Jeremia 13

Adipükchow mih la hown kowh kraksa dawngh

1CHAKRAMANG tek ang mih, “Adipükchow mih la hown kowh kraksa dawngh kowran lowk hanow ü diah. Tawkche nami dow tui kowi hangkow sikah diah,” pakhai. 2Nahanow ang dow CHAKRAMANG ana pek iawng kraksa dawngh kowran lowk hanow ang ü khai.

3Nami kung kowi CHAKRAMANG plan tek ang mih, 4“En ranah kowh en ü-ah mih kraksa dawngh dow Iufratis aw re-e kowpawla diah, now nakowi kowh hua takra kowi kowpetah diah,” pakhai. 5Naiawng rakowi nami atowngchow mih dawng dow CHAKRAMANG tek iawng Iufratis aw re-e kowh hua takra kowi ang kowpetah khai.

6Khin krama kung kowi CHAKRAMANG tek ang mih, “Kawmat Iufratis aw re-e kowkowi diah, now nakowi kowh ang pe pet en mih kraksa dawngh dow uang pawla diah,” pakhai. 7Naiawng rakowi Iufratis aw re-e ang kowkowi khai, now ang petah mih rah hownia uatah hanow nami kraksa dawngh dow ang uang laila khai. Tawkche nami dow piak khai bowt; mapaw kaah tawng dowi bowt chekhai.

8Nami kung kowi CHAKRAMANG tek ang mih, 9“Ang CHAKRAMANG tek khowk, naiawng hai Judauüa kowh bawrira hai Jerusalem maru-uüa kowh bawrira dow ang napiakta pe kown. 10Naiawngün maru ngakuüa dow ang laiklow chün dowi chekhai. Amatni dow saktuak khawtma uowi büah khai. Akeng thuraiuüa kowh lup ün cham tawi chang büah khai, now chupiia paw cham tawi chupiia büah khai. Naiawng rakowi amatni kowi dow nami kaah atawng dowi mih kraksa dawngh iawng ang nachangah kown. 11Kraksa dawng dow kelang kowi tasük krowk iawng maru ü-ah reng. Nami iawng Israeluüa hai Judauüa kowi dow ang tut-e atawnchow ang towah reng chekhai. Naiawng ang towah mih dow ang maru-uüa hownia ang kowh ming iung nang iung, kiowrira hai ringkawra ang nakala kownkow chekhai. Tawkche amatni dow ang laiklow sünta dowi chekhai.

Towla grep tui mih bawn kawng

12“Amatni kowi dow CHAKRAMANG Israeluüa kowh Thurai tek mih maiawng kowtek pe diah, ‘Grep tui dow bawn kawng towng atekma natowah kown takla,’ pape diah. Nakhowk khe amatni natek en kown mih, ‘Bawn kawng towng kowi grep tui atekma natow kown mih anging tuk dowi pabow?’ napa kown. 13Nakhowk khe amatni kowi maiawng ang tekah mih kowtek pe diah, ‘Mami pren kowi kowh uowi mih maru maten kowi dow rak pua iawng ang nachangah kown. Now mang David kowh mang chowm rah kowi kowh chowm mih manguüa, uamowuüa, risiuüa hai Jerusalem marowchakuüa kowi paw nami iawng ang nachangah kown. 14Grep tuikawng lowkkowlowk takhing khe kowh teu prawt mih iawng amatni kowi dow ang napiakta nak kown. Pa lah, chapa lah bowkbowk kowi ang napiakah kown. Amatni kowi dow tawng iawng paw ang nasaksing sanaah kown nadowi, ang napiakah ngengche kown,’ pape diah,” pakhai.

Bawrira hownia nauowi kaneu kown mih

15Judauüa low, sünta büa diah;

pe ching büa diah,

now hang chang bawri büa diah.

Tawngplawng kowchow panow CHAKRAMANG tek khowk chekhai.

