Munda Bible
ଯିଶାୟ 19
ମିସାର୍ ନାଗେନ୍ତେ ଆୟାର୍କାଜି
ମିସାର୍ ନାଗେନ୍ତେ ଆୟାର୍କାଜି, ନେଲେପେ, ପ୍ରାଭୁ ରିମିଲ୍ରେ ରାକାବ୍କେଦ୍ତେ ଇମ୍ତାଗି ମିସାର୍ତେ ହିଜୁଃତାନା। ଇନିୟାଃ ଆୟାର୍ରେ ମିସାର୍ରେନ୍ ସବେନ୍ ମୁରୁତ୍କ ଥାର୍ଥାରାଅଃଆକ ଓଡ଼ୋଃ ବରତେ ମିସାର୍ରେନ୍ ହଡ଼କଆଃ ମନ୍ସୁରୁଦ୍ ସେର୍କେନଃଆ। “ଓଡ଼ୋଃ ଆଇଙ୍ଗ୍ ମିସାର୍ରେନ୍ ହଡ଼କକେ ଆକ ଆକରେ ଲାଡ଼ାଇକଆଇଙ୍ଗ୍। ଏନାତେ ଇନ୍କୁ ଆପାନ୍ ହାଗା ବିରୁଧ୍ରେ ହାଗା ଓଡ଼ୋଃ ହପୋର୍ଜାପାଃରେନ୍ ହଡ଼କଆଃ ବିରୁଧ୍ରେ ହପୋର୍ଜାପାଃରେନ୍ ହଡ଼କ ବିରିଦା ଓଡ଼ୋଃ ଲାଡ଼ାଇୟାକ, ଏନ୍ତେ ନାଗାର୍ ବିରୁଧ୍ରେ ନାଗାର୍ ଓଡ଼ୋଃ ରାଇଜ୍ ବିରୁଧ୍ରେ ରାଇଜ୍ ଲାଡ଼ାଇୟାକ। ଓଡ଼ୋଃ ମିସାର୍ ଦିଶୁମ୍ରେନ୍ ହଡ଼କଆଃ ବୁଦ୍ଧି କାମି କାଏ ଏମେୟା ଓଡ଼ୋଃ ଇନ୍କୁ ଉହାଟ୍ ରିକାକାଦ୍ ତେୟାଃକ କାମି କାଏ ଏମେୟା। ଏନ୍ତେ ଇନ୍କୁ ମୁରୁତ୍ କତାଃରେ, ଦେଅଁଣା କତାଃରେ, ମାନ୍ତାର୍ ରିକାତାନ୍ କତାଃରେ, ପେତେନ୍ ବଙ୍ଗା କତାଃରେ ଦାୟା ଆସିୟାକ। ଆଇଙ୍ଗ୍ ମିସାର୍ରେନ୍ ହଡ଼କକେ ମିଆଦ୍ ଦାୟା କା ରିକାତାନ୍ ହଡ଼ରାଃ ତିଃଇରେଇଙ୍ଗ୍ ଜିମାକଆ, ଓଡ଼ୋଃ ମିଆଦ୍ ନିସ୍ଠୁର୍ ରାଜା ଇନ୍କୁ ଚେତାନ୍ରେ ରାଇଜ୍ ରିକାୟା, ନେଆଁ ପ୍ରାଭୁ, ପୁରାଃ ପେଡ଼େୟାନ୍ ପ୍ରାଭୁ କାଜିତାନାଏ।”
ଦରେୟାରାଃ ଦାଆଃ ଆଞ୍ଜେଦ୍କେନଃଆ ଓଡ଼ୋଃ ଗାଡ଼ାରେୟାଃ ଦାଆଃ ଆଞ୍ଜେଦ୍କେଦ୍ତେ ରହଡ଼୍କଆଃ, ଓଡ଼ୋଃ ନାହିଁକରାଃ ଦାଆଃ ସିତ୍ରୁ ସହାନ୍ନାଃ, ମିସାର୍ରାଃ ଲିଙ୍ଗିୟଃତାନ୍ ଗାଡା ଦାଆଃ ଆଞ୍ଜେଦ୍କଆଃ। ଦାଆଃରେୟାଃ ସବେନ୍ ସାଉଁଣିକ ରହଡ଼୍କଆଃ। ନିଲ୍ ନାହିଁ ହେପାଦ୍ରାଃ ତାସାଦ୍ ଓଡ଼ୋଃ ଗାଡା ଗେନାରେ ତାଇନ୍ତାନ୍ ପିଡ଼ିକରେ ହେରାକାନ୍ତେୟାଃ, ସବେନ୍ ରହଡ଼୍ କେଦ୍ତେ ଅଟାଙ୍ଗ୍କଆଃ ଓଡ଼ୋଃ ଜେତ୍ନାଃ ଏନ୍ତାଃରେ କା ତାଇନାଃ। ହାକୁ ସାବ୍ ହଡ଼କହଗି ଏୟମ୍ ରିକାଏୟାକ ଓଡ଼ୋଃ ଅକନ୍କ ନିଲ୍ ନାହିଁ ହେପାଦ୍ରେ ବାନ୍ସିଡାହାଙ୍ଗ୍ ଓଡ଼ୋଃ ଜାଲୋମ୍ଲଃ ହାକୁ ସାବ୍କେଦ୍ତେ ଜିୱାନ୍ ବିତାଅତାନାକ, ଇନ୍କୁ ଦୁକୁ ଓଡ଼ୋଃ ଏୟମ୍ ରିକାଏୟାକ। ଅକନ୍କ ସାନାଇରାଃ ଫାର୍ଚି ସୁତାମ୍ତେ ଗାଲାଙ୍ଗ୍ କାମି ରିକାଃକ ଓଡ଼ୋଃ ନିରାଲ୍ ପୁଣ୍ଡି ଲିଜାଃ ବାଇୟାଃକ, ଇନ୍କୁ ଏନ୍ ସୁସାର୍ କାମିଏତେ ଗିହୁଗଃଆକ। ଇନ୍କୁଆଃ ଲିଜାଃ ଗାଲାଙ୍ଗ୍ କାମ୍ଭାକ ଟହେଜ୍କେଦ୍ତେ ଟୁକ୍ଡ଼ା ଟୁକ୍ଡ଼ାକଆଃ ଓଡ଼ୋଃ ନାଲା ନାମେ ନାଙ୍ଗ୍ ନାଲାତାନ୍କଆଃ ମନ୍ ହୁଡିଙ୍ଗ୍ଜୀଉକଆଃ।
ସୋୟନ୍ରେନ୍ ଆଗୁଆଇକ ଡଣ୍ଡଗିୟାକ, ଫାରୋରାଃ ସେଣାଁନ୍ ହଡ଼କ ଡଣ୍ଡ ହଡ଼କ ଲେକା ଉହାଟ୍ ରିକାଏତାନା। “ଆଲେ ସେଣାଁନ୍ ହଡ଼କଆଃ ହନ୍ ଓଡ଼ୋଃ ପ୍ରାଚିନ୍ ରାଜାକଆଃ ହନ୍ତାନ୍ଲେ,” ନେ କାଜି ଆପେ ଫାରୋକେ ଚିଲ୍କା କାଜି ଦାଡ଼ିୟାପେ ? ତାବ୍ଦ ଆମାଃ ସେଣାଁନ୍ ହଡ଼କ କତାଃରେ ମେନାକଆ ? ପୁରାଃ ପେଡ଼େୟାନ୍ ପ୍ରାଭୁ ମିସାର୍ ବିରୁଧ୍ରେ ଅକଆଃ ଉହାଟ୍କାଦାଏ, ଏନା ଇନ୍କୁ ଆମ୍କେ ଉଦୁବ୍ମେକାକ। ସୋୟନ୍ରେନ୍ ଆଗୁଆଇକ ଡଣ୍ଡକାନାକ ଓଡ଼ୋଃ ନୋଫର୍ରେନ୍ ଆଗୁଆଇକ ବେଦାକାନା। ଅକନ୍କଚି ମିସାର୍ କିଲିରେନ୍ କଚାରାଃ ଦିରି ଲେକାନ୍କ ତାନ୍କ, ଇନ୍କୁ ମିସାର୍କେ ଆଦଃ ହରାତେକ ଇଦିକାଦା। ପ୍ରାଭୁ ଇନ୍କୁଆଃ ମନ୍ସୁରୁଦ୍ରେ ମିଆଦ୍ ଆଡ଼ାଃଉଡ଼ୁଃରେୟାଃ ଆତ୍ମା ଏମାକାଦ୍କଆଏ। ଇଲିଆର୍ଖିତେ ବୁଲାକାନ୍ ହଡ଼ ଜେ'ଲେକା ଆୟାଃ ଉଲ୍ଲାକାଦ୍ ଚେତାନ୍ରେଗି ଉୟୁଃକେନଃଆ, ଏନ୍ଲେକାଗି ଇନ୍କୁ ମିସାର୍କେ ସବେନ୍ କାମିରେ ଆଦଃ ହରାତେ ଇଦିତାନାକ। ମିସାର୍ ନାଗେନ୍ତେ ଜେତାଏ ଜେତ୍ନାଃ କାକ ରିକା ଦାଡ଼ିୟାଃ। ବହଃ ଚାଏ ଚାଆଃଲମ୍, କିତାରେୟାଃ କତ ଚାଏ ତାସାଦ୍, ମାରାଙ୍ଗ୍ ଚାଏ ହୁଡିଙ୍ଗ୍, ଜେତାଏ ଜେତ୍ନାଃ ରିକା କାକ ଦାଡ଼ିୟାଃ।
ମିସାର୍ରେ ପ୍ରାଭୁଆଃ ସୁନୁସାର୍
ଏନ୍ ହୁଲାଙ୍ଗ୍ ମିସାର୍ରେନ୍ ହଡ଼କ ବରତାନ୍ କୁଡ଼ିକ ଲେକା ହବାଅଃଆକ। ପୁରାଃ ପେଡ଼େୟାନ୍ ପ୍ରାଭୁଆଃ ତିଃଇ ଇନ୍କୁଆଃ ବିରୁଧ୍ରେ ବିରିଦାଃ, ଆୟାଃ ତିଃଇ ରିମ୍ତେୟାଃ ନେଲ୍କେଦ୍ତେ ବରତେ ଥାର୍ଥାରାଅଃଆକ। ମିସାର୍ ଦିଶୁମ୍ରେନ୍ ହଡ଼କ ଯିହୁଦା ଦିଶୁମ୍ରେନ୍ ହଡ଼କକେ ବରକଆକ। ପୁରାଃ ପେଡ଼େୟାନ୍ ପ୍ରାଭୁ ଇନ୍କୁଆଃ ବିରୁଧ୍ରେ ଅକ ଉହାଟ୍ ରିକାକାଦାଏ, ଏନାମେନ୍ତେ ଯିହୁଦାରାଃ ନୁତୁମ୍ କାଜିଲଃଗି ସବେନ୍କ ବରଏୟା।
ଏନ୍ ହୁଲାଙ୍ଗ୍ ମିସାର୍ ଦିଶୁମ୍ରେୟାଃ ମଣେଁୟା ନାଗାର୍ରେ କିନାନ୍ ଦିଶୁମ୍ରେୟାଃ ଜାଗାର୍କ ଜାଗାରେୟା ଓଡ଼ୋଃ ପୁରାଃ ପେଡ଼େୟାନ୍ ପ୍ରାଭୁଆଃ ନୁତୁମ୍ତେ କିରିୟା ରିକାୟାକ। ଏନ୍ ନାଗାର୍କଏତେ ମିଆଦ୍ ନାଗାର୍ରାଃ ନୁତୁମ୍ “ଜିୟନାକାନ୍ ନାଗାର୍” ମେନ୍ତେ କାଜିୟଃଆ।
ଏନ୍ ହୁଲାଙ୍ଗ୍ ମିସାର୍ ଦିଶୁମ୍ରେୟାଃ ଥାଲାମାଲାରେ ପ୍ରାଭୁଆଃ ନୁତୁମ୍ତେ ମିଆଦ୍ ଦାଣେଁ ରାକାବ୍ତାନ୍ ବେଦି ଓଡ଼ୋଃ ଏନାରାଃ ସିମ୍ନାରେ ମିଆଦ୍ ଖୁଣ୍ଟୁ ବିଦ୍ଅଃଆ। ନେଆଁଦ ମିସାର୍ ଦିଶୁମ୍ରେ ପୁରାଃ ପେଡ଼େୟାନ୍ ପ୍ରାଭୁଆଃ ନୁତୁମ୍ତେ ମିଆଦ୍ ଚିହ୍ନା ଓଡ଼ୋଃ ଗାୱା ହବାଅଃଆ। ଚିୟାଃଚି ଇନ୍କୁ ଏତ୍କାନ୍ କାମି ରିକାତାନ୍ ହଡ଼କତାଃଏତେ ବାଞ୍ଚାଅ ନାମେ ନାଗେନ୍ତେ, ପ୍ରାଭୁତାଃରେ ବିନ୍ତିୟାକ, ଇମ୍ତା ଇନିଃ ଇନ୍କୁ ନାଗେନ୍ତେ ମିଆଦ୍ ଜୀଉବାଞ୍ଚାଅନିଃକେ କୁଲିୟା ଓଡ଼ୋଃ ଇନିଃ ଇନ୍କୁକେ ବାଞ୍ଚାଅକଆ। ପ୍ରାଭୁ ମିସାର୍ରେନ୍ ହଡ଼କତାଃରେ ଆପ୍ନାଃ ପାରିଚାଏ ଉଦୁବେୟାଏ ଓଡ଼ୋଃ ଏନ୍ ହୁଲାଙ୍ଗ୍ ମିସାର୍ରେନ୍ ହଡ଼କ ପ୍ରାଭୁକେ ସାରିୟାକ। ଏନ୍ତେ ଇନ୍କୁ ଦାଣେଁ ଓଡ଼ୋଃ ଦାନ୍ ରାକାବ୍କେଦ୍ତେ ଆୟାଃ ସୁନୁସାର୍ ରିକାଏୟାକ। ଏନ୍ତେ ପ୍ରାଭୁତାଃରେ କିରିୟାକେଦ୍ତେ ଏନା ଏମ୍ ପୁରାଏୟାକ। ପ୍ରାଭୁ ମିସାର୍ ଦିଶୁମ୍ରେନ୍ ହଡ଼କକେ ସାଜାଇ ଏମାକଆ, ମେନ୍ଦ ଇନ୍କୁକେ ଏନାଏତେ ହଗି ବୁଗିକଆ। ଏନ୍ତେ ଇନ୍କୁ ପ୍ରାଭୁତାଃ ରୁହାଡ଼ାଃକ ଓଡ଼ୋଃ ଇନିଃ ଇନ୍କୁଆଃ ବିନ୍ତି ଆୟୁମ୍କେଦ୍ତେ ଇନ୍କୁକେ ବୁଗିକଆ।
ଏନ୍ ହୁଲାଙ୍ଗ୍ ମିସାର୍ଏତେ ଆସେରିୟା ଜାକେଦ୍ ମିଆଦ୍ ଚାକାର୍ ହରା ବାଇୟଃଆ। ଆସେରିୟା ହଡ଼କ ମିସାର୍ତେ ଓଡ଼ୋଃ ମିସାର୍ରେନ୍ ହଡ଼କ ଆସେରିୟାତେ ହିଜୁଃ ସେନଃ ରିକାୟାକ। ଓଡ଼ୋଃ ନେ ବାରାନ୍ ଦିଶୁମ୍ ମିଦ୍ତେ ସେୱା ରିକାଏୟାକ। ଚିୟାଃଚି ଏନ୍ ହୁଲାଙ୍ଗ୍ ଇସ୍ରାଏଲ୍, ଆସେରିୟା ଓଡ଼ୋଃ ମିସାର୍ ମେସାକେଦ୍ତେ ନେ ଆପିଆ ଦିଶୁମ୍, ନେ ଅତେଦିଶୁମ୍ରେ ଆଶିଷ୍କ ନାମେୟା। ପୁରାଃ ପେଡ଼େୟାନ୍ ପ୍ରାଭୁ ନେ ଦିଶୁମ୍କେ ଆଶିଷ୍ କେଦ୍ତେ କାଜିୟା, “ଆଇଁୟାଃ ହଡ଼କ ମିସାର୍, ଆଇଁୟାଃ ତିଃଇତେ ବାଇୟାକାଦ୍ କାମି ଆସେରିୟା ଓଡ଼ୋଃ ଆଇଁୟାଃ ଆକ୍ତେୟାର୍ ଲେକା ହବାଅଃତାନ୍ ଇସ୍ରାଏଲ୍ ଚେତାନ୍ରେ ଆଶିଷ୍ ହବାଅଃକା।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.