Meng Lai 139

Aw CHAKRAMANG, chaing ang diah

Mami dow David kowh meng chekhai.

1Aw CHAKRAMANG, en chaing ang khowk chekhai,

now ang lawnguan kowi en tuk bowk khowk.

2Ang changah mih maten dow en tuk bowk khowk;

en dow ang tuak mih ün alakma hownia en tuk chekhai.

3Ang cham mang mih hai ang tanai mih en khi bowk,

ang changah mih lup maten dow en tuk bowk chekhai.

4Aw CHAKRAMANG, ang tek lai dowi rawn

tawng chow ang natek kown mih en rik tuk bowk.

5Ang hawmlawm lakuai, kung pra pur pra en uowi reng,

now en kowh kür hown en uang towkala ang reng chekhai.

6Ang lawnguan kowi en tuk mih dow abüpma chekhai.

Nami dow ang kowh tukra hown ang nowng um dowi.

7En kowh lümla hownia ang nowng powt dowi chekhai,

en pur hownia tawng kowi paw ang nowng powt dowi.

8Mukuang kowi ang kowpün chepaw nakowi en uowi,

tadupra kowi ang cham uowi chepaw nakowi paw en uowi chekhai.

9Satlawt prakowi ang cham iow ving chepaw,

satkup pra sata paipra pown kowi ang cham uowi chepaw,

10nakowi paw en kowh rut hown en nakrui ang kown,

en kowh hawmlawm rut hown akhawtma en nadowk reng kown.

11“Aiiu mumta ang klum kown chekhai,

now ang ria kowi kowh anowi paw naiiu kown chekhai,” pahai ang tek chepaw tawngpaw mrawkra nauowi kown nadowi.

12Tawngplawng kowchow panow nami iiu dow en tut-e iiu dowi chekhai;

en tut-e dow uar-e paw ni-e iawng anowima tawk pluplup chekhai,

now en tut-e dow aiiu hai anowi katsang taih chekhai.

13Ang kowh buk kow maiow thawp mih dow en chowtaih,

au mu lak kowi en rut hown ang kowh buk en tawng ang khai.

14Aw CHAKRAMANG, en chaing ang khowk chekhai,

now ang lawnguan kowi en tuk bowk khowk chekhai.

Awdara uowima hown en thawp ang khai.

Naiawng rakowi ang kiow en khai.

En kowh lup maten dow awdara uowima kangowh.

Nami dow aiungma ang tuk chekhai.

15Miapaw khi-ah dowi mih arah kowi thawp ang reng tak khe ia en khi ang reng,

naukim kowi ang kowh buk kow awr tarowng phaw khe ia en khi ang reng chekhai.

16En dow ang uang dia dowi rawn hownia khi ang chekhai,

ang kowh chownglawng uown tarowng dowi rawn hownia

ang chownglawng kowi naphaw kown mih maten en kowh chabowih kowi arui uowi bowk chekhai.

17Aw Thurai, en kowh taukra dow ang tut-e asung uowima chekhai.

Nami dow hu krang nowng rüaah dowi mowr chekhai.

18Naiawngün ang rüaah e dow sata pang kowi kowh sema lak-e nahu kown.

Ang rü müi khe paw ang re-e en tawi uowi reng chekhai.

19Aw Thurai, maru ngakuüa kowi en saita bowk kown mih ang nau,

sai maru sak miuüa low, ang hownia alakma kowi powt büa diah.

20Ransu-uüa dow saktuak ngak hown en lawnguan kowi tek naklak chekhai,

amatni dow en ming rük naklak chekhai.

21Aw CHAKRAMANG, sui en miuüa kowi ang suiah dowi pabow?

Now kingküa en miuüa kowi ang suiah dowi pabow?

22Amatni kowi dow sui chamang ang suiah khai,

amatni kowi dow ang nüla ang kowh ransu reng chekhai.

23Aw Thurai, chaing ang diah,

now ang kowh saktuak nowkah khaiah diah.

24Ang tut-e angak chap uowi khai ne chünchü sam mü madiah,

now achowngma kala singra mih tiama kowi krui ang diah.