Ruth 2

Ruth hai Boaz

1Naomi kowh dow ahua Elimelek hown kowh tasin taken mih maru uowi lowk ia chekhai. Aming dow Boaz chekhai, now aia dow kurengma hai ringkawra uowima mih maru chekhai.

2Akat khe anowkaw Naomi kowi Moab chenchap Ruth tek pe mih, “Laih kowi kowh dowh mih iakmow püi ang cham kua ü? Saksing sana ang kowh pe kua ang mih kung kowi chowtaih ang nakrawi kua kown,” pakhai.

Naomi tek pe mih, “Ow, cham kua bowt,” pape khai. 3Naiawng rakowi Ruth dow cham tarü khai, now laih kowi ngen iakmow miuüa kung kowi aia dow krawi kua iakmow püi khai. Aia krawi kua pe iakmow püi mih laih dow atarang Elimelek hown tasin taken mih Boaz kowh chekhai.

4Naiawng Ruth tawi kua iakmow mih khin khe Boaz dow Bethlehem hownia nami laih kowi uang khai. Now ngen iakmow miuüa kowi aia tek pe mih, “CHAKRAMANG pacham pe enni prasi lah,” pakhai.

Ngen iakmow miuüa klangah mih, “En kowi paw CHAKRAMANG pacham pe en prasi lah,” pape khai.

5Ngen iakmow miuüa kowi kowh aluchow kowi Boaz lüntaah mih, “Nami malauüa dow mia kowh chama chow?” pakhai.

6Nakhowk khe nami aluchow tek pe mih, “Nami malauüa dow Moab pren hownia Naomi hown kowh uang tawi mih Moab chenchap chowbowt. 7Nami masiuüa tek mih, ‘Sakrauma hown enni ngenah mih iakmow cheng hownia kowh ta dowh mih iakmow püi dow krawi pe kua ang büa diah,’ pah anging khai. Naiawng hai aia dow rauchow hownia kawmat mowr pat krawi kua reng tak chekhai; ni chut kowi tanai nawngchow ni!” pape khai.

8Nakhowk khe Boaz tek pe Ruth mih, “Sakrauma hown sünta diah. En mih nacham kua iakmow püi kownkow akeng laih kowi hang cham kowi tham bowt ba. Ang kowh lup chang mih masiuüa hawmh hown tawi uowi towbowt. 9Masiuüa hawmh ngen pe iakmow mih re-e krawi müah kaneu now amatni kung kowi krawi kua now na towbowt. Klanguüa hawmh nachang en naklak dowi kownkow amatni kowi ang tek pe khowk. En tui sakkrai now amatni uang towngla mih tui tawi kham taih,” pakhai.

10Nami laiklow tata hanow Ruth dow krawng kowi tabawk krawm se Boaz kowi chupah khai. Now tek pe mih, “Ang dow prenlang maru chowtaih. Nachenganchepaw tawngplawng kowchow towsak towtaima hown en saksing sana ang khai?” pape khai.

11Nakhowk khe Boaz klangah mih, “En hua kowng kung kowi en nawkaw vüi en chang mih maten dow ang ta chekhai. Nami klen kowi en u en pa hai en dia rah pren ta towla now tukah dowi mih chenchap pungmadawng kowi en uang tawi uowi khai pami paw ang ta. 12Naiawng rakowi en changah mih lup sung dow tataing iawng CHAKRAMANG pacham pe en lah. CHAKRAMANG Israeluüa kowh Thurai tut-e en uang tatung tanim khowk chedow aia mih en kowh kakbak maten achima pacham pe en lah,” pakhai.

13Nakhowk khe Ruth tek mih, “Aw ang kowh chakramang, en dow saksing sana ang khai. Ang dow en kowh narma paw nadowi chekhai. Nachenganchepaw en tek ang sakkhawtra lai hai en pe ang sakklamra khai,” pakhai.

14Now chak khin khe Boaz tek pe Ruth mih, “Mami re-e uang chowm bowt. Now paw kawmpah hanow grep hown kowh thawpah mih tui sur kowi tawi tuk now tawi cha diah,” pape khai.

Ngen iakmow miuüa re-e Ruth uang chowm hanow Boaz dow haiah mih chakkham Ruth kowi peah ne khai. Now naiawngün dow du pat aia cha kung kowi paw ta lat ne tak chekhai. 15Nami kung kowi nacham kua iakmow iawk kownkow Ruth awr rü khe Boaz tek pe aia maru-uüa mih, “Iakmow cheng hownia aia paw iakmow püi khai chepaw aia kowi hangkow nangah büa diah. 16Enni chengah mih iakmow cheng hownia aia vüi howkah now ta towla pe ne diah, now aia kowi pe lümah büa diah. Aia kowi hangkow nangah büa diah,” pape khai.

17Ruth dow nami laih kowi sat kup dowi mowr krawi kua iakmow püi khai. Nami iakmow dow aia thuaah kung kowi khaiah pache hamüt set ngia chekhai. 18Nami iakmow dow kua kowi aia kurla khai. Now anowkaw dow Ruth uang kuala mih iakmow hawt khi khai. Now ni-e khe kowh aia chak kung kowi kowh ta lat mih chakkham dow anowkaw kowi aia peah khai.

19Ruth kowi anowkaw lüntaah mih, “Ani dow tawng kowi chow en cham kua? Tawng kowi chow en cham chang lup? Saksing sana en mih maru kowi dow Thurai pacham peah prasi lah,” pakhai.

Nakhowk khe mia laih kowi chow aia cham chang lup mih lawnguan anowkaw kowi lawp pe khai. Aia tek pe mih, “Ang chang pe lup mih laih iah ming dow Boaz chekhai,” pape khai.

20Nami laiklow tata hanow Naomi tek pe aiaumow mih, “Kawmat kowh sing uowi miuüa hai kowng khowk miuüa luk kowi kaah sakowm iawng chang pe reng mih CHAKRAMANG dow aia kowi pacham peah prasi lah,” pakhai. Nami klen kowi Naomi plan tek mih, “Nami maru dow a-i hown tasin taken mih chekhai. Aia dow ang hua takcha a-i kimchak kowi nalawng kownkow kurdik uowi mih maru chekhai,” pakhai.

21Moab chenchap Ruth tek pe mih, “Nami klen kowi aia tek ang mih, ‘Ang kowh iakmow ngen khowk dowi mowr dow ang kowh maru-uüa hown tawi uowi towbowt,’ pah ang khai,” pakhai.

22Nakhowk khe aiaumow kowi Naomi tek pe mih, “Iung khowk. Aia kowh lup chang mih masiuüa hawmh hown en tawi taiua uowi mih nalang iung kown. Nahanow akeng mih maru-uüa naia pusa en kown nadowk,” pape khai.

23Naiawng rakowi iakmow hai püm ngen khowk dowi mowr Ruth dow Boaz kowh lup chang mih masiuüa hawmh kung kowi tawi kua püm hai iakmow püi khai. Nami khin khe aia dow anowkaw hown taiua uowi khai.