Tara chet miuüa 3

Akeng chenchapuüa kowi CHAKRAMANG towah reng tak mih auan

1-2Katpaw tasen dowi tak mih Israeluüa maten kowi nape tasenah hanow nape tukah tasen kownkow CHAKRAMANG mih Kanan pren kowi kowh akeng chenchapuüa kowi prütta bowk dowi chekhai. 3CHAKRAMANG towah mih chenchapuüa dow Filistinuüa hai amatni kowh kruitown mih tanga ia, Sidawnuüa, Hivuüa hai Kananuüa maten chekhai. Hivuüa uowi mih dow Lebanawn hungma mawngma süng kowi, Bal-Hermawn hownia Lebo-Hamat mowr chekhai. 4Amatni pipu-uüa kowi mih CHAKRAMANG kowh ana pek Mosi peah khai. Naiawngün ana pek Israeluüa chün tak chünchü pami nachaingah kownkow naiawngün chenchapuüa kowi CHAKRAMANG tow pe mih chekhai. 5Naiawng rakowi Israeluüa dow Kananuüa, Hituüa, Amawruüa, Perizuüa, Hivuüa hai Jebusuüa pungmadawng kowi tawi uowi khai. 6Israeluüa dow amatni chapauüa vüi naiawngün chenchapuüa kowh chamauüa kowi paw pe khai, now amatni kowh chamauüa kowi paw naiawngün chenchapuüa kowh chapauüa kowi pe pawah khai. Nami klen kowi amatni dow naiawngün chenchapuüa kowh thuraiuüa kowi paw tawi chupiia büah khai.

Israeluüa kowh tara chet mih Awtniel

7Israeluüa dow CHAKRAMANG mik kowi angakma mih lup chang khai. Amatni dow CHAKRAMANG amatni kowh Thurai kowi tamata now Baal thuraiuüa kowi hai Asera limpu kowi cham tawi chupiia büah khai. 8Naiawng rakowi CHAKRAMANG mih Israeluüa kowi lainowmma kunmarauah khai. Now aia dow Israeluüa kowi Mesawpawtamia pren mang Kusan-Risathaim rut kowi apah khai. Amatni dow raiat ning mowr nami mang nimkrüa kowi uowi büah khai. 9Nami kung kowi Israeluüa dow CHAKRAMANG tut-e nguk büah kar büah khai. Nahanow amatni kowi nalawngah kownkow CHAKRAMANG mih Awtniel kowi uang khowm pe khai. 10CHAKRAMANG kowh lümla mih aia kowi uang peah kür khai, now aia dow Israeluüa kowh tara chet mih uang chowng khai. Aia cham dowk tasen khe Mesawpawtamia pren mang Kusan-Risathaim kowi dow aia rut kowi CHAKRAMANG ap pe khai, now aia dow nami mang kowi nowngta khai. 11Kenaz kowh chapa Awtniel kowng dowi mowr dow 40 ning mowr pren mih thaulangma chekhai.

Israeluüa kowh tara chet mih Ehud

12Nami kung kowi dow Israeluüa mih CHAKRAMANG mik kowi angakma mih lup ta plan chang khai iawk. Naiawng rakowi Israeluüa kowi nakingküaah kownkow CHAKRAMANG mih Moabuüa kowh mang Eglawn kowi pe kürah khai. 13Eglawn mih Amawnuüa hai Amalekuüa kowi pawla now Israeluüa kowi senah khai bowt, now Israeluüa uowi rah Jeriko marow mih powngta pe khai. Nami marow ming uowi lowk tak mih dow Chekmarawng singh marow chekhai. 14Israeluüa mih 18 ning mowr Moabuüa kowh mang Eglawn nimkrüa kowi uowi khai.

