Zekaria 10

Juda hai Israeluüa naiungla kown mih laikham

1CHAKRAMANG dow uang pek miia chekhai.

Aia dow nathawp enni uangnim hanow nape enni uang kown,

aia dow uih-ien pantawn naiungla kownkow pe uang reng chekhai.

Naiawng rakowi satma khin khe uang nauangla kownkow

CHAKRAMANG tut-e lü büa diah.

2Arup arenuüa hownia dow asung uowi dowi mih prengia enni ka reng,

hawra sarauüa dow pur prakowi kowh lawnguan kowi küa dai reng.

Phuang mang miuüa dow dai lai hown pe sakowmra reng.

Tawkche nami sakowmra dow katpaw uang tachi dowi chekhai.

Naiawng rakowi enni dow tama mih ruapur iawng cham mangla pang khai,

enni kowh athing mih uowi dowi rakowi maru chang enni anowng apowng mih chekhai.

3CHAKRAMANG tek mih,

“Ruapur thing miuüa luk kowi ang kunmarau lün pluplup khai.

Naiawng rakowi amatni kowi ang naripah kown.

Ang, lang kri lang kraing mih CHAKRAMANG, ang maru Judauüa kowi ang namingkhetah kown,

now tasen müa kawrnga iawng akürma ang nathawpah kown.

4Kimchüng maten kowi kowh lang pankri mih dow klawngdawng chüng chekhai,

tangbung kowi kowh lang pankri mih dow atük müa chüng chekhai,

tasen müa kowi kowh lang pankri mih dow leba chekhai.

Nami powm iawng apankrima mih aluchowuüa maten dow Judauüa pungmadawng hownia nauang lawt kown.

5Nami khin khe dow Juda maru-uüa akürma naown kown,

amatni dow ransu-uüa kowi suplawk dawng kowi nathuaah kown.

Tasen mih khin khe paw amatni kowi ang natawi uowila kown.

Naiawng rakowi kawrnga kowi kowh chowm mih siphaiuüa kowi nanowngta büah kown.

6“Juda maru-uüa kowi akürma ang nathawpah kown;

Israeluüa kowi ang nalawngah kown.

Amatni luk kowi ang kowh sanara uowi reng.

Naiawng rakowi amatni pren kowi ang nauang plan pawla iawk kown.

Nami khin khe dow katpaw ang nuaah dowi tak mih iawng naown büah kown.

Ang CHAKRAMANG amatni kowh Thurai chekhai.

Naiawng rakowi amatni haw ang mih khin khe ang naklangah kown.

7Israeluüa dow siphai akürma miuüa iawng naown kown,

kham grep tui khe kowh iawng naawmrawm büah kown.

Nami khi hanow amatni kowh chauüa paw napiaw kown;

amatni kowh sak dow CHAKRAMANG luk kowi apiawma nauowi kown.

8“Amatni bowkbowk kowi hiu hown ang nahawah kown,

amatni kowi arasang ang nakuaah kown.

Amatni kowi ang nalawngah kown chekhai.

Naiawng rakowi alai kowh iawng maru iun akawmma naown büah kown.

9Akeng chenchapuüa tut-e ang cham pe tasetah khai.

Nachenganchepaw pren lakma hownia natuk ang büah reng kown.

Amatni hown amatni chauüa nasing reng kown,

now amatni dow amatni pren kowi nauang plan büah bowk kown.

10Aigupta pren hownia amatni kowi ang nauang plan pawla kown,

Asuria pren hownia ang nauang pawla hanow arasang ang nakuaah kown.

Gilead hown Lebanawn pren kowi amatni kowi ang nauang towah kown,

nakowi dow amatni uowi rah takowi dowi mowr maru iun nahu büah kown.

11Sata kowi kowh cham mang mih iawng akrat pusara nakrum büah kown.

Nachenganchepaw sata tuilowng dow ang narimta pe kown;

Nail awma tui abüpma mih ün dow nakang kown.

Asuria pren kowi kowh maru-uüa bawrira dow ang nachurta pe kown,

Aigupta pren kowi dow mang uowi kown nadowi bowt.

12Ang matia kür hown Israeluüa kowi akürma ang nathawpah kown,

now ang naukrang iawng amatni dow namang büah kown.

Ang CHAKRAMANG mami laiklow ang tek khowk,” pakhai.