Meng Lai 18

CHAKRAMANG dow ang kowh Singku Huamang

Mami dow David kowh meng chekhai. Mami meng dow mang Sawl hai akeng mih ransu-uüa hownia David kowi CHAKRAMANG lawngah mih khin khe kowh CHAKRAMANG vüi David tekah mih chekhai.

1Aw CHAKRAMANG, ang kowh kürra dow en chowtaih,

en kowi dow ang sakrau en reng chekhai.

2CHAKRAMANG dow ang kowh Singku Huamang chekhai,

aia dow ang kowh akhawtma mih kangchawngra kim hai lawng miia chekhai.

Aia dow ang kowh Thurai hai ang kowh Singku Huamang chekhai,

ang tatung tanim mih dow aia tut-e chowtaih.

Thurai dow ang kowh taka müa kawngma chekhai,

aia dow nang iawng mih kür hown lawng ang reng chekhai,

aia dow ang kowh alowngma mih tatung tanimra chekhai.

3CHAKRAMANG kowi dow ang hawah khai,

now aia dow ang kowh ransu-uüa hownia lawng ang khai.

CHAKRAMANG dow akiow taing chekhai!

4Kramra uowima mih kowngra dow umta ang lut khai,

ang luk kowi dow tui lawt iawng piakra uang kla khai bowt.

5Kramra uowima mih kowngra dow umta ang lut khai,

kowngra dow chak ang leng khai.

6Ang kla phih khe CHAKRAMANG ang kowh Thurai kowi ang hawah khai,

nauang khowng ang kownkow aia tut-e ang awr kar awr nguk khai.

Aia dow aia uowi rah hownia ang awr lüah mih hawt sünta ang khai,

ang kar ang nguk mih aia param kowi kowting khai.

7Nakhowk khe lusa dow chür nukluk hai tahowng nurlur khai,

hungh kowi kowh achüng maten dow chür nukluk khai.

Naiawng phaw mih dow Thurai kunmarau rakowi chekhai.

8Aia nakawng hownia dow maikhük awr towk iualua khai,

aia kowh nawr hownia dow piakla mih maih uang lawt khai,

aia nawr kowi kowh maivia dow awr lün khai.

9Aia dow mukuang nitah lang hanow lusa kowi uang iu dowm khai,

aia khawk daw kowi dow uangnim iiuma chekhai.

10Aia dow Cherup pami kramamu luk kowi chowm hanow uang iow khai,

aia dow li hown alenma uang iow khai.

11Aia dow aiiu hown aia matia kowi petah khai,

aia riaret kowi aiiuma mih uangnim dow tui kangowh chekhai.

12Aia pur kowi anowi uang ting hanow aiiu dow lang tahen khai;

nahanow nami uangnim hownia dow kaikreng hai ria mih uang kla khai.

13CHAKRAMANG dow mukuang hownia tüng klow khai,

muk tün hai kaikreng tün kowi lang kri lang kraing mih Thurai kowh klow ta chekhai.

14CHAKRAMANG dow ransu-uüa kowi salangba hown ap-ah hanow cham uetta plawt khai,

amatni kowi dow pla nowi hown aia pe takrow takraiah khai.

15CHAKRAMANG dow ransu-uüa kowi nangah khai,

aia dow nakawng hownia plawt kawli khai.

Nahanow krawng dawng tui dow uang tatüng khai,

now lusa chüng maten dow uang tatüng khai.

16Aia dow mukuang hownia iu iaw rut hanow iu dowk ang khai,

tui büpma mih hownia dow aia uang khowngla ang khai.

17Aia dow ang kowh akürma mih ransu-uüa hownia lawng ang khai,

aia dow sui ang miuüa hownia lawng ang khai.

Tawngplawng kowchow panow amatni dow ang lak-e lang kür chekhai.

18Ang kla phih khe amatni dow uang sen ang khai.

Nachenganchepaw CHAKRAMANG dow uang dowk ang khai.

19Aia dow aiungma mih arah kowi uang pawla ang khai,

ang luk kowi aia sak-ih ang khai.

Naiawng rakowi aia lawng ang khai.

20Ang kowh anowmma mih lup rakowi CHAKRAMANG chang ang aiung khai,

ang kowh tachi tanawm rakowi aia dow pe ang awmrawm sung khai.

21Tawngplawng kowchow panow ang dow CHAKRAMANG tiama kowi mang reng chekhai,

Thurai kowi kingküala mih angak dow ang chang dowi chekhai.

22Aia kowh ari aiang maten dow ang chün reng,

aia kowh rirow hownia dow ang cham süt dowi chekhai.

23Aia pur kowi dow ang kowh angak uowi dowi chekhai,

angak hownia ang lang tahen reng chekhai.

24Ang kowh lup nowm rakowi CHAKRAMANG dow chang ang aiung khai,

ang kowh tachi tanawm rakowi en dow pe ang awmrawm sung khai.

25Aw CHAKRAMANG, en kaah sakowm miuüa kowi dow kaah sakowm iawng en chang pe reng,

aiungma miuüa kowi dow aiungma en chang pe reng chekhai.

26Achinawmma miuüa kowi dow achinawmma en chang pe reng,

kuanla miuüa kowi dow angakma en chang pe reng chekhai.

27Khamsum khamdawma miuüa kowi dow en takhula reng.

Tawkche bawrima miuüa kowi dow en piakah reng chekhai.

28Aw CHAKRAMANG ang kowh Thurai, en dow ang kowh maibu chekhai,

aiiu kowi ang uowi khe en tüng ang anowi reng chekhai.

29En kowh kür hown ransu siphaiuüa kowi ang nowng sen khai,

ang kowh Thurai khowngra hownia amatni kowh tap kowklaw hanow

alak kowi ang kownowng kup khai.

30Thurai kowh tiama dow aser auowk uowi dowi chekhai,

CHAKRAMANG kowh laikham aching pami dow uang tatüng khai.

Aia dow aia tut-e kowh uang tatung tanim miuüa kowh kawngma iawng chekhai.

31CHAKRAMANG klen kowi dow akeng mih Thurai lang uowi dowi bowt,

a-i kowh Thurai klen kowi dow akeng mih singku huamang lang uowi dowi bowt chekhai.

32Thurai dow pe ang kür reng chekhai,

now aia dow ang kowh tiama mih aiungma chang ang khai.

33Aia dow ngahiu iia iawng alenma naiowmla kown mih kür pe ang khai,

now alowngma mih hungma mawngma kowi thaulangma aia pe uowi ang khai.

34Aia dow tawng iawng chow natasenah kown mih tüngsang ang khai.

Naiawng rakowi kri hown kowh salangba dow ang nowng uüi khai.

35Aw CHAKRAMANG, en dow en lawngla ang mih en kowh kawngma en pe ang khai,

en kowh hawmlawm rut hown en dowkta ang hüah khai.

Now en khowng ang mih hownia kri kraingma ang phaw khai.

36Ransu-uüa sen ang khe en khowng ang khai.

Naiawng rakowi ang tatheu dowi chekhai.

37Ang kowh ransu-uüa kowi kawikrawiah hanow ang saiah khai,

amatni kowi ang saita dowi mowr ang plan kung dowi chekhai.

38Amatni kowi dow ang sawtah khai;

nahanow amatni dow ang khawk daw kowi tim büah khai.

Amatni dow hing nowng rü dowi bowt chekhai.

39Natasenla kown mih kür pe ang mih dow en chowtaih,

ang ransu-uüa kowi dow ang khawk daw kowi en towah khai.

40Ang kowh ransu-uüa kowi dow ang hownia en prütah khai,

sui ang miuüa kowi dow ang piakta khai.

41Amatni dow krawi lü khowng khai.

Tawkche amatni kowi dow miapaw takhula dowi chekhai.

Amatni dow en tut-e awr lü khowng khai.

Tawkche en dow amatni kowi klangah dowi chekhai.

42Amatni kowi dow dinchow iawng adima ang changah khai,

amatni kowi dow tiama kowi kowh suplawk iawng ang thuata nak khai.

43Aw CHAKRAMANG, ang kowh maru-uüa kingküara hownia en lawng ang khai,

akeng chenchapuüa luk kowi aluchow en tow ang khai.

Akeng chenchapuüa khowm kawmat ang krüa kowi chang lup khai.

44Prenlang maru-uüa dow ang kowh laiklow ta hown krowksang ang tek iawng chang reng,

amatni dow ang pur kowi tabawk krawm se uang khamsum reng chekhai.

45Amatni kowh dow sakowmra uowi dowi bowt chekhai,

amatni dow chürla kluk se akhawtma mih kangchawngra kim hownia uang lawt khai.

46En dow masing CHAKRAMANG chekhai,

ang kowh Singku Huamang dow akiow pacham uowi lah.

Thurai dow ang kowh lawng miia chekhai,

en kowh ringkawra dow pacham hu lah.

47En dow ang vüi kowi paw lu klai reng chekhai,

akeng chenchapuüa kowi dow ang nimkrüa kowi en towah khai.

48En dow ransu-uüa rut hownia lawng ang khai,

chang ang nowng miuüa rut hownia paw en lawng ang khai.

Ransu-uüa luk kowi dow en pe awng ang khai.

49Naiawng rakowi aw CHAKRAMANG, akeng chenchapuüa pungmadawng kowi ang nakiow en kown,

en ming hown ang natek rowsi meng kown.

50En kowh mang kowi dow kri kraingma mih awngra en peah reng,

en nümnapah mih maru kowi dow achur uowi dowi mih sakraura en tüng pe reng chekhai.

David kowi dow chowngchowng saksakma en sakrauah khai,

aia krungchakuüa kowi paw chowngchowng saksakma en sakrauah khai.