15Nami kung kowi dow Israeluüa mih CHAKRAMANG tut-e nguk büah kar büah khai iawk. Now amatni kowi nalawngah kownkow Ehud kowi CHAKRAMANG uang khowm pe khai. Ehud dow Benjamin krungchak Gera kowh chapa chekhai. Aia dow lakuai rut hown chang lup mih maru chekhai. Moab pren mang Eglawn tut-e nakowsa mangmu kownkow aia kowi dow Israeluüa kowchinah khai. 16Now aia dow bürdawng saichow aklang amuk mih thawpah lowk khai. Now aia tarü mangmu sak khe nami saichow mih uan krüa kowi aia kowh hawmlawm thung kowi tapla now pawla khai. 17Aia dow kowkowiah now Moabuüa kowh mang Eglawn kowi nami mangmu kowpeah khai. Mang Eglawn dow lainowmma kau chekhai. 18Ki peta mangmu kung kowi uang tawi sa mangmu miuüa hown Ehud mih mang khai. 19Tawkche Gilgal re-e kowh hua hown kowh arup uowi rah mowr kowtawi mang hanow aia mih mang tut-e uang plan uang khai iawk. Now mang kowi uang tek pe mih, “Mangkri ow, ang tut-e kukpa natek en kown mih satang uowi lowk,” pape khai.

Nakhowk khe aia naruüa kowi mang tek pe mih, “Cham lawt büa diah,” pakhai. Now aia kowh naruüa dow nami hownia cham lawt bowk khai.

20Nakhowk khe mang mih aia malowkchow kimluk kowi kowh li iowr rah towklak kowi chowm phülü khai. Mang re-e Ehud kowtatawnah now tek pe mih, “Ang tut-e naphowng en kown mih satang uowi lowk; nami satang dow Thurai hownia kowh uang ting mih chekhai,” pape khai. Nami laiklow tata now mang dow awr iowng khai. 21Nakhowk khe Ehud mih aia lakuai rut hown aia hawmlawm thung kowi kowh saichow howkah now mang mu kowi haisawtah khai. 22Nami saichow dow apung hailawm mu lak kowi kup now asau hown tamum khai; nami saichow dow Ehud plan howkah dowi bowt chekhai. Nami saichow dow mang kumlawng prakowi uang towk dit chekhai. 23Nami kung kowi dow Ehud mih uang lawtah hanow kimbüng büngta now rowpkleb hown kliata khai.

24Ehud powt kung kowi dow mang kowh naruüa uang now kimluk kowi kowh kimbüng akliama mih uang khita khai. Nakhowk khe amatni tatek mih, “Kim lak kowi kowh towklak kowi mangkri uat mih tangtang,” pabüah khai. 25Amatni dow akrama chawngah khai. Nachenganchepaw mangkri uai ho kimbüng dowi reng rakowi uang pawla pe sabit büah now hoah büah khai. Nakhowk khe amatni dow amatni kowh mangkri kowng kowh krawng kowi takuak hüah mih khi büah khai.

26Anaruüa mih mang kowi chawngah reng tak khe Ehud dow powt kowh hua hown kowh arup uowi rah klenla now Seira kowi kowting tüng khowk chekhai. 27Nakowi mih Efraimuüa uowiah mih hungma mawngma süng kowi aia dow tum baw khai, now Israeluüa mih aia hown hungh hownia adak kowi uang dowm hanow aia kung kowi tawi krawi khai bowt. 28Tawngplawng kowchow panow amatni kowi Ehud peah ana mih, “Enni kowh ransu Moabuüa kowi enni rut kowi CHAKRAMANG apta enni khowk. Naiawng rakowi ang kung kowi uang krawi büa diah,” pakhai. Nahanow amatni dow Ehud kung kowi tawi krawi tawi krawi now Moab pren re-e kowh Jawrdan aw khawk hown nowng pownah mowr mih arah maten krawi powngta bowk büah khai. Amatni dow naiawngün arah hownia mia iawng mih kowi paw pe pownah dowi chekhai. 29Nami khin khe amatni dow Moabuüa 10,000 ia kowi saita khai. Naiawngün Moabuüa dow kow iungma hai akürma kangowh chekhai. Nachenganchepaw amatni dow lowk iachow paw ia powt büah dowi chekhai. 30Nami ni khe Moab pren dow Israeluüa powngta khai bowt. Nami ni hownia now 80 ning mowr pren mih athaulangma chekhai.

Israeluüa kowh tara chet mih Samgar

31Ehud kung kowi dow Israeluüa kowh tara chet mih Samgar chekhai. Samgar dow Anat kowh chapa chekhai. Aia dow thingla chia mih müa hown Filistinuüa 600 ia kowi saita khai. Aia paw Israeluüa kowi lawngah khai.