Tarüa 3

Arawn kowh chapauüa

1Mami laiklow Sinai hungh kowi Mosi kowi CHAKRAMANG tek pe mih khin khe Mosi hai Arawn iüah kowh kimchakuüa dow maiawng chekhai: 2-3Arawn kowh chapauüa dow Nadab, Abihu, Eleazar hai Ithamar büah chekhai. Amatni tali ia kowi lang ta mih dow Nadab chekhai. Amatni kowi dow ap pe uamow rah khowk chowdiah. 4Nachenganchepaw Nadab hai Abihu iüah dow Sinai hungh uowi mih süngrüp süngkangma kowi uowi reng tak khe CHAKRAMANG ana pek iawng nadowi kowi CHAKRAMANG vüi awr towk maikhük iüah khe kowng khai. Amatchi kowh chauüa uowi dowi rakowi Arawn sing uowi reng tak khe ta chang uamow lup mih dow Eleazar hai Ithamar iüah chowtaih.

Levi krungchakuüa kowh lup

5Akung kowi CHAKRAMANG tek pe Mosi mih, 6“Levi krungchakuüa kowi hawah now Arawn tut-e ap pe diah. Amatni dow Arawn kowi pacham tawi khowngah lah. 7Amatni dow Israeluüa pachenma vüi taklowp taklangra te kowi Arawn nimkrüa kowi nachang lup kown. 8Israel pachenma vüi kowi taklowp taklangra te naming nakhet kown mih hai nakowi kowh lup maten nachang kown mih dow amatni chowtaih. 9Leviuüa maten kowi dow Arawn hai achapauüa rut kowi ap-ah diah. Israeluüa pungmadawng hownia Arawn hai achapauüa kowi nakhowngah lup chang kown mih dow amatni chowtaih. 10Nachang uamow lup kownkow Arawn hai achapauüa kowi dow ap pe arah diah. Amatni klen kowi taklowp taklangra te re-e tawi tatawn miuüa kowi dow nakowngta kown takla,” pakhai.

11CHAKRAMANG plan tek pe Mosi mih, 12-13“Aigupta prenchakuüa kowh chapa ta maten kowi ang saita pe mih khin khe Israeluüa pungmadawng kowi kowh chapa ta maten hai tawncher kowi kowh rik pen mih ala maten dow ang matia vüi ang towah khai. Amatni dow ang matia kowh chekhai. Nachenganchepaw kawmat dow Israeluüa pungmadawng kowi kowh chapa ta maten takcha Leviuüa kowi ang pawta mih chowbowt. Leviuüa dow ang matia kowh towbowt. Ang dow CHAKRAMANG chekhai,” pakhai.

Levi krungchakuüa kowi rüaah mih

14Sinai hungh uowi mih süngrüp süngkangma kowi uowi khe CHAKRAMANG tek pe Mosi mih, 15“Leviuüa kowi dow amatni chowlowkkow krungchak hai kimchak iawng akra akrachow rüaah diah. Amatni kowi dow palachow chih hownia nami luk kowi kowh kachakuüa maten kowi rüaah diah,” pakhai. 16Now Mosi mih CHAKRAMANG ana pek iawng Leviuüa kowi rüaah khai.

Levi krungchak kowi kowh aluchowuüa

17Levi kowh chapauüa dow Gersawn, Kohat hai Merari büah chekhai. 18Gersawn kowh chapa Libni hai Simei iüah pre ia dow amatchi chowlowkkow krungchak kowi kowh aluchow chekhai. 19Kohat kowh chapa Amram, Izhar, Hebrawn hai Uziel büah tali ia dow amatni chowlowkkow krungchak kowi kowh aluchow chekhai. 20Merari kowh chapa Mali hai Musi iüah pre ia paw amatchi chowlowkkow krungchak kowi kowh aluchow chekhai.

Gersawn krungchakuüa kowh maru iun hai lup

21Libniuüa hai Simeiuüa kowi prekah cheah miia dow Gersawn chekhai. 22Gersawn krungchakuüa pungmadawng kowi kowh palachow chih hownia nami luk kowi kowh kachakuüa nget dow bowkbowk kowi 7,500 ia chekhai. 23-24Gersawn krungchakuüa kowh aluchow dow Lael kowh chapa Eliasaf chekhai. Gersawn krungchakuüa kowi dow taklowp taklangra te satkup prakowi pe khupah tangbung khai. 25Amatni kowh lup dow taklowp taklangra te, taklowp taklangra te luk müa rua pawi hown kowh kawngah mih uan, nami luk kowi kowh lüpah mih uan pre theng, taklowp taklangra te plawt uaniang, 26taklowp taklangra te viadawng ping müa uaniang, viadawng plawt kowi kowh uaniang, taklowp taklangra te kowi kowh leng maten mingkhet mih chekhai. Amatni kowh lup dow naiawngün uanh hown taklowp taklangra te nacham plan thawp iawk kown, now apiak khe paw amatni napiak iawk kown.

