Jeremia 50

Babulawn vüi kowi kowh laiklow

1Mami dow Babulawn prenchakuüa lawnguan kowi kowh risi Jeremia kowi CHAKRAMANG tek pe mih laiklow chekhai. CHAKRAMANG tek mih,

2“Enni mih chenchapuüa pungmadawng kowi krawi chia krawi phuang diah;

tawngpaw hangkow itah büa diah.

Ruang tamkhuown büa diah,

now krawi phowng satang büa diah.

Babulawn pren dow maru napowngta kown;

Bel thurai dow naka rukrai kown,

now Marduk thurai dow natadi nak kown.

Babulawn kowi kowh arup aren dow naka rukrai kown.

3“Babulawn kowi dow tawngphak hownia kowh chenchap nauang senah kown. Aia kowh pren dow apiaknama natowta pe hüah kown. Nakowi dow miapaw nauowi kown nadowi bowt; maru hai tawncher maten nacham powt bowk kown.

4“Nami khin khe Israel hai Juda maru-uüa mih mik tui vüng prang CHAKRAMANG Thurai kowi tuk kown mih nanau kown. 5Amatni dow Zaiawn tiama lawnguan kowi nakrawi lünta kown, now nami prakowi nakowkowi büah kown. Amatni dow katpaw tamata dowi bowt pat CHAKRAMANG hown chowngchowng saksakma mih sangbowk laitawm natatow büah kown.

6“Ang maru-uüa dow tama mih ruapur hawmh iawng chekhai. Amatni kowi dow tiama tawi kowi amatni kowh kruitown miuüa cham pawla khai. Naiawngün kruitown miuüa rakowi amatni dow hungma mawngma kowi krawi lenla pang khai. Amatni dow tawng iawng chow ruapur tung kowi nauang plan kown mih tuk dowi bowt chekhai. 7Amatni kowi dow krumah miuüa srui senah khai. Amatni kowh ransu-uüa tek mih, ‘Israeluüa kowi a-i senah mih tawi dowi chekhai. Tawngplawng kowchow panow amatni dow amatni kowh CHAKRAMANG kowi kingküa mih chekhai. Nami klen kowi amatni kowh tawkra ching hai amatni pipu-uüa kowh sakowmra CHAKRAMANG kowi kingküala mih angak chang büah khai,’ pakhai.

8“Aw Israeluüa, Babulawn hownia powt büa diah. Babulawnuüa kowh pren towla hanow rua hawmh pur kowi ruala rik mang mih iawng taowt powt büah diah. 9Tawngphak pra kowh pren hownia chenchap aiuk aiukma mih kowi ang nakuaah hanow Babulawn pren kowi ang nauang pe senah kown. Amatni dow Babulawnuüa kowi nasenah hanow napowngta pren kown. Amatni ransu-uüa kowh leba sek dow tasen kiakma miuüa kowh iawng mapaw naiawm kown nadowi. 10Babulawn kowi kowh uanh maten dow ransu-uüa napawla pe kown; amatni kowh uanh pawla mih ransu-uüa maten dow nasak-ih kown. Ang CHAKRAMANG mami laiklow ang tek khowk.

11“Aw Babulawnuüa, ang maru-uüa kowh uanh maten

enni pawla rakowi enni piaw hai awmrawm khai.

Enni dow chia chah powrchow mih iawng plaila dowk khai,

now nau haupawk thüm mih kawrnga iawng hek khai.

12Tawkche enni kowh pren mih naka rukrai kown,

enni kowh pren dow akhaw aklaima naphaw kown.

Babulawn dow chenchapuüa pungmadawng kowi nalang sowm kown,

aia dow süngrüp süngkangma iawng rüprapma naphaw kown.

13CHAKRAMANG kunmarau rakowi Babulawn dow asaima natapiak kown;

aia tut-e dow miapaw nauowi kown nadowi.

Aia iawng kowmang miuüa maten dow naawda kown,

now aia kowh piak krang khi hanow maru naprawng renah kown.

14Leba dowkma miuüa low, Babulawn kowi nasenah kownkow tapat lut kowiowng büa diah,

now leba sek lowkchow khowm lat dowi pat kowapah büa diah.

Tawngplawng kowchow panow aia dow CHAKRAMANG kowi kingküala mih angak chang khai.

15Aia kowi dow tavir lut kowsenah büa diah;

aia dow khamsum khai bowt.

Aia kowh akhawtma mih kimkrowng dow piak khai bowt,

now aia kowh tap dow takhue khai bowt.

Aia luk kowi dow CHAKRAMANG sat pe aklai mih chowbowt;

enni paw sat pe aklai diah,

akeng chenchapuüa kowi aia krawi chang iawng aia kowi changah büa diah.

