Meng Klo 8

Amanau kowi malauüa prüaah mih

1Owh, au iawn kham mih ang kowh rakmow iawng en chowng khai panü,

prang kowi ang krum en chepaw ang naia nam en diah.

Amia iawng mih maru paw tawngpaw naia tek ang kown nadowi diah.

2En kowi dow au kim kowi ang nauang ia pawla en diah,

now nakowi changlawng plawngnau laiklow en naia tüngsang ang diah.

En kowi dow nam iungma mih chap hown rawah mih grep tui ang nape kham en diah,

now ang kowh adingma mih dalim uih tui paw ang nape kham en diah.

3Aia kowh lakuai rut kowi dow ang nüa lu khai,

now aia kowh hawmlawm rut hown dow dawi ang khai.

4Aw Jerusalem masiuüa, ang takham se ang tek enni khowk,

akhin taka dowi mowr dow hang cham tanau büa diah.

Jerusalem malauüa hawm kowh laiklow:

5Aia kowh klanguüa luk kowi takhemla se

süngrüp süngkangma hownia uang haimang mih mia chow?

Malauüa kowh laiklow:

Apel singh tut kowi en müi mih khin khe ang krüng en khai,

kimuowi mu rauma hown en u pen en mih dow nami arah re-e chekhai.

6En kowh sak kowi dow mur tuk ia iawng tow ang reng diah,

now en rut kowi paw mur tuk iawng tow ang reng diah.

Tawngplawng kowchow panow tanaukhira dow kowng kowi ia town dowi mih iawng akürma chekhai,

tanaukhira dow kowng iawng chur uowi dowi chekhai.

Tasakraura hownia kaah mih arau dow maih iawng chekhai.

Nami dow maih maten den lak-e lang den chekhai.

7Tuikling mangma tui hown paw tanaura mih nowngia mit dowi chekhai,

aw tui hown paw nami tanaura mih nowngia nawmla dowi chekhai.

Dawngthawnguan maten hown ran sakraura kown kamrüt mih dow maru maten sui mih lup naown kown.

Malauüa kowh rakmauüa laiklow:

8A-i kowh tuamow sawi uowi lowk ia chekhai,

aia kowh downgprang chak dow iuk dowi tak.

Aia hown che maru tachawng kown nau khai hanow

tawng chow aia vüi a-i nachang pe kown? 91

Aia che chowng tap khai panü

aia luk kowi tai hown alowngma mih kimkrowng a-i nathawp pe diah.

Aia che chowng kimbüng khai panü

aia luk kowi a-i nathawp pe abawng diah.

Malauüa kowh laiklow:

10Ang dow tap iawng chowdiah.

Tawkche kawmat dow ang kowh downgprang chak alowngma mih hungh iawng chekhai.

Naiawng rakowi ang kowh klanguüa dow aia kowi ang naia peah sak-ihra kown mih iawng khi ang khai.

11Mang Sawlawmawn kowh dow Baal-Hamawn pami arah kowi grep krum uowi lowk;

aia dow nami grep krum mih akeng mih maru tut-e pawngah khai,

now nami grep krum chang miuüa dow lowk ia kowi tai 1,000 iun chi aia kowi uang pawla pe khai.

12Ang kowh grep krum dow ang nau iawng ang nowng pe;

nami grep krum vüi tai 1,000 iun Sawlawmawn apek takla dowi tham.

Tawkche grep krum khet miuüa kowi tai 200 iun ang napeah kown.

Klanguüa kowh laiklow:

13Aw ang kowh manau, en dow bakan kowi uowi reng,

en auiuauüa dow en kowh klow ta reng chekhai.

Naiawng rakowi ang kowi paw en kowh klow pe tala ang dit snow.

Malauüa kowh laiklow:

14Aw ang kowh manau, uang haimang bowt;

nam iungma mih hungh luk kowi kowh ngahiu hai naki chah iawng uang haimang bowt.