Chanlai Lawng 20

1Kham rak mih dow chanlai kowh nadowi chekhai;

aia dow pua khowk hanow krawi towk ran reng.

2Mang kowh kunmarau dow krangsi hek klow iawng kramra uowima chekhai,

aia kowi peah kunmarau mih maru dow nakowng kown.

3Takhowk taranra hownia lang tahen mih maru dow ka ringkawra reng.

Tawkche bualama miuüa dow takhowk taran kowi anauma chekhai.

4Silikma mih maru dow akhin khe luprak mih ienah dowi chekhai.

Naiawng rakowi luprak ngen khin khe aia nau chepaw tawngpaw naka kown nadowi.

5Maru kowh saktuak dow krawng dak tui iawng abüpma chekhai.

Tawkche prengia uowi mih maru dow maru kowh saktuak ka khüm reng chekhai.

6Kaah sakowmma mih maru pahai kowmatia kowi takham mih uowi ahuma chekhai.

Tawkche krawi müah e dow kaah sakowm mih maru hing uowi dowi chekhai.

7Achinawmma mih maru dow tiama nowm kowi mang reng;

naiawng mih maru kowh chauüa dow prasira uowima chekhai.

8Mang dow aia kowh chowm rah kowi chowm hanow chet tara reng.

Nakhowk khe chang ngak mih maru kowi aia ka khüm reng chekhai.

9“Ang kowh sak achinawmma ang changta khowk,

ang kowh ngak ang sia sauta khowk” pami mia chow naia tek kown?

10CHAKRAMANG suiah mih maru uowi pre chaing;

nami dow achima hawt khai uanh dowi mih maru,

now kuan kownkow adik chi dowi mih set tawng mih maru chekhai.

11Ngeuüa kowi dow amatni kowh lup hownia chowtaih tuk matah reng.

Nakhowk khe chiang achinawmma bow, dowdow anowmma bow mih tukah reng.

12CHAKRAMANG thawp a-i param mih dow süntak müa chekhai,

now aia thawp a-i mik mih dow amük müa chekhai.

13Müi kowi hang daw naknak diah,

müi daw lai now en nangarai kown.

Chang lup reng diah,

nahanow en kowh chakkham ahuma nauowi kown.

14Uanh ran mih dow aia nau ranah kown mih uanh sung pratah reng,

uanh sung natan pe kownkow “Nami iung dowi” pahai asum miia kowi aia tek pe reng.

Tawkche aia dow ranla hanow mang reng,

now asung tanchow aia kala rakowi cham chang bawri reng chekhai.

15Kuh hai asung khakma mih hua dow asung uowima chekhai.

Tawkche tukra uowima mih nawr dow nami lak-e asung uowi chekhai.

16Prenlang maru paw lowi khe hang tawi takham diah,

tawi takham khai hanow aia kowh tawnguat pawta pe diah.

17Kuan rak hown kowh kaah mih chakkham dow asowr lang uowi.

Tawkche achur khe dow nawr kowi se tabang kak khe kowh iawng naown kown.

18Prengia iung hown sangkrangah diah

prengia iung tang mih ka dowi matchang hang cham tasen diah.

19Lai chawk dawma mih maru dow itah kown mih laiklow paw phuangta reng.

Naiawng rakowi pawpan dawma mih maru hown hang taiua diah.

20U-pa kowi pe piati mih maru dow nakowng kown,

aia dow iiu dawng kowi kowh maibu mit iawng naown kown.

21Ning diachow hownia ahuma kram dawngthawnguan hanow

achur kowi en vüi iung müa naown kown nadowi.

22Maru chang en angak chepaw hangkow paw pe aklai diah,

CHAKRAMANG luk kowi owmsak hanow aia nalawng en kown taih.

23CHAKRAMANG dow achima khai uanh dowi mih maru kowi sui reng,

aia dow adik chi dowi mih set tawng mih maru kowi sui reng chekhai.

24A-i kowh chownglawng kowi lowra sia uang ting mih dow CHAKRAMANG pe phawah kowh chekhai.

Naiawng rakowi akung kowi tawng chow naown kown mih lusa maru tuk dowi chekhai.

25CHAKRAMANG tut-e nape uanap kown en nau hanow rik paw pe tuak kaneu diah,

rik paw pe tuak kaneu dowi matchang hang takham diah.

Tawngplawng kowchow panow akung kowi en takhamta iawng en nowng pe dowi chepaw naia kown.

26Achanlaima mih mang dow maru ngak kowi ka khüm reng chekhai,

aia dow mapaw sanaah dowi kowi maru ngak kowi naripah kown.

27CHAKRAMANG kowh nowi dow lusa maru kowh lümla kowi pat krawi sawt reng.

Naiawng rakowi aia dow lusa maru kowh saktuak tuk bowk chekhai.

28Kaah sakowmma hai anowmma hown kruitown pren hanow mang dow aia kowh mangra naka reng kown,

kaah sakowm iawng aia kruitown pren hanow aia kowh mang chowm rah dow anikma nauowi reng kown.

29Klanguüa khe kowh kürra dow sakowmra uowi,

now lawngtanguüa kowh sam pau dow ringkawra uowi chekhai.

30Bawpah hanow maru ngak dow lup ngak hownia tarip reng,

hupah hanow maru kowh sak dow takling taklai reng chekhai.