16CHAKRAMANG enni kowh Thurai kowi ringkaw diah,

aia kowi kiow diah.

Nadowi kowh chalow now aia dow aiiu mih nauang pawla enni kown,

now aiiuma mih hungh kowi enni natatheu kown.

Nakhowk khe dow enni krawi cham anowi chepaw aiiu chowtaih enni nakrum kown.

17Enni che CHAKRAMANG laiklow sünta dowi hanow

enni kowh bawri rakowi kukpa ang nacham kar kown,

now ang kowh mik tui dow nahawr dawilawi kown.

Tawngplawng kowchow panow CHAKRAMANG kowh maru-uüa kowi dow ransu-uüa nakhümla kown chekhai.

18CHAKRAMANG tek ang mih, “Mang hai a-u kowi en nakowtek pe kown mih,

‘Mang chowm rah hownia uang iu dowm iüa diah.

Tawngplawng kowchow panow enchi kowh mang lukruk dow nauowi kown nadowi bowt;

enchi kowh klangiungma mih lukruk dow enchi lu hownia nadowh bowt kown.

19Mrawkphak prakowi kowh Negeb kowi kowh Judauüa kowh marow ün dow ransu-uüa nauang rumta lut kown,

naiawngün marow kowi dow amiapaw nauang nowng lawngah kown nadowi.

Judauüa maten kowi dow ransu-uüa mih khümla hanow

akeng pren kowi nacham pawla kown,’ pape diah,” pakhai.

20CHAKRAMANG tek mih, “Aw Jerusalem, kü mik hanow mü diah,

tawngphak hownia ransu-uüa uang tarü khowk.

Aia pe en mih ruapur hawmh iawng mih maru-uüa tawng kowi chow?

En dow naiawngün maru-uüa hown lainowmma en chang bawri khai.

21Akeng mih maru-uüa nakhowng enni kown mih enni owm khai.

Nachenganchepaw kawmat dow amatni kowi mih enni luk kowi ang nape kruitownah kown.

Nami lawnguan kowi tawng chow enni natek kown?

Enni dow penchow kimuowi mu rau iawng enni nangare kown.

22‘Tawngplawng kowchow maiawng a-i luk kowi uang tuk ting khai?’ pahai enni naka tuak kown.

Naiawng enni luk kowi uang ting mih dow enni chang ngak lai rakowi chekhai.

Enni kowh tawnguat mih ransu-uüa nathekta enni nak kown,

now enni kowh ransu-uüa mih kür hown naphua naiua enni kown.

23Ethiawpia pren kowi kowh maru-uüa dow amatni kowh pik mia rawng nowngia klowi dowi chekhai,

now pri rengchow paw aia buk kowi kowh apriama mih nowngia plim dowi chekhai.

Nami iawng enni kowh angak kiang dow enni nowngia tow dowi chekhai.

24“En kowh maru-uüa kowi dow süngrüp süngkangma kowi kowh

li rownla mih chapli iawng ang nauetah kown.

25Enni kowh kakbak dow nami chekhai,

enni vüi kowi kowh ang kamrütta mih dow nami chekhai.

Tawngplawng kowchow panow enni dow tamata ang khai,

now anowm nadowi mih thurai kowi enni cham tawi owm khai.

26Naiawng rakowi enni khupah mih tawnguat dow ang naklüpta enni kown,

now ang natüng enni siri hanow enni narukrai kown.

27Enni chang iang mih hai enni kowh manau hown enni taphua taiua mih ang khi khowk,

now rukraira uowima mih chawkkrawma lup enni chang mih paw ang khi khowk chekhai.

Nami klen kowi hungh towng kowi hai dowm towng kowi ün

suiiai kaniaima mih lup enni chang mih paw ang khi khowk.

Aw Jerusalem, en luk kowi piakra nauang ting kown mih dow kramra uowi lai kowbow!

Mün ni tak chow asür alawkma hown en nauowi kown?” pakhai.