Tara chet miuüa 19

Levi chenchap maru lowk ia changla masi mih narma

1Nami khin khe Israeluüa kowh dow mang uowi dowi tak chekhai. Nakhowk khe Efraimuüa kowh hungma mawngma süng kowi Levi chenchap maru uowi lowk ia. Now aia kowh dow masi uowi pre ma chekhai. Amasi sawi dow Judauüa uowi rah Bethlehem marow hownia kowh chekhai. 2Akung kowi aia changla masi mih narma dow chang iang hanow a-pa kim kowi kowpowt khai. Nami masiuüa pa kowh kim dow Judauüa uowi rah Bethlehem marow kowi chekhai. Now aia dow nakowi kowuowi tali la khai. 3Now ahua dow amasi sawi kowi kowdepah hanow nauang pawla kownkow kowkowi khai. Aia dow aia kowh nar lowk ia hai aia kowh kawrngaramchük pawla pachum khai. Now amasi kim kowi kowting hanow amasi dow aia kowi mih a-pa kim kowi pawla khai. Now a-pa dow amawkchow kowi khita hanow lainowmma awmrawm khai. 4Now a-pu dow nakowi nauowi tak kownkow amawkchow kowi townah khai. Naiawng rakowi aia dow a-pu kim kowi uowila sum ni khai. Aia dow a-pu hown taiua cha taiua kham khai.

5Now tali ni mih ni khe dow namang bowt kownkow rau-e murpa awr rü hanow chang kamrüt büah khai. Nachenganchepaw a-pu tek pe mih, “Chala khamla prowng diah. Nami kung kowi mang büah iang,” pakhai. 6Naiawng rakowi amatchi pu mawk dow chowm hanow taiua cha taiua kham iüah khai. Nakhowk khe a-pu tek pe mih, “Sakrauma hown aiak dow iak diah towbowt, now piaw diah,” pakhai. 7Nami maru dow mang kown mih kamrüt changta khowk chepaw a-pu townah rengreng rakowi nami iak paw plan uowi khai iawk. 8Now tanga ni mih ni khe paw namang bowt kownkow rau-e murpa awr rü hanow chang kamrüt büah khai. Nachenganchepaw a-pu plan tek pe iawk mih, “Chala khamla prowng diah. Kaw sat kowi prakowi mangah taih,” pakhai. Naiawng rakowi amatchi pu mawk dow chowm hanow taiua cha taiua kham iüah khai.

9Now nami maru dow aia changla masi mih narma hai aia kowh nar kowi pawla now namang bowt kownkow chang kamrüt khai. Nakhowk khe a-pu tek pe mih, “Sünta diah, kawmat dow sat kup khowk. Now iiu paw uang iiu iawlaw khowk. Naiawng rakowi aiak dow iak diah towbowt, now piaw diah. Tharau murpa awr rü now kim prakowi mur mangah büah towbowt,” pakhai. 10-11Nachenganchepaw nami iak dow nakowi iak kown mih mapaw aia nau dowi bowt chekhai. Naiawng rakowi aia dow aia dau pe uan mih kawrngaramchük pre pum, now aia changla masi mih narma hai aia kowh nar kowi pawla hanow mang büah khai.

Now Jebus marow hown atawnchow re-e amatni uang ting khe dow sat kowi khai bowt. (Jebus marow dow Jerusalem marow chekhai). Nakhowk khe anar tek pe kim iah mih, “Chu, mami Jebus marow kowi a-i iak towbowt,” pakhai.

12Nachenganchepaw kim iah tek pe mih, “Israeluüa kowh marow nadowi mih kowi a-i kowiak kown nadowi. Gibeah marow kowi phai a-i kowkowi diah sik,” pape khai. 13Kim iah plan tek pe anar mih, “Chu, Gibeah marow kowi chepaw, Rama marow kowi chepaw ting pat a-i mang diah sik. Nami pre buk mih marow kowi lowra mih kowi a-i iak kown,” pape khai. 14Naiawng rakowi amatni dow mang rengreng chekhai. Now Benjamin krungchakuüa kowh süng kowi kowh Gibeah marow re-e uang ting khe dow sat kup khai bowt. 15Now amatni dow nakowi naiak kownkow nami marow lak kowi kowkowi khai, now marow dawnglang kowi kowchowm büah khai. Nachenganchepaw amatni kowi mih kim kowi naiak kown mih miapaw hawah dowi chekhai.

