା ଲିଜାଃ, ବୁଗିନ୍ ମେଦ୍ମୁହାଁଡ଼୍ ବାଦ୍ଲାରେ ଅଣ୍ଡର୍ ଦାଗ୍ ହବାଅଃଆ।
ଆପେୟାଃ ହଡ଼କ ତାରାଉଡ଼ିତେ ଓଡ଼ୋଃ ପେଡ଼େୟାନ୍ ପାଲ୍ଟାନ୍କ ଲାଡ଼ାଇ ପିଡ଼ିରେ ଜିୟନଃଆକ। ସିୟୋନ୍ରେୟାଃ ଦୁହାର୍କ ରାନାଃ ଓଡ଼ୋଃ ଏୟମ୍ ରିକାଏୟାକ। ଓଡ଼ୋଃ ଇନିଃ ବେଗାର୍ ଗୁହ୍ନାଁତେ ଏସ୍କାର୍ଗି ଅତେରେ ଦୁବା।
Source notes (1)
- Footnote ପାଏଝଲ୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.