Jawb 31

Aprek uowi dowi mih lawnguan Jawb tek mih

1“Ang kowh mik hown ang tatow sangbowk laitawm khai bowt.

Naiawng rakowi ir mih saktuak hown malauüa prakowi ang namü kown nadowi.

2Lusa maru vüi tawng chow Thurai chang?

Mukuang kowi kowh lowra nowngia chang mih Thurai tawng chow pe?

3Nami dow maru ngakuüa vüi piakra chowtaih nadowi bow?

Now lup ngak chang miuüa vüi phih chowtaih nadowi bow?

4Thurai dow tawng chow ang chang mih khi bowk nadowi bow?

now ang kowh khawk san maten paw aia khi bowk nadowi bow?

5“Ang dow mia kowi paw cham krawi daila dowi chekhai;

ang dow mia kowi paw cham krawi kuanla dowi chekhai.

6Thurai dow achima mih set khai iawng pacham khai ang lah,

nahanow aia dow ang achinawmma pami natuk kown towbowt.

7Ang kowh khawk che tiama ngak kowi cham mangla khai,

ang kowh sak che ang kowh mik khi-ah mih kowi cham krawi irla khai,

nadowi now ang kowh rut che akeng mih angak hown tasür talawkla khai hanow,

8ang changah mih luprak dow maru pacham chata lah,

now ang changah mih luprak mih maru pacham piakta lah.

9“Ang kowh sak che masiuüa prakowi cham tuakla khai,

now chang iang kownkow kimping namkhetuüa kimplawt re-e ang cham chawng khai hanow,

10ang kowh masi mih akeng mih maru kowh narma pacham chowng lah,

now akeng mih maru-uüa mih aia hown pacham taphua taiua lah.

11Masiuüa irra dow ang vüi kowi suiiai kaniaima mih lup chekhai.

Nami dow tara chet miuüa hownia nakala ripra kown mih lup ngak chekhai.

12Nami ngak dow asaima nowngia piak mih maih iawng chekhai,

ang kowh uowi mih maten nami angak mih maih iawng nowngia kam chekhai.

13“Ang kowh narma narlauüa uang chawk lai mih khin uowi;

nami khin khe hawt sünta pe hanow ang chet pe tara nowm khai.

14Naiawng che ang chang dowi hanow Thurai pur kowi tawng iawng chow ang nowng iowng kown?

Aia lünta ang mih khin khe tawng chow ang natek pe kown?

15Tawngplawng kowchow panow aia dow ang hai ang kowh naruüa kowi thawp miia chekhai,

aia dow anging kowh u-uüa mu lak hownia thawp anging mih chekhai.

16“Ngarai miuüa kowi katpaw ang towkla akhawr dowi,

now mamaimowuüa kowi paw katpaw ang towkla tuak krat dowi.

17Ang kowh chakkham mih ang malowkchow ang lang cha dowi,

ang kowh chakkham mih saratchowuüa kowi paw ang pe chala reng chekhai.

18Amatni kowi dow ang klanguüa chowng hownia pa iawng ang khetah reng,

now mamaimowuüa kowi dow chownglawng prat ang khowngah reng chekhai.

19Tawnguat uowi dowi rakowi arua hown kawm mih che ang khila khai,

ngaraima mih maru tengiow tengklaima uowi mih che ang khila khai hanow

20amatni naruala dowi kownkow ruapur pawi hown kowh uan ang peah reng chekhai,

now amatni dow sak maiow hown pe ang prasi reng chekhai.

21Tara chet miia natangila ang kown mih ang tuk kowh saratchow kowi ang che kuanla kakat khai hanow

22ang kowh bawng mih pangkawt hownia pacham tarai lah.

23Tawngplawng kowchow panow ang dow Thurai narip kown mih kowi ang kram chekhai,

Thurai dow kri kraingma pami ang tuk chekhai.

24“Ang kowh pawisa tangka luk kowi katpaw ang owmsak dowi,

ang kowh achangma mih kuh luk kowi ün katpaw ang owmsak dowi chekhai.

25Ang kramah mih dawngthawnguan ahuma khowk;

nachenganchepaw naiawngün hown ang chang bawri dowi chekhai.

26Ang dow sat uang sawt mih kowi chupiia dowi,

now lama kowi paw ang tawi chupiia dowi chekhai.

27Ang kowh sak dow naiawngün prakowi cham tawi tuak dowi,

naiawngün kowi nachupiia kownkow ang kowh rut ang nam dowi chekhai.

28Naiawng ang che chang hanow Thurai kowh ripra kak tataingla mih angak ang chang mih chekhai,

now mukuang kowi kowh Thurai kowi ang tadata mih chekhai.

29“Ang kowh ransu-uüa piak mih khin khe ang piaw dowi,

amatni kawmkrat mih khin khe ang awmrawm dowi chekhai.

30Ang kowh ransu-uüa kowi nakowngla kown mih piati ang pe dowi,

naiawng mih piati lai hown ang kowh nawr kowi ang pe changah angak dowi.

31‘Maru-uüa kowi tawmpa sakkrai aia pe mangah khai,’ pami

ang kowh naruüa katpaw tek dowi chekhai.

32Prenlang maru-uüa dow tiama rawng kowi iak takla dowi chekhai.

Tawngplawng kowchow panow ang kowh kimplawt dow amatni vüi tauow hüah chekhai.

33Akeng mih maru-uüa iawng ang kowh ngak ang pet dowi chekhai,

now sakdawng kowi paw ang kowh angak mih ang itah dowi chekhai.

34Naiawng rakowi maru kowi ang kram dowi chekhai,

amatni nasui ang kown mih kowi kram kowh kim kowi ang uowi phülü dowi chekhai.

35“Uh, ang kowh laiklow amia chünchü sünta ang dit panü!

Ang kowh laiklow anowm pami takham se ang tek khowk.

Lowra nowngia chang mih Thurai dow pacham klang ang lah,

kingküa ang mih maru dow ang kowh angak ruiah now pacham tüngah lah.

36Nami charam dow bawrima hown pangkawt kowi ang nadanah kown,

now nami dow lukruk iawng lu kowi ang nakrukah kown.

37Ang changah mih maten Thurai kowi ang natek pe kown;

aia pur kowi mang chapa iawng ang nakowkowi kown.

38“Ang kowh krawng bawn dow maru tut-e kowh ang cham kuah mih nadowi chekhai,

nami krawng bawn dow ang cham kuah pami amiapaw naia me ang kown nadowi.

39Ang chaah mih chakkham sung laih iah kowi peah dowi kowi ang uowi dowi chekhai,

nakowi kowh laih iah-uüa kowi dow sakkrai hown ang pe kowngah dowi chekhai.

40Ang che chang hanow nami laih kowi dow püm takcha chu mung pacham ru lah,

now iakmow takcha mawh pacham awm lah,” pakhai.

A-auiua sum ia kowi Jawb tek pe mih laiklow dow maiawng khowt now chur khai.