Jeremia 24

Uidut uih kharang pre buk

1Babulawn pren mang Nebuknezar dow Jehoiakim chapa mang Jehoiakhin, aia kowh maru iukuüa, uanh thawp sarauüa hai kuh hai tai hown kowh uanh thawp sarauüa kowi Jerusalem marow hownia khümla now Babulawn pren kowi pawla khai. Nami kung kowi CHAKRAMANG dow pe khi ang mukmang lowk khai. Nami mukmang kowi dow CHAKRAMANG chup kim pur kowi uidut uih uowi pre kharang mih ang khi khai. 2Nami pre kharang mih kowi lowk mih kharang kowi dow rik min mih uidut uih iawng aiungma chekhai, now alowk mih kharang kowi kowh uowi mih uidut uih dow akenama panow kaah achak dowi chekhai.

3CHAKRAMANG lünta ang mih, “Jeremia tawng chow en khi?” pakhai.

Nakhowk khe ang klangah mih, “Uidut uih. Aiungma mih uidut uih dow aiungma chekhai, now angakma mih uidut uih dow nga krang kaah achak dowi mowr chekhai,” pakhai.

4Nami kung kowi CHAKRAMANG tek ang mih, 5“Ang CHAKRAMANG Israeluüa kowh Thurai tek khowk, Juda pren hownia Babulawn pren kowi ang cham pe takhangah miuüa kowi dow aiungma mih uidut uih iawng ang nachangah kown. 6Amatni naiungla kownkow amatni kowi dow ang namüah kown, now amatni kowh pren kowi ang nauang pawla iawk kown. Amatni kowi dow ang naiuk nasownah kown, ang napiakah kown nadowi. Amatni kowi dow singh chowk iawng ang nachowkah kown, ang nachawiah kown nadowi. 7Amatni kowi dow ang CHAKRAMANG pami natukla kown mih saktuak ang napeah kown. Amatni dow ang kowh maru nachowng kown, now ang dow amatni kowh Thurai nachowng kown. Tawngplawng kowchow panow amatni dow saktuak maiow hown ang tut-e nauang plan kown.

8“Tawkche Juda pren mang Zedekia, aia kowh maru iukuüa, Jerusalem maru-uüa hai Aigupta pren kowi kowh uowi mih Judauüa kowi dow kaah chak dowi mih angakma mih uidut uih iawng ang nachangah kown. 9Amatni kowi dow ang cham prütah mih arah kowi kramra uowima mih maru iawng ang nachangah kown. Nahanow amatni kowi dow lusa maru maten nasak-hiaah kown, maru nakhare nichakah kown, maru nacham changla lai lawt kown, now amatni kowh ming hown maru nacham tape piati kown. 10Amatni hai amatni pipu-uüa kowi ang peah mih pren kowi tapiak büah bowk dowi mowr amatni luk kowi tasenra, khown hai makowng hawi ang nauang chin pe kown. Nami pren kowi miapaw nata lat kown nadowi,” pakhai.