Munda Bible
ଯିଶାୟ 10
ଅକ ହଡ଼କ କା ଧାର୍ମାନ୍ ନିୟାମ୍କ ବାଇୟାଃ ଓଡ଼ୋଃ ଅକ ଅନଲ୍ହଡ଼କ କା ଲାଗାତିଙ୍ଗ୍ କାଜି ଅଲାଃକ, ଇନ୍କୁ ସାର୍ପାଅଃଆକ। ନେଆଁ ହରାତେ ଇନ୍କୁ ଗାରିବ୍ ହଡ଼କକେ ଇନ୍କୁଆଃ ନ୍ୟାୟ ନାମଃ ଆକ୍ତେୟାର୍ଏତେ ଓଡ଼ୋଃ ସାସାତି ନାମେତାନ୍ ଆଇଁୟାଃ ହଡ଼କକେ ନ୍ୟାୟ ବିଚାର୍ କା ନାମଃଆ। ରାଣ୍ଡିକକେ ଓଡ଼ୋଃ ଟୁଆର୍ ହନ୍କକେ ରେଃକ୍ ଆଉକାଦ୍ ଜିନିଷ୍ ଲେକା ରିକାଃକ। ଚିମ୍ତା ଆପେକେ ସାଜାଇ ଏମାପେ ନାଗେନ୍ତେ ସାଙ୍ଗିନ୍ଏତେ ଜିଅନ୍ ସେଟେରା, ଇମ୍ତା ଆପେ ଚିନାଃ ରିକାୟାପେ ? ଦେଙ୍ଗା ନାମେ ନାଗେନ୍ତେ ଅକଏତାଃପେ ନିରା ? କତାଃରେ ଆପେୟାଃ ସୁଗାଡ଼ାନ୍ ଖୁର୍ଜିକ ଉକୁଇୟାପେ ? ଇନ୍କୁଦ ତନଲ୍ ହଡ଼କଆଃ କାଟା ଲାତାର୍ରେ ଏସ୍କାର୍ ଉୟୁଗଃଆକ ଓଡ଼ୋଃ ମାଆଃ ରିକାତାନ୍ ହଡ଼କଆଃ କାଟା ଲାତାର୍ରେ ଉୟୁଗଃଆକ। ନେ ସବେନାଃତେ ହଗି ପ୍ରାଭୁଆଃ ଖିସ୍ କା ସାଙ୍ଗିନଃଆ, ମେନ୍ଦ ପ୍ରାଭୁଆଃ ତିଃଇ ସିଦା ଲେକାଗି ଜିଲିଙ୍ଗ୍କାନା।
ଆସେରିୟା ନାଗେନ୍ତେ ପ୍ରାଭୁଆଃ ସାଜାଇ
ପ୍ରାଭୁ କାଜିତାନାଏ, “ହେ ଆସେରିୟା ନାଗାର୍ ଆମାଃ ବରୱାନ୍ ସାଜାଇ ହବାଅଃଆ, ଆମାଃ ତିଃଇରେ ଆଇଁୟାଃ ଖିସ୍ ଲେକାନ୍ ସଟା ମେନାଃ, ଆମ୍ ଆଇଁୟାଃ ଖିସ୍ଅଃ ଲେକା ସାଜାଇ ତାନ୍ମେ। ଆଇଙ୍ଗ୍ ଏନ୍ ନାଗାର୍କେ ମିଆଦ୍ କା ଧାରାମାନ୍ କିଲି ବିରୁଧ୍ରେ ଓଡ଼ୋଃ ଆଇଙ୍ଗ୍କେ ଖିସ୍ ରିକାଇଙ୍ଗ୍ତାନ୍ ହଡ଼କଆଃ ବିରୁଧ୍ରେ କୁଲି ତାନାଇଙ୍ଗ୍। ଜେ'ଲେକାଚି ଇନ୍କୁ ଏନ୍ ନାଗାର୍କେ ରେଃକ୍ ଇଦିୟାକ, ରେଃକ୍କାନ୍ ଜିନିଷ୍କକେ ଇଦିୟାକ ଓଡ଼ୋଃ ହଡ଼କ ହରାରାଃ ଧୁଡ଼ିକେ କାଟାଲଃ ତିକା ଲାହୁଦେ ଲେକା ଏନ୍ ନାଗାର୍କେ ତିକା ଲାହୁଦେୟାକ।”