16Nami ni sat kup khe kachakuüa lawngtang lowk ia mih laih hownia uang mang lup chang hanow Gibeah marow kowi uang kup khai. Aia kowh kim ching dow Efraimuüa kowh hungma mawngma süng kowi chekhai. Nachenganchepaw aia uowi mih dow Gibeah marow kowi chekhai. Nami Gibeah marow kowi kowh uowi miuüa dow Benjamin krungchakuüa kangowh chekhai. 17Now marow dawnglang kowi nami khari kowi miuüa kowi khita hanow lawngtang lüntaah mih, “Tawng kowi chow enni cham kowi kown? Tawng hownia chow enni uang?” pakhai.

18Nami khari kowi miuüa tek pe mih, “Anging dow Efraimuüa kowh hungma mawngma süng kowi kowh uowi mih chekhai. Judauüa süng kowi kowh Bethlehem marow kowi anging kowkowi mih chowdiah. Kawmat dow Efraimuüa kowh hungma mawngma süng kowi anging plan iawk mih chowbowt. Nachenganchepaw anging nacham iak kownkow miapaw haw anging dowi. 19Anging tut-e anging kowh kawrngaramchük vüi paw chahau hai pakdi uowi. Now ang vüi hailawm ang masi vüi hai ang kowh nar vüi paw kawmpah hai grep tui uowi chow. Anging vüi tawngpaw lakke dowi bowt tham,” pape khai.

20Nakhowk khe nami lawngtang tek pe mih, “En tut-e thaulangra pacham uowi lah. En lakke mih maten ang nape en kown taih. Nachenganchepaw viadawng kowi dow mapaw hangkow iak büa diah,” pakhai. 21Naiawng tek pe hanow nami lawngtang mih amatni kowi aia kim kowi pawla khai. Now amatni kowh kawrngaramchük kowi dow pe chaah chakkham khai. Now amatni dow sau bawng sau pang hanow cha büah kham büah khai.

Gibiauüa kowh angak

22Naiawng hai amatni mih asowrma uowi büah khai. Nakhowk khe marow kowi kowh maru ngakuüa uang pre sum ia hanow kim mih uang rumta lut büah khai. Now nami maru ngakuüa mih uang khik kimbüng se lawngtang kowi tek pe mih, “En kim kowi kowh uang mih kachakuüa kowi uang lawtla diah. Aia hown anging taphua taiua kown,” pabüah khai.

23Nakhowk khe kim iah dow uang lawt hanow tek pe amatni mih, “Tainau-uüa low, naiawng mih lup ngak hang chang büa diah. Sakrauma hown naiawng mih suiiai kaniaima mih lup hang chang büa diah. Mami maru dow ang kowh pinsüa chekhai. 24Ang kim kowi kachakuüa hown katpaw taphua taiua dowi tak mih ang kowh chama hai nami maru changla masi mih narma uowi. Kowiüah kowi ang nauang lawtla enni kown towbowt. Kowiüah hown phai taphua taiua büa diah, now enni nau iawng changah büah taih. Nachenganchepaw mami maru kowi dow naiawng mih lup ngak hangkow chang büa diah,” pakhai.

25Nachenganchepaw naiawngün maru-uüa dow lawngtang laiklow mih sünta pe dowi chekhai. Naiawng rakowi lawngtang kim kowi kowh nami Levi chenchap maru lowk ia dow aia changla masi mih narma kowi uang awr lawtta pe hüah khai. Now amatni dow uar prowt nami masiuüa kowi lowk ia lowk ia chowchi taleah lütlüt kür hown phuaah iuaah khai. Nami kung kowi dow uar thowi dowi rawn aia kowi lawtta büah khai. 26Now uar thowi khe dow nami masiuüa mih ahua iak pe mih lawngtang kimplawt re-e kowtakuak hüah khai. Aia dow sat lawt dowi mowr nami re-e takuak hüah khai.

27Now ahua dow rau-e awr rü hanow namang kownkow ho kimbüng khai. Nakhowk khe amasi takuak hüah panow aia kowh rut kimplawt mawm kowi tatang hüah mih ahua khita khai. 28Aia tek pe mih, “Awr rü, a-i mang bowt lah,” pakhai. Nachenganchepaw amasi dow aia kowi hing klangah dowi bowt chekhai. Now aia dow kawrngaramchük luk kowi amasi uai kowi tangla hanow kim prakowi mang khai bowt.

29Aia dow kim kowi kowting hanow paw saichow lowk khai, now amasi uai kowi mih dungah laipre dung khai. Now naiawngün dung dow Israeluüa uowi rah maten kowi krawi sa pe khai. 30Nami khi miuüa tatek mih, “Aigupta pren hownia a-i Israeluüa uang lawt mih ni hownia kawmat mowr kowi naiawng mih lup katpaw phaw dowi tak! Now khi paw katpaw khi dowi tak! Kawmat tawng chow a-i nachangah kown? Nami lawnguan kowi tawng chow achang takla mih tek lowk ia madiah,” pabüah khai.