16Babulawn kowi kowh liu sawt miuüa maten kowi pawla bowk diah;

nakowi kowh luprak kua miuüa maten kowi cham chinta bowk diah,

Tawngplawng kowchow panow nakowi kowh maru-uüa dow ransu-uüa kowh saidawng kowi kram kowh napowt bowk kown,

amatni dow amatni chowlowkkow pren kowi naplan bowk kown.

Thurai maru-uüa vüi sakowmra

17“Israeluüa dow krangsi krawiah kowh cham taset plawt mih ruapur hawmh iawng chekhai. Amatni kowi dow auown khe Asuria mang uang senah khai. Achur khe dow Babulawn mang Nebuknezar mih amatni kowh hut dita pe nak khai. 18Naiawng rakowi ang mukuang siphaiuüa kowh CHAKRAMANG Israeluüa kowh Thurai mih Asuria mang kowi ang ripah khai. Nami iawng Babulawn mang hai aia kowh pren kowi paw ang naripah kown. 19Nachenganchepaw Israeluüa kowi dow amatni kowh tawkra kowi ang nauang plan pawla kown, now amatni dow Karmel hai Basan süng kowi nakrawi taw kown. Amatni dow Efraim hai Gileaduüa kowh hungma mawngma süng kowi aduma nauowi kown. 20Nami khin khe dow Israeluüa kowh angak mih nacham pe kown. Tawkchedow angak lowkchow paw naka kown nadowi. Juda kowi paw nacham pe angak kown. Tawkche lowkchow paw naka pe angak kown nadowi. Tawngplawng kowchow panow ang natowah sing kown miuüa kowi dow ang nalawtta pe angak kown chekhai.

Babulawn kowi Thurai chet pe tara mih

21“Aw Babulawn ransu-uüa, ang CHAKRAMANG tek khowk,

Merathaim kowi hai Pekawd kowi kowh uowi miuüa kowi kowsenah büa diah.

Amatni kowi dow kowkrawiah hanow saita büa diah;

amatni kowi asaima piakta büa diah,

now ang pe enni mih ana maten iawng chang büa diah.

22Babulawn pren kowi dow tasen klow ta khai bowt,

now piakra akraingma mih klow paw taah khai bowt.

23Babulawn dow palusama kowh matul chekhai.

Nachenganchepaw kawmat dow aia mih taklowk naknak khowk.

Aia piak krang khita hanow chenchapuüa maten awda khai.

24Aw Babulawn, en vüi ang chakta leng hüah khowk;

nami leng kowi en tasowk khai bowt.

Tawkche en tuk dowi chekhai.

En kowi khümta en khai bowt,

Tawngplawng kowchow panow en dow kingküa ang khai.

25Babulawn pren kowi dow mukuang siphaiuüa kowh CHAKRAMANG kowh lup uowi chekhai;

naiawng rakowi ang kowh rutchün khawkleng towk rah kim ang uowah hanow

ang uang lawtla rutchün khawkleng khai.

26Aw Babulawn ransu-uüa, Babulawn kowi uang senah kownkow alakma hownia uang büa diah;

aia kowh chakkham nungra kim uowta pe büa diah,

now nakowi kowh uanh maten napawla pe kownkow hurta hüah büa diah.

Aia kowi dow asaima piakta büa diah;

tawngpaw hangkow towla büah diah.

27Chiala iawng akürma mih aia kowh siphaiuüa maten kowi saita pe diah.

Tawngplawng kowchow panow aia kowi naripah kown mih khin uang ting khai bowt,” pakhai.

28Sünta, Babulawn hownia kowh ia powt miuüa dow Jerusalem kowi uangah now a-i kowh CHAKRAMANG Thurai chup kim piakta mih klai tawng iawng chow Thurai sat pe mih lawnguan uang tek khai.

29CHAKRAMANG tek mih, “Babulawn kowi nauang senah kownkow leba dowk miuüa maten kowi hawah diah. Aia tavir lut siphaiuüa kowi pe khupah tangbung büa diah; mia kowi paw hangkow pe powtah diah. Aia kowh lup sung mih aia kowi pe kaah diah; aia krawi chang iawng aia kowi changah diah. Tawngplawng kowchow panow aia dow CHAKRAMANG Israeluüa kowh chimsaima mih Thurai kowi kingküa mih hownia tanü iuk khai. 30Naiawng rakowi aia kowh klanguüa hawm dow marow kowi kowh tiama kowi ün kowng kowh natakuakla pan kown. Nami ni khe dow aia kowh siphaiuüa kowi nachumta pe bowk kown.

