Munda Bible
ଯିଶାୟ 13
ବାବିଲ୍ରାଃ ସାଜାଇ
ଆମୋସ୍ରାଃ ହନ୍ତେକଡ଼ା ଯିଶାୟ, ବାବିଲୋନ୍ ବିଷାଏରେ ଦାର୍ଶାନ୍ ହରାତେ ନେଲାକାଦ୍ ଆୟାର୍କାଜି। ଦାରୁକ କା ତାହିନ୍ ବୁରୁ ଚେତାନ୍ରେ ଝାଣ୍ଡା ବିଦେମେ, ହଡ଼କକେ କାଉରିକେଦ୍ତେ ହାକାଅକମେ। ମାଇନାନ୍ ହଡ଼କଆଃ ନାଗାର୍ ଦୁହାର୍ରେ ବଲ ନାଗେନ୍ତେ ଇନ୍କୁକେ ତିଃଇ ହିଲାଅକେଦ୍ତେ ଇସାରାକମେ। ଆଇଙ୍ଗ୍ ଆଇଁୟାଃ ପାବିତାର୍ ହଡ଼କକେ ଆଚୁକାଦ୍ କୱାଇଙ୍ଗ୍, ହେଗି, ଆଇଙ୍ଗ୍ ଆଇଁୟାଃ ଖିସ୍ ପୁରାଏ ନାଗେନ୍ତେ ଆଇଁୟାଃ ପେଡ଼େୟାନ୍ ସିପାଇକକେ ହାକାଅ କାଦ୍କଆଇଙ୍ଗ୍।
ମିଆଦ୍ ମାରାଙ୍ଗ୍ ଝୁଣ୍ଡ୍ରେନ୍ ହଡ଼କଆଃ କାଉରି ଲେକା, ବୁରୁ ଚେତାନ୍ରେ କାଉରି ଆୟୁମଃତାନା। ହଡ଼କ ମିଦ୍ତାଃରେ ହୁଣ୍ଡିୟଃତାନ୍ ଇମ୍ତା ଚିଲ୍କା ହବାଅଃଆ, ଏନ୍ଲେକା ଗଟା ରାଇଜ୍ରେ ହାଲାଗୁଲା ଆୟୁମଃତାନା। ପେଡ଼େୟାନ୍ ପ୍ରାଭୁ ଲାଡ଼ାଇ ନାଗେନ୍ତେ ସିପାଇକକେ ହୁଣ୍ଡିକତାନା। ଇନ୍କୁ ପୁରାଃ ସାଙ୍ଗିନ୍ ଦିଶୁମ୍ କଏତେ ହିଜୁଃତାନାକ। ପ୍ରାଭୁ ବାବିଲୋନ୍କେ ଜିୟନ୍ ନାଗେନ୍ତେ ଖିସ୍ରେୟାଃ ତାରାଉଡ଼ି ସାବ୍କେଦ୍ତେ ହିଜୁଃତାନା, ସିର୍ମା ଚେତାନ୍ଏତେ ହିଜୁଃତାନା।
ଆପେ ସବେନ୍ ଏୟମ୍ତାନ୍ଲଃ ତାଇନ୍ପେ, ଚିୟାଃଚି ପ୍ରାଭୁଆଃ ହିଜୁଃ ଦିପିଲି ନାଡ଼େଜାକାନା, ପୁରାଃ ପେଡ଼େୟାନ୍ନିଃ ତାଃଏତେ ଆନ୍ଧିହୟ ଲେକା ଏନା ସେଟେରା। ଏନାମେନ୍ତେ ସବେନ୍କଆଃ ତିଃଇ ନାରାଦୁରା ହବାଅଃଆ ଓଡ଼ୋଃ ସବେନ୍ ହଡ଼କଆଃ ମନ୍ସୁରୁଦ୍ ବରତେ ସେର୍କଆଃ। ଇନ୍କୁ ପୁରାଃଗି ବରତେ ତାଇନାଃକ, ଦୁକୁ ଓଡ଼ୋଃ ହାସୁ ଇନ୍କୁକେ ଏସେର୍କଆ। ହନ୍ଜାନାମ୍ ଏଙ୍ଗାରାଃ ଦୁକୁ ଲେକା ଇନ୍କୁଆଃ ଦୁକୁ ହବାଅଃଆ। ଇନ୍କୁ ମିହୁଡ଼୍ ଆଡଃମିହୁଡ଼୍କେ ନେଲ୍ତାନ୍ଲଃ ବରତେ ଆକ୍ଚାକାଅଃୱାକ। ଇନ୍କୁଆଃ ମଚା ସେଙ୍ଗେଲ୍ ଲୁଆଠି ଲେକା ହବାଅଃଆ। ନେଲେପେ, ପ୍ରାଭୁଆଃ ଦିପିଲି ହିଜୁଃତାନା। ଏନା ପୁରାଃଗି ଖିସ୍ ଓଡ଼ୋଃ ବରୱାନ୍ ଖିସ୍ରାଃ ହୁଲାଙ୍ଗ୍ ତାନାଃ। ଏନା ଅତେଦିଶୁମ୍କେ ଜିଅନ୍ ରିକାଏୟା ଓଡ଼ୋଃ ସବେନ୍ ପାପି ହଡ଼କକେ ଜିୟନ୍କଆ। ସିର୍ମାରେନ୍ ଇପିଲ୍ ଓଡ଼ୋଃ ମାପ୍ରାଙ୍ଗ୍ ଇପିଲ୍କ ମାସ୍କାଲ୍ କାକ ଏମେୟା। ସିଙ୍ଗିତୁରଃ ଇମ୍ତା ସିଙ୍ଗି ମାସ୍କାଲ୍ କାଏ ଏମେୟା ଓଡ଼ୋଃ ଚାଣ୍ଡୁଃ ଆୟାଃ ମାସ୍କାଲ୍ କାଏ ଏମେୟା।
ଆଇଙ୍ଗ୍ ଦିଶୁମ୍କେ ଆୟାଃ କା ଧାର୍ମାନ୍ ନାଗେନ୍ତେ ଓଡ଼ୋଃ ଏତ୍କାନ୍ ହଡ଼କକେ ଆକଆଃ କା ଧାର୍ମାନ୍ ହରାତେ ସାଜାଇ ଏମାକଆ ଓଡ଼ୋଃ ଆଇଙ୍ଗ୍ ଆପାନ୍କେ ମାରାଙ୍ଗ୍ ମେନ୍ତେ କାଜିନ୍ତାନ୍ ହଡ଼କକେ ଲାତାର୍ରେ ଉୟୁଃକୱାଇଙ୍ଗ୍ ଓଡ଼ୋଃ ଦାୟା କା ରିକାତାନ୍ ହଡ଼କଆଃ ସାଜାଇ ଏମାକଆଇଙ୍ଗ୍। ଆଇଙ୍ଗ୍ ମାନୱାକେ ଫାର୍ଚି ସୋନା ଏତେ ପୁରାଃ ଗନଙ୍ଗ୍ଆଁନ୍ ଓଡ଼ୋଃ ମାନୱାକେ ଓଫିର୍ରାଃ ଫାର୍ଚି ସୋନା ଏତେ ପୁରାଃ ଗନଙ୍ଗ୍ଆଁନ୍ ବାଇୟାଇଙ୍ଗ୍। ଏନ୍ ହୁଲାଙ୍ଗ୍ ଆଇଙ୍ଗ୍ ପେଡ଼େୟାନ୍ ପ୍ରାଭୁ, ପୁରାଃ ଖିସ୍ ଓଡ଼ୋଃ ଖିସ୍ତେ ଜୁଲଃତାନ୍ଲଃ ସିର୍ମାକେ ଏକ୍ଲାଅୟାଇଙ୍ଗ୍ ଓଡ଼ୋଃ ଅତେଦିଶୁମ୍କେ ଦିଲ୍କାଅକେଦ୍ତେ ଆୟାଃ ଠାୟାଦ୍ ଏତେ ଗେନାୟାଇଙ୍ଗ୍।
ମିରିକ୍କେ ସାଙ୍ଗାର୍ ରିକାତାନ୍ ଇମ୍ତା ଚିଲ୍କା ଉକୁନାଙ୍ଗ୍ ନେତେହେନ୍ତେ ନିର୍ବାଡ଼ାଏୟା ଓଡ଼ୋଃ ମିଣ୍ଡିଗୁପିନିଃ କା ତାହିନ୍ ହରାତେ ଗୋଟ୍ରେନ୍ ମିଣ୍ଡିକ ଚିଲ୍କା ନେତେହେନ୍ତେ ରିକାନାଃକ, ଏନ୍ଲେକାଗି ବାବିଲୋନ୍ରେ ତାଇନ୍ତାନ୍ ଏଟାଃ କିଲିରେନ୍ ହଡ଼କ ଆପାନାଃ ହଡ଼କତାଃତେ ଓଡ଼ୋଃ ଆପ୍ନାଃ ଦିଶୁମ୍ତେ ନିର୍ ହିଜୁଃଆକ। ଅକଏ ସାନାବଃଆଏ, ଇନିଃ ତାରାଉଡ଼ିଲଃ ମାଗଃଆଏ। ଜେତା ହଡ଼କ ସାନାବଃଆ, ଏନ୍ ସବେନ୍କ ତାରାଉଡ଼ିଲଃ ଗଜଃଆକ। ଆକଆଃ ବାଲେଃ ହନ୍କକେ ଆକଆଃ ମେଦ୍ ସାମ୍ନାଙ୍ଗ୍ରେ ଥାଅୱାଃ ଗଏଃକଆକ। ଆକଆଃ ଅଡ଼ାଃକ ରେଃକ୍ ଇଦିୟଃଆ। ଆକଆଃ କୁଡ଼ିକଲଃ ହଡ଼୍ମରାଃ ଏତ୍କାନ୍ କାମି ରିକାଅଃଆ।