ଏନ୍ରେୟ ଆସେରିୟା ନାଗାର୍ରାଃ ଇଛାସାନାଙ୍ଗ୍ ନେଆଁ ନାହାଁଲାଃ, ନେଆଁ ଇନିୟାଃ ମନ୍ସୁରୁଦ୍ରାଃ ଉଡ଼ୁଃ ପାହାମ୍ ନାହାଁଲାଃ, ମେନ୍ଦ ପୁରା ନକ୍ସାନ୍ ରିକା ଓଡ଼ୋଃ ପୁରାଃ କିଲିକକେ ଜିୟନ୍ ରିକା ନାଗେନ୍ତେ ଆୟାଃ ଇଛାସାନାଙ୍ଗ୍ ତାନାଃ। ଚିଆଃଚି ଆସେରିୟା ନାଗାର୍ ଆପାନ୍କେ ମାରାଙ୍ଗ୍ ମେନ୍ତେ କାଜିନ୍ତାନ୍ଲଃ କାଜିୟାଃଏ, “ଆଇଁୟାଃ ସବେନ୍ ସିପାଇକଆଃ ଆଗୁଆଇକ ଚିନାଃ ରାଜା ନାହାଁଲାଃକ ?” ଆଇଙ୍ଗ୍ ଚିନାଃ କାର୍କେମାଶ୍କେ କାଲ୍ନୋ ନାଗାର୍ ଲେକା, ହମାତ୍କେ ଅର୍ପଦ୍ ନାଗାର୍ ଲେକା, ଓଡ଼ୋଃ ଶାମରିୟାକେ ଦମାସ୍କସ୍ ନାଗାର୍ ଲେକା ଚିନାଃ କାଇଙ୍ଗ୍ ଜିତାଅକାଦା ? ମୁରୁତ୍ ସେୱା ରିକାତାନ୍ ରାଇଜ୍କରେନ୍ ଖଦାକାନ୍ ମୁରୁତ୍କ, ଯୀରୁଶାଲେମ୍ ଓଡ଼ୋଃ ଶାମରିୟାରେନ୍ ମୁରୁତ୍କ ଏତେ ମାପ୍ରାଙ୍ଗ୍ଗିୟାକ, ଏନ୍ ସବେନ୍ ରାଇଜ୍କ ଆଇଁୟାଃ ଆକ୍ତେୟାର୍ରେ ହବାକାନା। ଆଇଙ୍ଗ୍ ଶାମରିୟା ଓଡ଼ୋଃ ଆୟାଃ ମୁରୁତ୍କଆଃ ଅକ ଦାସା ରିକାକାଦାଇଙ୍ଗ୍, ଯୀରୁଶାଲେମ୍ ଓଡ଼ୋଃ ଆୟାଃ ମୁରୁତ୍କଆଃ ଦାସା ଚିନାଃ ଏନ୍ଲେକା କାଇଙ୍ଗ୍ ରିକାୟା ?
ମେନ୍ଦ ପ୍ରାଭୁ ସିୟୋନ୍ ବୁରୁ ଓଡ଼ୋଃ ଯୀରୁଶାଲେମ୍ ବିରୁଧ୍ରେ ଆୟାଃ କାମି ଟୁଣ୍ଡୁକେଦ୍ ତାୟମ୍ତେ କାଜିୟା, “ଆସେରିୟା ରାଜା ଆପାନ୍କେ ମାରାଙ୍ଗ୍ୟେଁନ୍ ମେନ୍ତେ କାଜିନ୍, ଆୟାଃ ମେଦ୍ରାଃ ଆହାଙ୍କାର୍ ନାଗେନ୍ତେ ଆଇଙ୍ଗ୍ ଇନିଃକେ ସାଜାଇ ଏମାଇୟାଇଙ୍ଗ୍।”
ଚିୟାଃଚି ଆସେରିୟାରେନ୍ ରାଜା ଆପାନ୍କେ ମାରାଙ୍ଗ୍ ଆଟ୍କାର୍ଉରୁମ୍ ତାନ୍ଲଃ କାଜିକାଦା, “ଆଇଙ୍ଗ୍ ଆଇଁୟାଃ ବୁଦ୍ଧି, ତିଃଇରେୟାଃ ପେଡ଼େଃତେ ଓଡ଼ୋଃ ସେଣାଁ ତାଇନ୍ ହରାତେ ନେ ସବେନାଃ ରିକାକାଦାଇଙ୍ଗ୍। ଆଇଙ୍ଗ୍ ପୁରାଃ ରାଇଜ୍କରାଃ ସିମ୍ନା ସାଙ୍ଗିନ୍ କାଦାଇଙ୍ଗ୍। ଆଇଙ୍ଗ୍ ଇନ୍କୁଆଃ ଖୁର୍ଜିକ ରେଃକ୍ କାଦାଇଙ୍ଗ୍, ଓଡ଼ୋଃ ପୁରାଃ ପେଡ଼େୟାନ୍ ହଡ଼ ଲେକା ରାଜାକକେ ଆଇଁୟାଃ ଆକ୍ତେୟାର୍ରେ ଦହକାଦ୍ କୱାଇଙ୍ଗ୍। ହଡ଼କ ଚେଣେଁରାଃ ତୁକାକେ ତିଃଇତେ ଜିଲିଙ୍ଗ୍ ଆଉ ଲେକା ଓଡ଼ୋଃ ବାଗିକାନ୍ ଜାରମ୍କେ ଆଉହୁଣ୍ଡି ଲେକା ଆଇଙ୍ଗ୍ ଅତେଦିଶୁମ୍ରାଃ ରାଇଜ୍କକେ ଆଉହୁଣ୍ଡି କାଦାଇଙ୍ଗ୍। ଆଡଃମିହୁଡ଼୍ ହଗି ଆପ୍ରବ୍ ହିଲାଅ ନାଙ୍ଗ୍ ଚାଏ ଠର୍ ଚାହାବ୍କେଦ୍ତେ ଚିଁ ଚିଁ କାଉରି ରିକା ନାଙ୍ଗ୍ କାଏ ତାଇକେନା।”
“ହାକେ ଚିନାଃ ସାହାନ୍ ମାଆଃତାନ୍ ହଡ଼ ତାଃଏତେ ଆପାନ୍କେ ମାରାଙ୍ଗ୍ ମେନ୍ତେ କାଜିନା ? ଚାଏ କାରାତ୍ ଚିନାଃ କାର୍ତିୟା ତାଃଏତେ ଆପାନ୍କେ ମାରାଙ୍ଗ୍ ମେନ୍ତେ କାଜିନା ? ସାଜାଇ ଚିନାଃ ସାଜାଇ ଏମ୍ତାନ୍ନିଃ କେ କାଜି ଦାଡ଼ିୟା ? ଚାଏ, ସଟା ଚିନାଃ ସାହାନ୍କେ ରିମ୍ ଦାଡ଼ିୟାଏ ?”
ଏନାମେନ୍ତେ ପ୍ରାଭୁ, ସବେନାଃଏତେ ପେଡ଼େୟାନ୍ ପ୍ରାଭୁ ଆୟାଃ କେଟେୟାନ୍ ସିପାଇକତାଃ ଜିଅନ୍ ରିକା ବେମାର୍ କୁଲେୟାଏ। ଇନିୟାଃ ମାନାରାଙ୍ଗ୍ରାଃ ଲାତାର୍ରେ ସେଙ୍ଗେଲ୍ ଜୁଲ୍ ଲେକା ଜୁଲେୟାଏ ଓଡ଼ୋଃ ଅଣ୍ଡର୍ ଲେକା ହବାଅଃଆ। ଓଡ଼ୋଃ ଇସ୍ରାଏଲ୍ରାଃ ମାସ୍କାଲ୍, ସେଙ୍ଗେଲ୍ ଲେକା ଓଡ଼ୋଃ ଆୟାଃ ପାବିତାର୍ ସେଙ୍ଗେଲ୍ ଲୁଠି ଲେକା ହବାଅଃଆ। ମୁସିଙ୍ଗ୍ତେଗି ସବେନ୍ ଦଧାଡ଼ିଚୁପାଦ୍ ଓଡ଼ୋଃ ଜାନୁମ୍ ଚୁପାଦ୍ ଜୁଲ୍କେଦ୍ତେ ଜିଅନ୍ ରିକାଏୟା। ଓଡ଼ୋଃ ଝୁଣ୍ଡ୍ତେ ପେରେଜାକାନ୍ ଟନାଙ୍ଗ୍, ସୁଗାଡ଼ାନ୍ ପିଡ଼ିକେ ପୁରା ନକ୍ସାନ୍ ରିକାଇୟାଏ। ଏନ୍ଲେକାଗି ଜୀଉ ନକ୍ସାନ୍ ରିକା ବେମାର୍ ବୁଗିନ୍ ହଡ଼କେ ପୁରା ନକ୍ସାନ୍ ରିକାଇୟାଏ।
ଏନ୍ ଟନାଙ୍ଗ୍ରେ ନିମିନାଙ୍ଗ୍ କାଟିଃଗି ଦାରୁ ସାରେଜାକାନ୍ ତାଇନାଃ, ଯେ ମିଆଦ୍ ସିଟିଆ ହନ୍ ହଁ ଏନାକେ ଲେକାକେଦ୍ତେ ଅଲ୍ ଦାଡ଼ିୟା।
