Chanlai Lawng 23

6 Kowi kowh laiklow

1Kruitown mih hown en taiua cha chakkham khai hanow,

en pur kowi tawng chow uowi mih müah kaneu diah.

2En che chak kürma hanow kaneu diah,

chakkham chak eta nown diah.

3Aia kowh chak iung kham iung hangkow ir diah.

Tawngplawng kowchow panow aia dow nakuan en kownkow pe cha en mih chepaw naia kown.

7 Kowi kowh laiklow

4Kurengra prakowi khowt pat hang towk iow diah,

naiawng chang kown mih saktuak taingta diah.

5Tangka pawisa dow akhowk lenma chekhai;

naiawngün dow uamu iawng alap awm reng,

now uamu iawng kuang kowi iow reng chekhai.

8 Kowi kowh laiklow

6Sipma mih maru kowh chakkham hangkow tawi cha diah,

aia kowh chak iung kham iung hangkow tawi ir diah.

7Tawngplawng kowchow panow aia dow aia kowh chakkham sung tuak reng;

aia dow “Du pat cha ba,” padow tek en reng.

Tawkche aia kowh saktuak dow aia laiklow iawng nadowi chekhai.

8En chata mih khowm nahükta kown mih en nanau kown,

now aia kowi kowh en kiowta mih dow naiawm kown.

9 Kowi kowh laiklow

9Bualama mih maru hown hangkow talawp diah,

en kowh prengia lai dow aia nasui en kown chekhai.

10 Kowi kowh laiklow

10Achük alai khe kowh rihi mat müa hua ai hangkow sütsowi diah,

now saratchowuüa kowh krawng bawn paw hangkow krawi khünta pe diah.

11Tawngplawng kowchow panow amatni kowh lawng miia dow akürma chekhai,

aia dow amatni kowi tawi tangila hanow natawi kingküa en kown.

11 Kowi kowh laiklow

12Tatüng tasang prakowi towsak diah,

now tukra laiklow kowi pe param diah.

12 Kowi kowh laiklow

13Chauüa kowi pringah hawiah reng diah,

müa hown ripah chepaw aia dow kowng dowi tham.

14Aia kowi dow müa hown naripah kown,

nahanow aia dow kowngra hownia naia plai kown.

13 Kowi kowh laiklow

15Chapa ow, en che chanlai khai hanow,

lainowmma ang naawmrawm kown.

16En che tek lainowm khai hanow,

lainowmma ang napiaw kown.

14 Kowi kowh laiklow

17Maru ngakuüa kowi hangkow irsi diah,

nami lak-e CHAKRAMANG kowi ringkawma hown kramah diah.

18Naiawng che en chang hanow pur prakowi en naiung kown,

now en kowh sakowmra mih nauang tachi kown.

15 Kowi kowh laiklow

19Chapa ow, ang laiklow sünta hanow chanlai diah,

now tiama nowm kowi namang kown mih kowi pe ching diah.

20Apuama miuüa hown hang tawi taiua diah,

chak kürma miuüa hown paw hang tawi taiua diah.

21Tawngplawng kowchow panow arak kham kürma miuüa hai chak kürma miuüa dow ngarai reng,

cha müi cha müi chang miuüa dow ngarai rakowi atheknama mih tawnguat khup reng chekhai.

16 Kowi kowh laiklow

22Pe en chownglawng mih en pa laiklow sünta diah,

en u lawngtang khowk hanow mingkhetah diah.

23Anowm, chanlaira, tüngsangra hai aiung angak tukra nakala kownkow towk iow reng diah,

naiawngün dow en kata khowk hanow hangkow iawmah diah.

24Achinawmma mih chauüa rakowi dow u-pa awmrawm reng,

chanlaima mih chauüa rakowi dow u-pa piaw reng chekhai.

25En u en pa awmrawmla iawng chang lup diah,

pen en mih en u piawla iawng chang lup reng diah.

17 Kowi kowh laiklow

26Chapa ow, ang tüng ang sang en mih kowi pe ching diah,

ang changah mih lup hownia mü ku diah.

27Chawkkrawma dow kuam büpma mih iawng kramra uowima,

chang iang mih masiuüa dow abüpma mih tuikuam iawng kramra uowima chekhai.

28Naiawng mih masiuüa dow damra iawng hawt pawm hüah reng,

amatni rakowi dow kaah sakowm dowi mih maru iun uang lang kawm ngamlam chekhai.

18 Kowi kowh laiklow

29Mia iawng mih chow kawm reng?

Mia iawng mih chow kar hai nguk reng?

Mia iawng mih chow taran reng?

Mia iawng mih chow klawk uailai reng?

Mia iawng mih chow ka ngarau reng?

Mia iawng mih chow mik rikma phaw reng?

30Naiawng phaw mih dow ahuma kham rak miuüa kowh chowtaih,

amatni dow nakham ngamlam kownkow asar asar krawi paw arak reng chekhai.

31Arak tui dow apowm klangiungma chekhai.

Nami dow bia kowi klinah khe chimprowngchow chekhai,

now iu khamah khe paw asowrchow chekhai.

Tawkche en mih hangkow tawi ir diah.

32Tawngplawng kowchow panow achur kowi nami dow rua iawng chawt reng,

akruma mih rua iawng nami dow chawt reng chekhai.

33Nakhowk khe en dow nacham khi naklak kown,

now nacham tuak naklak hanow en tek naklak kown.

34Sata kowi kowh chawnlawng kowi talek lawlaw mih maru iawng en naown kown,

talek liplip lawplawp se chawnlawng mang khe kowh maru iawng en naown kown.

35“Kowbüah bawp ang tawkche ang ka arau dowi,

kowbüah tep ang tawkche ang tuk dowi.

Tawng khe chow ang naawr thowr kown,

ang thowr now ang ka kham rak iawk kown bow?” padow en natek kown.