ନେଲେପେ, ଆଇଙ୍ଗ୍ ବାବିଲୋନ୍ରେନ୍ ହଡ଼କଆଃ ବିରୁଧ୍ରେ ମିଦିୟନ୍ ହଡ଼କକେ ବିରିଦ୍କଆଇଙ୍ଗ୍। ଇନ୍କୁ ରୁପାକେ କାକ ନେଲେୟା ଚାଏ ସୋନା ଚେତାନ୍ରେ ଇନ୍କୁଆଃ ଜେତାନ୍ ସୁକୁ କା ତାଇନାଃ। ଇନ୍କୁ ଧାଙ୍ଗ୍ଡ଼ାକକେ ଧାନୁଲଃ ତୁଇଙ୍ଗ୍ ଗଏଃକଆକ। ଇନ୍କୁ ଏଙ୍ଗା ହଡ଼୍ମରେ ତାଇକାନ୍ ବାଲେଃ ହନ୍କକେ କାକ ଲିବୁଇକଆ। ଓଡ଼ୋଃ ହନ୍କକେ କାକ ଦାୟାକଆ ବାବିଲୋନ୍ ନାଗାର୍ ସବେନ୍ ରାଇଜ୍କଆଃ ଥାଲାରେ ପୁରାଃ ସୁଗାଡ଼ାନ୍ ରାଇଜ୍ ତାନାଃ। ଓଡ଼ୋଃ କଲ୍ଦିୟରେନ୍ ହଡ଼କଆଃ ମାନାରାଙ୍ଗ୍ ତାନାଃ ମେନ୍ତେ ଆପାନ୍କେ ମାରାଙ୍ଗ୍ୟେଁନ୍ ତାନ୍ଲଃ କାଜିନ୍ତାନାକ। ମେନ୍ଦ ଏନା ସଦୋମ୍ ଓଡ଼ୋଃ ଗମ୍ରା ନାଗାର୍ ଲେକା ପାର୍ମେଶ୍ୱାର୍ଆଃ ହରାତେ ଜିୟନ୍ ରିକାଅଃଆ। ଏନ୍ ଠାୟାଦ୍ରେ ଜେତାଏ ହଁ କାକ ତାଇନାଃ, ପିଢ଼ି ପିଢ଼ି ଜାକେଦ୍ ଏନ୍ତାଃରେ ଓଡ଼ୋଃ ଚିଉଲା ହଁ ଜେତାଏ କାକ ଡେରାୟା। ଆରବ୍ରେନ୍ ଜେତା ହଡ଼କ ଏନ୍ତାଃରେ କୁମ୍ବା କାକ ବାଇୟା। ଚାଏ ଜେତାନ୍ ମିଣ୍ଡିଗୁପିନିଃ ଆୟାଃ ମିଣ୍ଡିକକେ ଏନ୍ତାଃରେ କାଏ ରୁଡ଼ୁକଆ। ମେନ୍ଦ ଏନା ବିର୍ଜାଁତୁକଆଃ ଠାୟାଦ୍ ହବାଅଃଆ, ମାପ୍ରାଙ୍ଗ୍ ମାହାଲ୍ ଅଡ଼ାଃକରେ ତୁୟୁକ ଡେରାୟା। ପେଚା ଅଡ଼େକ ଏନ୍ତାଃରେ ତାଇନାଃକ, ଓଡ଼ୋଃ ବୁରୁରେନ୍ ମେରମ୍କ ଏନ୍ତାଃରେ ଦନେୟାକ। ଗାଡ଼୍ରେ ହୁଣ୍ଡାର୍କ ଓଡ଼ୋଃ ସୁଗାଡ଼ାନ୍ଗି ବାଇୟାକାନ୍ ରାଜ୍ମାହାଲ୍ରାଃ ପିଣ୍ଡ୍ଗିରେ ତୁୟୁକ କାଉରିୟା। ବାବିଲୋନ୍ରାଃ ଦିପିଲି ସେଟେର୍ଆଃ, ମେନ୍ଦ ପୁରାଃ ଦିପିଲି କା ତାଇନାଃ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.