Josua 2

Kowkumü miuüa kowi Rahab lawngah mih

1Sittim pami arah kowi uowi büah reng tak khe Nun kowh chapa Josua mih nakowkumü Kanan pren kownkow kowchin maru pre ia khai. Aia kowchinah mih maru kowi Josua krawi tek pe mih, “Kanan pren kowi kowkowi iüah now pren hai marow mih kowkumü iüa diah. Amülüngma hown Jeriko marow mih krawi kumüla kaneu iüa diah,” pape khai. Nahanow nami maru pre ia dow Jeriko marow kowi kowkowi khai bowt. Now amatchi dow Rahab pami chawkkrawma kim kowi kowpün hanow iak iüah khai.

2Now uang krawi kumü pren kownkow sat kowi prakowi Israeluüa uang ting ne pami satang dow Jeriko marow mang paw tawi ta khai bowt. 3Nami satang tata hanow Jeriko marow mang mih Rahab tut-e kowchin maru sangrum khai. Mang kowchinah mih maru-uüa kowtek pe Rahab mih, “En kim kowi kowh uang pün mih maru-uüa dow uang kumü pren kownkow uang mih chekhai. Naiawng rakowi amatni kowi uang lawtla diah,” pakhai.

4-6Rahab klangah mih, “Ow, ang kim kowi maru uang nowm chowdiah. Tawkchedow tawng hownia chünchü uang mih ang tuk dowi. Sat kowi prakowi alai büng marow tapplawt dowi rawn khe mang iüah tüng khowk. Tawng pra chow cham mang iüah mih ang tuk dowi. Nachenganchepaw kawmat che enni kowkowi krawi hanow enni krawi ia um tak chepaw naia,” pape khai. (Kowkumü pren mih maru pre ia kowi Rahab dow aia kimluk kowi petta hüah chekhai. Aia dow kimluk kowi kowh diata mih kankung la hown nami maru pre ia kowi khuta hüah chekhai). 7Naiawng rakowi mang uang chinah mih maru-uüa dow Rahab kowh laiklow tata hanow kowkumü pren mih maru pre ia kowi kowkawi krawi kownkow nami Jeriko marow hownia lawt khai bowt. Nami marow hownia amatni lawt krowngchow now marow tapplawt dow büngta khai bowt. Amatni dow Jawrdan aw nowng pownah krowngchow mih pra kowh tiama prakowi kowkrawi tarü khai.

8-9Amatchi müi dowi rawn tak khe Rahab mih aia kimluk kowi kowpün khai. Amatchi kowi aia tek pe mih, “Mami pren dow CHAKRAMANG peta enni mih chowbowt pami ang tuk. Enni kowi lainowmma anging kram chekhai. Kram enni lai bowt rakowi mami prenchakuüa dow chürla kluk towbowt. 10Tawngplawng kowchow panow Aigupta pren hownia enni uang lawt kung kowi enni pur kowi kowh sata Rik tui tawng iawng chow CHAKRAMANG pe kangah mih anging ta chekhai. Jawrdan aw satlawt pra pown kowi kowh Amawruüa mang Sihun hai Awk iüah kowi tawng iawng ngai chow enni changah mih paw anging ta chekhai. 11Naiawngün satang tata hanow lainowmma anging kram khai. Naiawng rakowi nauang sen enni kown mih miapaw uam dowi bowt chekhai. Tawngplawng kowchow panow CHAKRAMANG enni kowh Thurai dow krawng hai mukuang Thurai chekhai. 12-13Naiawng rakowi kawmat mih CHAKRAMANG enni kowh Thurai ming hown ang tut-e takham iüa diah. Kawmat kowh ang saksing sana enchi iawng dow ang hai ang kimchakuüa kowi paw enchi nasaksing sana anging kown takla. Au apa, ang tainau-uüa hai amatni kowh kimchakuüa kowi kowngra hownia enchi nape plai anging kown takla. Now enchi nasaksing sana anging kown mih ang natukla kownkow pela ang amat müa lowk diah,” pape khai.

14Nami laiklow tata hanow kowiüah tek pe Rahab mih, “Anging kowh maiawngün sangkrangra dow mia kowi paw hang cham tek diah. En che cham tek dowi hanow mami pren CHAKRAMANG pe powng anging mih khin khe enni vüi iung müa anging nachang enni kown taih, now kaah sakowmma hai angching nachang enni kown. Angching tek en iawng chang en dowi hanow enni nakowng kown mih takcha angching pacham kowng lah,” pakhai.

15Rahab kowh kim dow marow tap hown achawn sang chekhai. Aia mih tawngpawk hownia iu iang pe leng hanow nami maru pre ia kowi iu pe dowmah khai. 16Amatchi iu dowm dowi rawn khe Rahab tek pe mih, “Kawikrawi enchi miuüa nakrum enchi dowi kownkow hungh prakowi kowpowt iüa diah. Sum ni mowr mih hungh kowi tapet iüa diah. Kawikrawi enchi miuüa uang plan kung kowi khe mang iüah iang,” pape khai.

17Nakhowk khe kowiüah tek pe Rahab mih, “En tek iawng nachang en kown mih angching takham khowk. 18Nachenganchepaw maiawng en nachang kown takla: Mami pren kowi anging uang plan kup mih khin khe kawmat kowh en klala angching mih leng aringma mih mami tawngpawk kowi natasük hüah kown takla. Now en u en pa, en tainau-uüa hai en pa kimchakuüa maten kowi mih en kim kowi en natowah kown takla. Naiawng che en chang dowi hanow angching kham en iawng angching chang en dowi chepaw angching luk kowi aprek nauowi kown nadowi. 19Nami khin khe en kim hownia kowh lawt mih maru dow tawi kowng khai chepaw aia kowng mih aprek aia chowtaih nakur kown; aia kowng mih aprek dow angching nakur kown nadowi. Tawkche en kim kowi uowi khowk chepaw anging kowh maru kakla kowh tawi kowng khai hanow nami maru kowng mih aprek dow angching nakur kown taih. 20Nachenganchepaw anging kowh kamrütra lawnguan che en cham phuangta khai hanow angching kham en iawng angching chang en dowi tham,” pakhai.

21Nakhowk khe Rahab klangah mih, “Ow, enchi tek iawng pacham na lah,” pape khai. Nami kung kowi dow taprai büah khai bowt. Now kowiüah mang kung kowi dow aringma mih leng mih tawngpawk kowi Rahab sükta hüah khai.

22Nami maru pre ia dow nami hownia powt hanow hungh kowi sum ni mowr kowtapet khai. Now amatchi kowi kowh kawikrawiah miuüa dow amatchi kowi krawikrum dowi rakowi uang plan khai bowt. 23Nami kung kowi dow nami maru pre ia mih hungh hownia iu dowm hanow haipown Jawrdan aw khai, now amatni Israeluüa uowi rah kowi kowkowi khai. Amatchi dow Josua tut-e kowkowi hanow amatchi luk kowi tawng ngai chow own mih kowlawp pe iüah khai. 24Josua kowi amatchi tek pe mih, “Kanan pren paprenma mih a-i rut kowi CHAKRAMANG apta mih chowbowt pami lainowm chekhai. Kram a-i rakowi Kanan prenchak maten dow chürla kluk towbowt,” pape khai.