ଇସ୍ରାଏଲ୍ରେନ୍ ସାରେଜାକାନ୍ ହଡ଼କଆଃ ହିଜୁଃରୁହାଡ଼୍
ଏନ୍ ହୁଲାଙ୍ଗ୍ ନେ'ଲେକା ହବାଅଃଆ ଯେ, ଇସ୍ରାଏଲ୍ରେନ୍ ସାରେଜାକାନ୍ ହଡ଼କକେ ଓଡ଼ୋଃ ଯାକୁବ୍ଆଃ କିଲିରେନ୍ ବାଞ୍ଚାଅକାନ୍ ହଡ଼କକେ ଅକନ୍କ ଦାଲ୍କାଦ୍କ ତାଇକେନା, ଇନ୍କୁଆଃ ଚେତାନ୍ରେ ଆସ୍ରା କା ରିକାକେଦ୍ତେ, ଇସ୍ରାଏଲ୍ରେନ୍ ସାର୍ତି ଲେକାନ୍ ପାବିତାର୍ ପ୍ରାଭୁତାଃରେ ଆସ୍ରା ରିକାୟାକ। ସାରେଜାକାନ୍ ମେନ୍ଲେରେ ଯାକୁବ୍ଆଃ ସାରେଜାକାନ୍ ହଡ଼କ, ପେଡ଼େୟାନ୍ ପାର୍ମେଶ୍ୱାର୍ତାଃ ହିଜୁଃରୁହାଡ଼ାଃକ। ହେ ଇସ୍ରାଏଲ୍, ଆମାଃ ହଡ଼କ ଦରେୟାରେନ୍ ଗିତିଲ୍ ଲେକା ହବାଅଃ ରେୟଗି ସାରେଜାକାନ୍ ହଡ଼କ ଏସ୍କାର୍ ହିଜୁଃ ରୁହାଡ଼ାଃକ। ଧାର୍ମାନ୍ ହଡ଼କଆଃ ଟୁଡାଦାଆଃ ଲେକା ନକ୍ସାନ୍ ହବାଅଃଆ ଏନା ଠାହାରାଅକାନା। ପ୍ରାଭୁ, ପେଡ଼େୟାନ୍ ପ୍ରାଭୁ ସବେନ୍ ଅତେଦିଶୁମ୍କେ ଜିୟନ୍ ରିକା ନାଗେନ୍ତେ ଅକଆଃ ସାଲାକାଦାଏ, ଏନାକେ ପୁରା ରିକାୟାଏ।
ଆସେରିୟାକେ ପ୍ରାଭୁଆଃ ସାଜାଇ
ଏନାମେନ୍ତେ ପ୍ରାଭୁ, ପେଡ଼େୟାନ୍ ପ୍ରାଭୁ କାଜିତାନାଏ, “ହେ ସିୟୋନ୍ରେ ତାଇନ୍ତାନ୍ ଆଇଁୟାଃ ହଡ଼କ, ମିସାର୍ ଦିଶୁମ୍ରେନ୍ ହଡ଼କ ଲେକା ଆସେରିୟାରେନ୍ ହଡ଼କ ଆପେକେ ଦାଲ୍ପେରେଦ, ଓଡ଼ୋଃ ଆପେୟାଃ ବିରୁଧ୍ରେ ସଟା ରିମେ ରେଦ, ଆପେ ଇନ୍କୁକେ ଆଲପେ ବରକଆ। ଆଇଁୟାଃ ଖିସ୍ ଆମାଃ ବିରୁଧ୍ରେ ଇମ୍ତାଗି ସାଙ୍ଗିନ୍ ରିକାଅଃଆ। ଇନ୍କୁଆଃ ଜିୟନଃ ନାଗେନ୍ତେ ଆଇଁୟାଃ ଖିସ୍ ଇନ୍କୁ ଚେତାନ୍ରେ ଉୟୁଗଃଆ।” ସବେନାଃତେ ପେଡ଼େୟାନ୍ ପ୍ରାଭୁ, ହୋରେବ୍ ସେରେଙ୍ଗ୍ ହେପାଦ୍ରେ ମିଦିୟନ୍ ହଡ଼କକେ ମାଆଃ କେଦ୍କଆ, ଏନ୍ଲେକାଗି ନିକୁକେ ଚାବୁକ୍ଲଃ ହାଁଣ୍ସାକଆ ଓଡ଼ୋଃ ମିସାର୍ରେ ଚିଲ୍କା ଇନ୍କୁକେ ସାଜାଇ ଏମାକାଦ୍କ ତାଇକେନାଏ, ଏନ୍ଲେକାଗି ଆସେରିୟା ହଡ଼କକେ ସାଜାଇ ଏମାକଆ। ଓଡ଼ୋଃ ଏନ୍ ହୁଲାଙ୍ଗ୍ ହିଜୁଃରେ ଆଇଙ୍ଗ୍ ଆପେକେ ଆସେରିୟାରାଃ ଆକ୍ତେୟାର୍ଏତେ ରାଡ଼ାପେୟାଇଙ୍ଗ୍ ଓଡ଼ୋଃ ଇନ୍କୁଆଃ ଲାଦିୟାକାନ୍ ଆଡ଼୍ନା ଆପେୟାଃ ତାରାନ୍ରାଃ ଆଡ଼୍ନା କା ତାଇନାଃ ଚିୟାଃଚି ଆପେ ଆଶିଷ୍ ନାମାକାଦା।
ଆସେରିୟାରେନ୍ ସିପାଇକଆଃ ଲାଡ଼ାଇ
ଆସେରିୟା ହଡ଼କ ଆୟାତ୍ ନାଗାର୍ରେ ବଲ ତାନାକ, ଇନ୍କୁ ମିଗ୍ରୋଣ୍ ହରାତେ ସେନ୍ ଇଦିତାନାକ। ଓଡ଼ୋଃ ମିକ୍ମସ୍ରେ ଆକଆଃ ଜିନିଷ୍କ ହୁଣ୍ଡିକେଦ୍ତେ ଦହତାନାକ। ଇନ୍କୁ ଘାଟି ପାରମ୍କେଦ୍ତେ, ଗେବା ନାଗାର୍ରେ ମିଦ୍ନୁବାଃ ତାଇନ୍ୟାନାକ। ରାମା ନାଗାର୍ ପୁରାଃଗି ଥାର୍ଥାରାଅଃ ତାନା, ଶାଉଲ୍ଆଃ ନାଗାର୍ ଗିବିୟାରେନ୍ ହଡ଼କ ନେତେହାନ୍ତେ ନିର୍ତାନାକ। ହେ ଗାଲ୍ଲିମ୍ରେନ୍ ହଡ଼କ, କାଉରିପେ। ହେ ଲୟିଶାରେନ୍ ହଡ଼କ, ଆୟୁମେପେ। ଓଡ଼ୋଃ ଅନାଥୋତ୍ରେନ୍ ହଡ଼କ କାଜିରୁହାଡ଼୍ତାନା। ମଦ୍ମେନାରେ ତାଇନ୍ତାନ୍ ହଡ଼କ ନିର୍ ତାନାକ। ଗେବିମ୍ରେ ତାଇନ୍ତାନ୍ ହଡ଼କ ବର ବାନଃ ଠାୟାଦ୍ତେ ନିର୍ତାନାକ। ଏନ୍ ହୁଲାଙ୍ଗ୍ ଇନ୍କୁ ନୋବ୍ ସାହାର୍ରେ ତାଇନାଃକ। ଏନ୍ତେ ସିୟୋନ୍ ହନ୍କୁଡ଼ିରାଃ ବୁରୁ ଓଡ଼ୋଃ ଯୀରୁଶାଲେମ୍ ବିରୁଧ୍ରେ ଇନ୍କୁ ଆକଆଃ ତିଃଇ ରିମେୟାକ।
ନେଲେପେ, ପ୍ରାଭୁ ପେଡ଼େୟାନ୍ ପ୍ରାଭୁ, ପୁରାଃ ପେଡ଼େଃତେ ସବେନ୍ କତକକେ ମାଆଃଏୟା। ମାପ୍ରାଙ୍ଗ୍ ଦାରୁକ ମାଗଃଆ। ଓଡ଼ୋଃ ସାଲାଙ୍ଗି ଦାରୁକକେ ହୁପ୍ଡିଙ୍ଗ୍ଅଃଆ। ପ୍ରାଭୁ ହାକେଲଃ ବୁରୁରେୟାଃ ସବେନ୍ ଦାରୁକେ ମାଆଃଏୟା। ଓଡ଼ୋଃ ପୁରାଃ ପେଡ଼େୟାନ୍ନିୟାଃ ଆୟାର୍ରେ ଲିବାନୋନ୍ରାଃ ଜିୟନ୍ ହବାଅଃଆ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.