Tara chet miuüa 9

Atainau-uüa kowi Abimelek saita mih

1Jerub-Baal kowh chapa Abimelek mih Sekem marow kowi kowh apu-uüa tut-e kowkowiah now apu-uüa kowi hai a-u kowh krungchakuüa maten kowi tek pe mih, 2“Amatni vüi tawng mih chow lang iung mih Sekem kowi kowh uowi miuüa maten kowi krawi lünta büah madiah, ‘Jerub-baal kowh chapa 70 ia mih bow enni kowh kruitown mih nachowng kown? Dow now maru lowk iachow bow enni kowh kruitown mih nachowng kown?’ pape khai. Now ang paw enni hown pabuk panga chak pami hangkow tamata büa diah,” pakhai.

3Now nami laiklow dow Abimelek kowh pu-uüa mih Sekem kowi kowh aluchowuüa maten kowi krawi tek pe khai. Nami kung kowi dow Sekem marow kowi kowh maru maten Abimelek prakowi tawi tangi khai. Tawngplawng kowchow panow Abimelek dow amatni hown tasin taken mih maru chekhai. 4Amatni dow Bal-Berit thurai kim hownia tai 70 iun pawah now Abimelek kowi peah khai. Nami tai hown Abimelek mih cham ngala maru ngakuüa khai. Now naiawngün maru ngakuüa dow aia kung tawi krawi khai bowt. 5Aia dow Ofra kowi a-pa kim kowi kowkowiah now aia kowh tainau-uüa 70 ia kowi huamang lowkchow mih luk kowi saita bowk khai. Naiawngün atainau-uüa dow Jerub-baal kowh chapa kangowh chekhai. Nachenganchepaw Jerub-baal kowh chapa lang sawi mih Jotham dow tapet hanow ia plai khai. 6Nami kung kowi dow Sekem hai Bet-Milo kowi kowh aluchowuüa maten takuaah now Sekem re-e kowh Awk singh chimsaima mih re-e Abimelek kowi thawpah mang khai.

Jotham kowh laiuat

7Naiawngün satang tata now Jotham mih Gerizim hungh chut kowi kowpün khai. Now atünma maru kawmuüa kowi tek pe mih, “Sekem kowi kowh uowi miuüa low, ang laiklow sünta büa diah. Nahanow Thurai paw enni kowh laiklow nasünta enni kown. 8Akat khe mih singh kau maten amatni vüi cham krawi thawp mang kownkow cham krawi kowi khai. Now kanrawn singh kowi tek pe büah mih, ‘Kanrawn singh ow, chowm a-i mang dit snow,’ pakhai. 9Nakhowk khe kanrawn singh hawt klangah mih, ‘Ang kowh sau hown dow maru hai Thurai ka ringkawra reng chekhai. Nami towta hanow singh kau maten luk kowi tak ü ang krawi kruitown kown?’ pape khai. 10Nami kung kowi uidut singh kowi tek pe büah mih, ‘Uidut singh ow, chowm a-i mang dit snow,’ pakhai. 11Nakhowk khe uidut singh paw hawt klangah mih, ‘Ang dow asowrma hai adingma mih uih thawp reng chekhai. Nami towta hanow singh kau maten luk kowi tak ü ang krawi kruitown kown?’ pape khai. 12Nami kung kowi grep ruih kowi tek pe büah mih, ‘Grep ruih ow, chowm a-i mang dit snow,’ pakhai. 13Nakhowk khe grep ruih paw hawt klangah mih, ‘Ang kowh uih tui hown Thurai hai maru piaw reng chekhai. Nami towta hanow singh kau maten luk kowi tak ü ang krawi kruitown kown?’ pape khai. 14Achur nowm nowm kowi singh kau maten chuh mung kowi tek pe mih, ‘Chuh mung ow, chowm a-i mang dit snow,’ pakhai. 15Nakhowk khe chuh mung hawt klangah mih, ‘Enni che pe chowm ang mang kown nau nowm now ang kowh klim kowi uang rik tanai büa diah. Naiawng che enni nauta dowi now chuh mung hownia maih awr lün now Lebanawn kowi kowh sidar singh kowi pacham kamta bowk lah,’ pape khai,” pakhai.

16Nami laiuat ki tek pe kung kowi Jotham tek pe iawk mih, “Sünta büah, Abimelek kowi enni thawpah mang mih kaah sakowm mih lup hai anowmma mih lup pabow enni ka tuak? Apa Gideawn hai aia kimchak luk kowi enni changah aiung mih hai taka klowk khowk pabow enni ka tuak? 17Ang kowh pa dow aia nakowng kown mih kowi tuakla dowi matchang dowk tasen hanow Midianuüa rut hownia lawng enni khai. 18Nachenganchepaw ani mih aia kowh kimchakuüa kowi enni kingküaah khai. Aia kowh chapa 70 ia kowi huamang lowkchow mih luk kowi enni kowngta pe bowk khai, now aia kowh narma chah Abimelek kowi Sekem kowi kowh maru-uüa luk kowi enni pe chowmah mang khai. Tawngplawng kowchow panow Abimelek dow enni hown tasin taken mih maru chekhai. 19Nachenganchepaw ani che enni mih Gideawn hai aia kimchakuüa luk kowi kaah sakowmma hai anowmma mih lup enni chang pe khai e dow Abimelek mih enni vüi awmrawmra pachowng lah, now enni paw aia kowh awmrawmra pachowng lah. 20Tawkche kaah sakowmma hai anowmma mih lup enni che chang pe dowi hanow Abimelek hownia maih uang lawt hanow enni Sekem kowi kowh uowi miuüa luk kowi hai Bet-Milo kowi kowh uowi miuüa luk kowi pacham kamah lah. Now enni Sekem kowi kowh uowi miuüa hai Bet-Milo kowi kowh uowi miuüa hownia paw maih uang lawt hanow Abimelek kowi pacham kamah lah,” pakhai.