Kohat krungchakuüa kowh maru iun hai lup

27Amramuüa, Izharuüa, Hebrawnuüa hai Uzieluüa kowi prekah cheah miia dow Kohat chekhai. 28-30Kohat krungchakuüa pungmadawng kowi kowh palachow chih hownia nami luk kowi kowh kachakuüa nget dow bowkbowk kowi 8,600 ia chekhai. Kohat krungchakuüa kowh aluchow dow Uziel kowh chapa Elizafan chekhai. Kohat krungchakuüa kowi dow taklowp taklangra te mrawkphak prakowi pe khupah tangbung khai. Amatni kowh lup dow taklowp taklangra te chimsaima mih naming nakhet kown mih chekhai. 31Amatni dow sangbowk laitawm tawkpla, pawitang, maibu towngh, phuchuara, taklowp taklangra te chimsaima mih kowi kowh tawngah kengah mih uanh hai Lang Chimsai mih Arah kra müa uaniang naming nakhet kown. Amatni kowh lup dow naiawngün uanh mih taklowp taklangra te lak kowi kowh atowk rah kowi nakrawi tow kown mih chekhai, now cham süt khe paw amatni nacham plan pawla kown mih chekhai. 32Leviuüa kowh lang kri mih aluchow dow uamow Arawn kowh chapa Eleazar chekhai. Taklowp taklangra te chimsaima mih mingkhet miuüa kowi naming nakhet kown mih kurdik dow Eleazar luk kowi chekhai.

Merari krungchakuüa kowh maru iun hai lup

33Maliuüa hai Musiuüa kowi prekah cheah miia dow Merari chekhai. 34Merari krungchakuüa pungmadawng kowi kowh palachow chih hownia nami luk kowi kowh kachakuüa nget dow bowkbowk kowi 6,200 ia chekhai. 35Merari krungchak kowi kowh aluchow dow Abihail kowh chapa Zuriel chekhai. Amatni kowi dow taklowp taklangra te tawngphak prakowi pe khupah tangbung khai. 36Amatni dow taklowp taklangra te ping müa phen, akep müa lawng, achüng, akhawk rup rah hai akeng mih uanh ün, 37viadawng ping müa kowi kowh achüng hai akhawk rup rah ün, viadawng uaniang tük müa chung hai aleng ün naming nakhet kown. Amatni kowh lup dow naiawngün uanh hown taklowp taklangra te nacham plan thawp iawk kown, now apiak khe paw amatni napiak iawk kown.

38Taklowp taklangra te satlawt prakowi dow Mosi, Arawn hai Arawn kowh chapauüa kowi pe khupah tangbung khai. Amatni kowh lup dow Israel chen pachenma vüi taklowp taklangra te kowi kowh lup chang maten nakruitown kown mih chekhai. Amatni klen kowi taklowp taklangra te re-e tawi tatawn miuüa kowi dow nakowngta kown mih laiklow uowi chekhai.

39CHAKRAMANG ana pek iawng Leviuüa kowi dow amatni chowlowkkow krungchakuüa kowi akra akrachow Mosi hai Arawn iüah rüaah khai. Leviuüa pungmadawng kowi kowh palachow chih hownia nami luk kowi kowh kachakuüa nget dow bowkbowk kowi 22,000 ia chekhai.

Chapa ta

40Nami kung kowi CHAKRAMANG tek pe Mosi mih, “Israeluüa pungmadawng kowi kowh uang rik dia mih kachakuüa chah nget kowi rüaah diah. Amatni kowi dow palachow chih hownia nami luk kowi kowh kachakuüa nget kowi tang pe ming diah. 41Israel chen pachenma kowh chapa ta takcha Leviuüa dow ang kowh pahai nadowkah kown, now Israeluüa kowh tawncher kowi rik pen mih ala maten takcha Leviuüa kowh tawncher maten ang kowh pahai nadowkah kown. Ang dow CHAKRAMANG chekhai,” pakhai.

42Now CHAKRAMANG ana pek iawng Israeluüa pungmadawng kowi kowh uang rik dia mih kachakuüa nget kowi Mosi rüaah khai bowt. 43Uang rik dia mih kachakuüa nget kowi palachow chih hownia nami luk kowi kowh kachakuüa nget kowi dow tang pe ming khai. Tang pe ming mih maru iun dow bowkbowk kowi 22,273 ia chekhai.

44CHAKRAMANG plan tek pe Mosi mih, 45“Israel chen pachenma kowh chapa ta takcha Leviuüa dow ang kowh pahai nadowkah kown, now Israeluüa kowh tawncher kowi rik pen mih ala maten takcha Leviuüa kowh tawncher maten ang kowh pahai nadowkah kown. Leviuüa dow ang kowh naown kown. Ang dow CHAKRAMANG chekhai. 46-47Leviuüa kowh maru iun lak-e Israeluüa pungmadawng kowi kowh chapa tauüa lang chüt 273 ia chekhai. Naiawng rakowi chüt miuüa maten kowi naklanta kownkow lowk ia kowi tai tanga iun chi en napaw pe kown. (Tai paiun kowi dow taklowp taklangra te kowi kowh akhai müa hown khai now hamüt gram chi chekhai). 48Naiawngün klanla maru mih tai maten dow Arawn hai achapauüa rut kowi en napeah kown,” pakhai.

49Naiawng rakowi Leviuüa hown klanah kung kowi kowh ta lat mih Israeluüa kowh chapa ta maten kowi dow taklan müa tai Mosi paw pe khai. 50Aia dow Israeluüa pungmadawng kowi kowh chapa ta taklan müa tai nget 1,365 iun ka khai. (Tai paiun kowi dow taklowp taklangra te kowi kowh akhai müa hown khai now hamüt gram chi chekhai). 51CHAKRAMANG ana pek iawng Mosi mih taklan miuüa kowh tai Arawn hai achapauüa kowi peah khai.