31“Ang mukuang siphaiuüa kowh CHAKRAMANG tek khowk,

aw bawrima mih maru-uüa, sünta, ang kingküa enni khowk.

Tawngplawng kowchow panow enni naka ripra kown mih khin uang ting khai bowt.

32Aw bawrima mih chenchap, enni dow natatui hanow natim kown;

tawkche miapaw nakrüng enni kown nadowi.

Enni kowh marow ün dow ang natowkta enni kown,

now naiawngün marow dow aria aret kowi kowh uowi mih hailawm nakam bowk kown,” pakhai.

33Mukuang siphaiuüa kowh CHAKRAMANG tek mih, “Israel hai Juda kowi kowh maru-uüa dow nowng chang powng changra kowi uowi khai. Amatni kowi dow khümah miuüa akhawtma dowkah hanow amatni kowi pe powtah dowi chekhai. 34Nachenganchepaw amatni kowh lawng miia dow akürma chekhai. Aia ming dow mukuang siphaiuüa kowh CHAKRAMANG chekhai. Amatni kowi dow Israel pren kowi thaulangma nape uowiah kownkow aia natawi takhula kown. Tawkche Babulawn prenchakuüa kowi dow akrat pusama hown aia natowah kown,” pakhai.

35CHAKRAMANG tek mih, “Babulawnuüa hai aia prenchakuüa kowi dow saidawng hown nasaiah kown,

now maru iukuüa hai chanlaima miuüa kowi paw saidawng hown nasaiah kown.

36Amatni kowh risi iuauüa kowi nakingküaah kown mih saidawng nauang ting kown;

nakhowk khe amatni dow abualama pami nakhi-ah kown.

Amatni kowh tasen kiakma miuüa kowi dow saidawng hown nasenah kown,

now amatni dow lainowmma nakram kown.

37Babulawn kowh kawrnga, kawrnga kari hai prenlang siphaiuüa kowi dow saidawng hown nasenah kown;

now amatni dow masiuüa iawng auaklakma naphaw kown.

Aia kowh dawngthawnguan maten dow ransu-uüa napawla pe kown.

38Sat kang rakowi nakowi kowh tui maten dow nakang kown.

Tawngplawng kowchow panow nami pren dow arup aren kowh pren chekhai.

Nakowi kowh kramra uowima mih arup arenuüa mih nakowi kowh maru-uüa kowi bualama nachangah kown.

39“Naiawng rakowi süngrüp süngkangma kowi kowh asadua hai brenkhui hawmh mih nakowi nauowi kown, now nakowi mih ut uakling paw nauowi kown. Nakowi dow katpaw maru nauowi kown nadowi bowt; chowngchowng saksakma nakowi miapaw nauowi kown nadowi bowt. 40Aria aret kowi kowh kua hailawm Sawdawm hai Gawmawra marow kowi ang piakah iawng Babulawn kowi paw ang napiakah kown. Nakowi dow miapaw nauowi kown nadowi. Ang CHAKRAMANG mami laiklow ang tek khowk.

41“Sünta, tawngphak hownia siphaiuüa uang tarü pathum khowk;

prenchur nammowt hownia chenchap akürma mih hai manguüa uang tarü tasen khowk.

42Amatni dow leba dowkma hai saidawng dowkma kangowh chekhai,

amatni dow kunma ngakma hai saksing sanara uowi dowi mih maru chekhai.

Kawrnga hown amatni uang tarü khe sata tui talowng mih tün iawng atün nowk rumrum khai.

Aw Babulawn chama, nauang sen en kownkow

amatni dow tasen tawnguat hown uang tarü khowk chekhai.

43Babulawn mang dow ransu-uüa uang mih satang tata hanow

kram lai bowt kowh bawng auaklakma phaw khai.

Aia dow penchow kimuowi mu rau phaw mih masiuüa iawng lainowmma kawm khai.

44“Jawrdan aw ria kowi kowh kaurawng hownia krangsi uang lawt hanow pram dawng kowi krawi mak chak khe kowh iawng Babulawnuüa kowi amatni kowh pren hownia amaisang ang nakrawiah kown. Now amatni kowi dow ang ruiah mih maru krüa kowi ang natowah kown. Mia chow ang hown tale? Mia chow nowng kingküa ang? Mia iawng mih kruitown mih paw nowng kingküa ang dowi chekhai,” pakhai. 45Naiawng rakowi Babulawn vüi kowi kowh CHAKRAMANG sangkrangra sünta diah. Amatni kowh chauüa kowi dow kür hown ransu-uüa nacham küngla kown, now amatni kowh pren dow asaima aia napiakta pe kown. 46Babulawn piak mih klow hown dow palusama nachür kown. Amatni kowh kar klow dow chenchapuüa mih nata kown.