21Nami kung kowi dow Jotham mih Ber pami arah kowi kowpowt khai. Aia dow ataimow Abimelek kowi kram kowh nakowi hing uowi khai.

Sekem marowchakuüa kingküa Abimelek mih

22Abimelek mih sum ning mowr Israeluüa kowi kruitownah khai. 23Nami kung kowi dow Thurai mih Abimelek hai Sekem kowi kowh aluchowuüa kowi uang chin pe lümla ngak khai. Naiawng rakowi Sekem kowi kowh aluchowuüa mih Abimelek hown taran khai. Nahanow Sekem kowi kowh aluchowuüa dow Abimelek kowi kingküaah khai. 24Naiawng Abimelek kowi Thurai changah mih dow Gideawn kowh chapa 70 ia kowi saita mih lu klai Abimelek luk kowi naia pawla kownkow chekhai, now kowbüah kowi saiah khe kowh Abimelek kowi tawi khowngah mih Sekem kowi kowh maru-uüa luk kowi naia paw lu klai kownkow chekhai. 25Sekem kowi kowh maru-uüa dow Abimelek kowi kingküaah kownkow hungh luk kowi tow maru sangrum khai. Naiawngün maru-uüa dow tapetah hanow nami tiama iawng uang mang miuüa kowi changah damra khai. Tawkche nami lawnguan kowi Abimelek mih tawi ta khai.

26Nami khin khe Ebed kowh chapa Gal mih aia kowh tainau-uüa kowi pawla now Sekem kowi uang khai, now Sekem kowi kowh maru-uüa mih aia kowi owmah khai. 27Akung kowi amatni dow amatni kowh grep krum hownia klek grep uih hanow thawp grep tui khai, now chang pawi büah khai. Amatni dow amatni kowh thurai kim kowi kowkowiah now cha büah kham büah khai, now Abimelek kowi peah piati büah khai. 28Ebed kowh chapa Gal tek mih, “Mia chow Abimelek? Tawngplawng kowchow Sekem kowi kowh a-i uowi miuüa aia nimkrüa kowi nauowi kown? Aia dow Gideawn kowh chapa nadowi bow? Aia kowh siphai aluchow dow Zebul nadowi bow? Tawngplawng kowchow Abimelek nimkrüa kowi a-i nauowi kown? Sekem kowh pa Hamawr krungchakuüa nimkrüa kowi phai i uowi diah sik. 29Maru kawmuüa che ang kowh ana pek chün panü dow Abimelek kowi ang naprütta kown taih diah. Abimelek kowi ang natek pe kown mih, ‘En kowh siphai hawmh kowi kuala now uang a-i tasen lah,’ pape kown,” pakhai.

30Ebed kowh chapa Gal kowh nami laiklow dow Sekem kowi kowh kruitown mih Zebul tawi ta khai, now aia dow lainowmma kunmarau khai. 31Aia dow kukpa Abimelek kowi maiawng krawi tek pe khai, “Ebed kowh chapa Gal hai atainau-uüa mih Sekem kowi uangah now nakingküa en kownkow maru kawmuüa kowi chükah khai. 32Naiawng rakowi en hailawm en kowh maru-uüa mih uar-e uangah now dowm kowi uang hawt chawng diah. 33Now sat lawt khe Sekem marow kowi uang senah diah. Now Gal hai aia kowh maru-uüa nauang sen en kownkow uang lawt mih khin khe tawng chow en nau changah kown mih changah diah,” pakhai.

34Naiawng rakowi Abimelek mih aia kowh siphai maten kowi changah tali thum now uar-e lawt khai, now Sekem marow ria kowi uang tapet büah khai. 35Ebed kowh chapa Gal dow marow hownia uang lawt hanow tapplawt re-e uang iowng khai. Nakhowk khe Abimelek hai aia kowh maru-uüa mih amatni tapetra hownia uang lawt prung khai.

36Nami khita hanow Zebul kowi Gal tek pe mih, “Mü madiah, hungh luk hownia maru kawm uang dowm iualua taih,” pakhai.

Nakhowk khe Zebul klangah mih, “Maru nadowi pai iow, hungh nim kowi en nüla maru mih taih,” pape khai.

37Nachenganchepaw Gal plan tek pe mih, “Mü diah le, hungh lang lowng mih hownia paw maru kawmuüa uang haimang pathum, now hawra sarauüa kowh hawra mükra sasua singh hownia paw uang haimang pathum,” pakhai.

