Jeremia 1

1Maiawngün dow Hilkia kowh chapa Jeremia kowh laiklow chekhai. Jeremia dow Anathawt marow kowi uamowuüa pungmadawng kowi kowh lowk ia mih chekhai. Anathawt marow uowi mih dow Benjamin krungchak süng kowi chekhai. 2Juda pren kowi Josia chowm mang mih laisum ning khe CHAKRAMANG kowh laiklow dow Jeremia tut-e uang uown ting khai. Josia dow Amawn chapa chekhai. 3Nami hownia Juda pren kowi Josia kowh chapa Jehoiakim chowm mang mih khin khe paw CHAKRAMANG kowh laiklow Jeremia tut-e uang ting reng tak chekhai. Naiawng hown Juda pren mang Josia kowh alowk mih chapa Zedekia chowm mang mih lailowk ning nga kowi kowh tanga la mowr aia kowi dow CHAKRAMANG klangah khai. Nami tanga la mih khin khe dow Jerusalem marowchakuüa kowi Babulawnuüa khümla hanow Babulawn pren kowi pawla khai.

Jeremia kowi CHAKRAMANG hawah mih

4CHAKRAMANG laiklow dow ang tut-e uang ting khai. CHAKRAMANG tek ang mih,

5“En kowi dow en u mu lak kowi ang thawp en dowi rawn hownia ang tuk en chekhai;

en kowi dow en uang dia dowi hownia ang lang klota en khai bowt,

now en chenchapuüa tut-e risi nachowng kownkow ang khowmta en khai bowt,” pakhai.

6Nakhowk khe CHAKRAMANG kowi ang tek pe mih, “Aw CHAKRAMANG Thurai, ang dow klangiungma tuk tek lai dowi; ang dow ngeuüa lai tak chekhai,” pape khai.

7Tawkche CHAKRAMANG tek ang mih,

“‘Ang ngeuüa lai tak,’ pami laiklow hang tek diah;

ang chin en mih maru-uüa tut-e en nakowkowi kown,

now ang pe tek en mih laiklow chowtaih nakowi en nakowtek kown.

8Amatni kowi dow hangkow kram diah;

en tut-e atungma ang natawi uowila en kown,

now ang natawi towkala en reng kown,” pakhai.

9Nami kung kowi CHAKRAMANG dow iu iaw rut hanow kak ang nawr khai. Now tek ang mih,

“Kawmat dow ang kowh laiklow mih en nawr kowi ang towta en khowk.

10Ani hownia chenchapuüa hai prenchakuüa kowi nakingküa kownkow ang tow en khowk;

amatni kowi dow singh chawi iawng en nachawiah ne kown,

now amatni kowi dow en napiakta ngengche kown.

Tawkche akeng miuüa kowi dow en naplan thawpah kown,

now singh chowk iawng en nachowkah ngengche iawk kown,” pakhai.

11Nami kung kowi CHAKRAMANG tek ang mih, “Jeremia, tawng chow en khi?” pakhai. Aia kowi ang klangah mih, “Ang khi madam singh mia lowk,” pape khai. 12Now CHAKRAMANG tek ang mih, “En khi mih na chow, tawngplawng kowchow panow ang kowh laiklow iawng naia phawla kownkow nami prakowi ang dow pe ching reng chekhai,” pakhai.

13Nami kung kowi CHAKRAMANG plan lünta ang mih, “Tawng chow en khi?” pakhai. Ang tek pe mih, “Ang khi puh lowk. Nami puh dow tawngphak hownia mrawkphak prakowi tange hüah chekhai, now alak kowi dow tui klawk butlut chekhai,” pape khai. 14Nakhowk khe CHAKRAMANG tek ang mih, “Mami pren kowi kowh uowi miuüa luk kowi dow tawngphak hownia tui lawt iawng phih nauang ting kown. 15Ang dow tawngphak pra kowh pren maten kowi kowh uowi mih chenchapuüa kowi Jerusalem marow kowi nauang kownkow ang hawah khai. Naiawngün pren manguüa dow Jerusalem tapplawt re-e uang hanow aiamat kowh mang nanra nauang thawp kown. Amatni dow Jerusalem tap hai Juda pren kowi kowh marow maten paw nakrawi rumta bowk kown. 16Naiawng hown amatni kowi dow ang nachet pe tara hanow naripah kown. Tawngplawng kowchow panow ang maru-uüa dow nuata ang khai, now akeng thurai vüi nam iungma mih maikhük cham towk büah khai. Amatni rut hown kowh thawpah mih uanh kowi ün amatni dow cham chupiia khai.

17“Jeremia, en mih awr rü hanow kamrütma uowi diah. Now ang pe tek en mih laiklow amatni kowi kowtek pe diah. Amatni kowi mapaw hangkow kram diah. En che kram khai hanow amatni pur kowi krampuma ang nachang en kown. 18Ani dow akhawtma mih marow iawng, lawngha chüng iawng hai kri tap iawng ang changta en khowk. Naiawng ang chang en mih dow Juda pren manguüa, maru iukuüa, uamowuüa hai pren kowi kowh maru maten luk kowi naia tek laiklow kownkow chekhai. 19Amatni dow nauang kingküa en kown. Tawkche naia sum en büah kown nadowi. Tawngplawng kowchow panow natawi towkala en kownkow en tut-e ang tawi uowi reng chekhai. Ang CHAKRAMANG mami laiklow ang tek khowk,” pakhai.