Chanlai Lawng 31

Mang Lemuel kowh laiklow

1Maiawngün dow mang Lemuel kowi kowh a-u sangah mih laiklow chekhai. A-u tek pe mih,

2“Chapa ow, en dow ang pen en mih chah chekhai,

Thurai tut-e awr lüah kowh ang ka en mih chekhai.

3Masiuüa tut-e hangkow iawm kür diah,

masiuüa dow manguüa kowi piak mih chekhai.

4“Aw Lemuel, manguüa nakham grep tui kown mih taka dowi,

kruitown miuüa nalü arak kown mih paw taka dowi chekhai.

5Amatni che kham rak khai hanow natamata rirow kown,

now ngarai miuüa kowi nachet pe tara nowm kown nadowk.

6Kowng kown chowbowt miuüa kowi peah arak diah,

tuak kawm tuak krat miuüa kowi peah grep tui diah.

7Nahanow amatni dow amatni khawr mih lawnguan natamata kown towbowt,

now amatni kawmkrat mih lawnguan paw natamata kown towbowt.

8Kowmatia vüi tuk prow tuk tek dowi miuüa kowi tawi prow pe diah,

ngarema miuüa kowh kak tataing mih vüi tawi prow tawi tek pe diah.

9Uowi phülü dowi hai chet tara nowm diah,

krat miuüa hai ngarai miuüa kowi tawi chet pe tara nowm diah,” pakhai.

Masiuüa iung kowh chowm krang uowi krang

10A-u plan tek mih, “Masiuüa iung ka kown mih dow akratma chekhai.

Nami dow asung khakma mih hua lak-e khowm asung lang uowi chekhai.

11Aia kowi dow ahua owmah reng chekhai,

aia rakowi lakke mih maten ahua ka reng chekhai.

12Aia sing uowi mowr dow ahua iung müa aia chang reng,

ahua piakla müa dow aia chang dowi chekhai.

13Aia dow ruapur pawi hai adipükchow mih la cham krawi paw reng,

nami hown dow sak sowrma hown aia chang lup reng.

14Aia dow changla kun mih chawnlawng iawng,

aia dow alakma hownia cham paw chakkham reng chekhai.

15Aia dow mur rü hanow kimchakuüa vüi kamrüt pe chakkham reng,

now anarmauüa nachangah kown mih lup bak paw aia khowm bowk pe reng chekhai.

16Aia dow ran laih dowi rawn rik müah kaneu hanow ran reng,

aia dow aia kramah mih tangka hown chang grep krum reng.

17Aia dow aklumma hai akürma chekhai,

now towsakma hown chang lup reng chekhai.

18Aia kowh lup hownia maratra uang ting mih dow aia tuk chekhai,

aia dow iak-e paw maibu nowi kowi chang lup reng chekhai.

19Aia dow lum la reng,

now kawng uan reng chekhai.

20Aia kowh rut dow ka dowi miuüa kowi iaw pe reng,

aia kowh bawng dow ngaraima miuüa dawiah reng chekhai.

21Arua khin uang ting chepaw aia kimchakuüa vüi tawngpaw tuak krat dowi chekhai.

Tawngplawng kowchow panow amatni vüi dow kowrmow awm uowi bowk chekhai.

22Aia dow phangbek luk kowi kowh dau müa uanthowr kawng reng,

aia khupah mih paw adipükchow mih la hown kowh tawnguat hai asung khakma mih aruachow mih tawnguat chekhai.

23Ahua dow marow tapplawt kowi ka ringkawra reng,

now nakowi dow pren kowi kowh lawngtang aluchowuüa hown taiua chowm reng.

24Aia dow adipükchow mih la hown kawng tawnguat hanow sumah reng,

kekawm uan ün dow chang kun miuüa kowi aia sum pe reng chekhai.

25Aia kowh kürra hai ringkawra dow uowi ahuma,

pur pra kowh lawnguan kowi kram dowi kowh ren reng.

26Aia dow chanlaira laiklow krawi tek reng,

now sakrau saktuak hown krawi tüngsang reng.

27Aia dow kimchakuüa lakke takla mih lawnguan kowi pe ching reng,

aia dow silikma uowi phülü dowi chekhai.

28Achauüa dow aia kowi kiowah reng,

now ahua paw kiowah se maiawng tek pe reng:

29‘Lusa kowi masiuüa aiungma mih uowi ahuma chekhai.

Tawkche kowbüah lak-e en lang iung chekhai,’ pakhai.

30Sangprowk lai tek iungma mih dow nowngia kuan reng,

now klangiungra paw nik dowi chekhai.

Tawkche CHAKRAMANG kowi ringkawma hown kram mih masiuüa dow ka kiowra reng chekhai.

31Naiawng mih masiuüa kowi peah ringkawra diah,

now aia changta mih lup rakowi maru pur kowi kiowah diah,” pakhai.