Chanlai Lawng 9

Chanlaira kowh lup

1Chanlaira dow aiamat vüi thawp kim khai,

aia dow hua huiia hown thawp pe chüng ranit klüng khai.

2Aia dow ngen tawncher hanow eng chaknga khai,

grep tui kowi dow nam iungma mih chap aia phiowla pe khai.

Naiawngün dow pawitang kowi aia thenah khai.

3Aia dow nakrawi haw maru-uüa kownkow anarmauüa kowi cham chinah khai,

aia dow marow kowi kowh arah lang lowng mih hownia krawi haw maru mih,

4“Abualama miuüa low, mami re-e uang büa diah,” pakhai.

Prengia uowi dowi miuüa kowi aia tek pe mih,

5“Uang büa diah, ang kowh chakkham uang cha diah,

nam iungma mih chap hown ang phiowah mih grep tui uang kham diah.

6Abualama miuüa hown hang taiua diah,

tukra tiama kowi mang diah,

nahanow en nasing kown,” pakhai.

7Khare dawma mih maru kowi hawi mih dow ka rukrai reng,

maru ngak kowi tüng pe atawi mih dow tawi ka ngak reng chekhai.

8Khare dawma mih maru kowi hangkow tüng pe atawi diah,

en che tüng pe atawi hanow aia dow nasui en kown.

Chanlaima mih maru kowi tüng pe atawi diah,

nahanow aia dow nasakrau en kown.

9Chanlaima mih maru kowi sangah diah,

nahanow aia mih nalang chanlai ngamlam kown.

Thurai kowi ringkaw mih maru kowi tüngsangah diah,

nahanow aia mih nalang tuk ngamlam kown.

10CHAKRAMANG kowi ringkawma hown kram mih dow uown ka chanlaira mih chekhai,

Chimsaima mih Thurai kowi tuk mih dow tukra uowi mih chekhai.

11Prengia iung hownia akrama en nasing kown,

chowngdawng sakklangma en nasing kown.

12En che chanlai khai hanow en kowh chanlaira dow en iung müa chekhai,

now en che krawi khare khai hanow nami dow en matia tatowk kawm mih chekhai.

Prengia uowi dowi mih kowh lup

13Bualama mih maru dow taran dawma mih masiuüa iawng,

aia dow aiamat buala mih tuk dowi chekhai.

14Aia dow aia kimplawt re-e chowm reng,

marow kowi kowh arah lang lowng mih kowi chowm reng.

15Nami tiama iawng mang miuüa kowi dow aia krawi hawah khai,

chowlowkkow lup nachang kownkow nami tiama iawng mang miuüa kowi aia krawi tek pe mih,

16“Abualama miuüa low, mami re-e uang büa diah,” pakhai.

Prengia uowi dowi miuüa kowi aia tek pe mih,

17“Cham kuah mih tui dow lang ding,

cham kuah mih chakkham dow asowr lang uowi,” pakhai.

18Tawkche nami masiuüa kim kowi kowkowi miuüa dow amatni nakowng kown mih tuk dowi,

nami masiuüa tut-e uang miuüa kowh uowi rah dow krawng dawng kowi chekhai.