38Nakhowk khe Zebul klangah iawk mih, “Sow, en kowh laiklow aiuk aiukma mih? En tek mih, ‘Abimelek mia chow? Tawngplawng kowchow aia nimkrüa kowi a-i uowi kown?’ pakhai. En prawng renah miuüa dow marow uat kowi uowi chekhai. Khaleng dow lawt now kowbüah hown kowtasen bowt,” pape khai.

39Nakhowk khe Gal dow Sekem marow kowi kowh maru-uüa kowi hawla now Abimelek hown kowtasen khai. 40Abimelek kawikrawiah now Gal dow powt khai. Powt büah mih khin khe Gal kowh maru-uüa dow ka arau kowh patiama rawng tapplawt mowr takuakla pan khai. 41Abimelek dow Aruma marow kowi kowmang khai bowt. Now Zebul dow Gal hai atainau-uüa kowi kawikrawiah now Sekem marow hownia lawtta khai.

42Auai ni khe Sekem kowi kowh maru-uüa mih marow hownia uang lawt now dowm kowi uang khai, now nami satang Abimelek kowi kowphowng pe khai. 43Nakhowk khe Abimelek dow aia maru-uüa kowi changah sum thum khai. Now amatni dow dowm kowi hawt tapet khai. Marow hownia maru-uüa uang lawt mih khita now amatni dow hawt senah khai. 44Abimelek hai aia thumchak maru-uüa dow pur prakowi kowkowi hanow marow tapplawt kowi kowhawt iowng khai. Now akeng mih pre thum mih dow dowm kowi kowh uowi mih Sekem marowchakuüa kowi hawt senah now kowngta büah bowk khai. 45Ni chut tasen hanow Sekem marow dow Abimelek powngta khai, now nami marow kowi kowh maru maten kowi aia saita bowk khai. Nami kung kowi dow marow mih piakta bowk now krawi prui pe awisa büah khai.

46Nami satang tata hanow Sekem marow kowi kowh kimkrowng kowi uowi mih aluchowuüa mih El-Berit pami thurai kim lak kowi kowh akhawtma mih kangchawngra kim kowi kowkup büah khai. 47-48El-Berit pami thurai kim kowi maru-uüa takua talawm mih satang dow Abimelek paw tawi ta khai. Nahanow aia dow aia maru-uüa kowi pawla now Zalmawn hungh kowi kowpün khai. Now aia dow pawla marek lowk hanow cham do singh mia khai, now naiawngün singh mia dow aia pangkawt hown kawtla lawmlawm khai. Nami kung kowi aia maru-uüa kowi aia peah ana mih, “Ang chang iawng alenma tawi chang büa diah,” pakhai. 49Naiawng rakowi aia kowh maru-uüa maten paw do singh mia hanow kawtla büah khai, now Abimelek kung tawi krawi khai. Nami kung kowi amatni dow akhawtma mih kangchawngra kim ria kowi naiawngün singh mia krawi towah büah hanow towkah büah khai. Nami maih hown dow Sekem marow kowi kowh kimkrowng kowi kowh maru maten kowng khai. Nakowi kowh kowng mih nget dow masiuüa hai kachakuüa 1,000 ia ngia chekhai.

50Nami kung kowi dow Abimelek mih Thebez marow kowi rumah now senah khai, now nami marow dow aia powngta khai. 51Nami marow kowi dow kimkrowng uowi lowk chekhai. Nami kimkrowng kowi dow marow kowi kowh maru maten kowpowt khai. Amatni dow nami kimkrowng lak kowi kowkup hanow kimplawt mih büngta büah khai, now amatni dow kimkrowng luk kowi kowpün büah bowk khai. 52-53Now Abimelek mih nami kimkrowng re-e kowkowiah now kowsenah khai. Nachenganchepaw nami kimkrowng kowi natowkah kownkow kimplawt re-e Abimelek kowkowi khe masiuüa lowk ia mih kawm küa müa hua hown amaisang kuakah mih Abimelek kowh lu teuta pe khai. 54Nakhowk khe Abimelek mih alenma aia kowh tasen müa rutchün khawkleng kawt mih klanguüa kowi tek pe mih, “‘Masiuüa rut kowi Abimelek kowng khai,’ pami maru naia tekla dowi kownkow en kowh saidawng akawp hownia howkah now uai sai ang diah,” pakhai. Naiawng rakowi nami klanguüa mih saidawng hown Abimelek kowi haisawtah khai, now Abimelek dow kowng khai. 55Abimelek kowng khowk mih khita hanow Israeluüa dow amatni chowlowkkow kim kowi mang khai bowt.

56Abimelek mih atainau-uüa 70 ia kowi saita mih hai a-pa luk kowi kowh aia changta angak mih sung dow naiawng hai Thurai sat pe klai khai. 57Now Sekem kowi kowh maru-uüa kowi paw amatni kowh angak sung Thurai sat pe klai khai. Naiawng hai Gideawn kowh chapa Jotham kowh piati dow amatni luk kowi uang kla khai.