Meng Lai 147:3

CHAKRAMANG dow sak piak miuüa kowi peah iungra reng

1CHAKRAMANG kowi kiow büa diah.

A-i kowh Thurai kiow meng tek dow lainowmma iung chekhai,

aia kowi nakiowah kown mih lainowmma tataing khai.

2CHAKRAMANG dow Jerusalem marow mih plan thawpah khai,

now cham taset plawt mih Israeluüa kowi dow nami marow kowi aia uang plan kuala khai.

3Sak piakma miuüa kowi dow aia peah iungra reng chekhai;

amatni kowh ma dow aia bawm pe reng chekhai.

4Aia dow krek ün rüaah reng chekhai,

naiawngün krek kowi dow aia chap pe ming reng chekhai.

5Anging kowh CHAKRAMANG dow kri kraingma hai akürma chekhai,

aia kowh chanlaira dow achur uowi dowi chekhai.

6CHAKRAMANG dow khamsum khamdaw miuüa kowi khowngah reng.

Tawkche maru ngakuüa kowi dow bawn dawng kowi aia theuah reng chekhai.

7CHAKRAMANG vüi kowi tek awmrawm meng büa diah,

tepla taraw se a-i kowh Thurai vüi kowi tek rowsi meng büa diah.

8Aia dow uangnim hown mukuang kowi tungah reng,

lusa kowi dow aia uang chin pe uang reng chekhai.

Now krawng luk kowi dow pram aia awr pe awmah reng chekhai.

9Aia dow tawncher hawmh kowi peah chakkham reng,

uaak chauüa lü chakkham khe paw aia peah chakkham reng chekhai.

10Kawrnga akürma mih kowi dow aia awmrawm dowi chekhai,

siphai khawk akürma mih kowi paw aia awmrawm dowi chekhai.

11Aia dow aia kowi ringkawma hown kram miuüa kowi chowtaih awmrawm reng,

aia kowh achur uowi dowi mih sakraura luk kowi owmsak miuüa kowi chowtaih aia awmrawm reng.

12Aw Jerusalem, CHAKRAMANG rowsi meng tek diah,

aw Zaiawn, en kowh Thurai kowi kiow diah.

13Aia dow en kowh tapplawt aklia müa kowi ün akhawtma changah khai,

en marow kowi kowh uowi miuüa kowi dow en peah prasi khai.

14En kowh rihi ün kowi aia dow thaulangma towah khai,

now aia dow lang iung mih chakkham hown pe en sak-ihra khai.

15Aia dow lusa kowi uang chin ana khai,

nami ana dow lusa mih alenma chünah khai.

16Aia dow ruapur pawi iawng nangkhe uang pe klaah khai,

nami nang dow plawi iawng aia krawi uetah khai.

17Aia dow ria klu mih kawmpah sek iawng uang pe klaah khai;

aia kowh arua kowi amia chow nowng kham?

18Aia kowh ana pek hown ria klu ter reng,

aia uang chin li now nami ria tui dow hawr reng chekhai.

19Aia kowh laiklow dow Jakawb tut-e aia phuangah khai,

now aia kowh ari arow hai ari aiang dow Israel tut-e aia uang phuangah khai.

20Aia dow akeng chenchap vüi kowi naiawng chang pe dowi chekhai,

amatni dow aia kowh ari arow tuk dowi chekhai.

CHAKRAMANG kowi kiow büa diah.